लुम्बिनीमा एकल बहुमतको सरकारमा एमालेको दाबी, मुख्यमन्त्रीको शपथ आजै हुन सक्ने

लुम्बिनीमा एकल बहुमतको सरकारमा एमालेको दाबी, मुख्यमन्त्रीको शपथ आजै हुन सक्ने

A+ A A-

लुम्बिनी प्रदेशमा एमालेले संसदीय दलका नेता शंकर पोखरेलकै नेतृत्वमा एकल बहुमतको सरकार गठन गर्ने निर्णय गरेको छ ।

आइतबार बिहान बसेको एमाले संसदीय दलको बैठकले पोखरेललाई नै पुनः मुख्यमन्त्री बनाउने र एकल बहुमतको सरकार गठन गर्ने निर्णय गरेको हो । जनता समाजवादी पार्टीले पोखरेल नेतृत्वको सरकारमा सहभागी भएको भन्दै चार सांसदलाई कारबाही गरेपछि लुम्बिनी प्रदेशसभामा एमालेको एकल बहुमत छ ।

प्रदेशसभामा एकल बहुमत भएको एमालेले संविधानको धारा १६८ को उपधारा २ अनुसार पोखरेल मुख्यमन्त्री बनेको र अब १६८ को (१) अनुसार एकल सरकार गठन गर्ने तयारी गरेको हो । प्रदेशसभामा एकल बहुमत भएकाले संविधानको १६८ को (१) अनुसार एमालेले एकल बहुमतको सरकार गठनका लागि प्रदेश प्रमुखसमक्ष दाबी पेस गर्ने निर्णय गरिसकेको छ ।

एमालेले एकल बहुमतको सरकार बनाउने निर्णय गरेपछि पोखरेललाई आइतबार नै मुख्यमन्त्रीको शपथ खुवाउने तयारी गरिएको छ । एमाले सचेतक भूमिश्वर ढकालले नेता पोखरेलले आइतबार नै मुख्यमन्त्रीको शपथ लिने बताए ।

‘प्रदेशसभामा हाम्रो एकल बहुमत छ । त्यसैले मुख्यमन्त्रीमा पोखरेलले आजै शपथ लिनुहुनेछ,’ उनले भने । ६ वैैशाखमा मुख्यमन्त्री पोखरेलविरुद्धको अविश्वासको प्रस्ताव प्रदेशसभामा दर्ता भएपछि उक्त प्रस्तावको छिनोफानो गर्नका लागि आइतबारका लागि विशेष अधिवेशन बोलाइएको थियो ।

अधिवेशन सुरु हुनुअघि नै मुख्यमन्त्री पोखरेलले एकल सरकार बनाउन भन्दै राजीनामा दिएका थिए । स्रोतका अनुसार नयाँ सरकारमा एमालेको माधवकुमार नेपाल समूहका सांसद विष्णु पन्थीलाई पनि मन्त्री बनाउने तयारी गरिएको छ । यस्तै, पोखरेल नेतृत्वको सरकारमा जसपाबाट मन्त्री बनेका नेताहरू फेरि दोहोरिनेछन् ।

जनता समाजवादी पार्टीले चार र नेकपा माओवादी केन्द्र दुई जना सांसदलाई कारबाही गरेपछि हाल प्रदेशसभा ८१ सदस्यीय छ । प्रदेशसभामा एमालेका ४१, माओवादीका १७ (सभामुखबाहेक), कांग्रेसका १९, जसपाका दुई र जनमोर्चाका एक सांसद छन् ।

प्रकाशित मिति: आइतबार, वैशाख १९, २०७८ १२:०५