सुति-नसुती दिनरात संक्रमितको उपचारमा नर्सहरू

भेरी अस्पतालका नर्स । तस्वीर : सामाजिक सञ्जालबाट ।

A+ A A-

एउटी नर्स बेहोसजस्तै देखिन्छन् । दुईतिरबाट साथीहरूले आड दिइरहेका छन् । पीपीई सेटमा रहेका नर्सहरू थाकेको देखिन्छन् । सामाजिक सञ्जालमा भाइरल भइरहेको उक्त तस्वीर बाँकेस्थित भेरी अञ्चल अस्पतालका नर्सहरूको हो ।

‘तस्वीर भेरी अस्पतालको नर्सहरूको हो । नर्सहरूलाई रेष्ट गर्न वार्डनजिकै रुम बनाएका छौँ’, अस्पतालको सूचना अधिकारी डा. संकेत रिसालले शिलापत्रसँग भने, ‘डाक्टर, नर्स नै संक्रमित हुनुहुन्छ । आराम गर्दै बिरामीकै उपचारमा खटिनुभएको छ ।’

भेरी अस्पतालका नर्स । तस्वीर सामाजिक सञ्जालबाट ।

भोक प्यास नभनी संक्रमित भएर पनि कोभिड बिरामीको उपचारमा खटिएका नर्सहरूको सामाजिक सञ्जालमा प्रशंसा भइरहेको छ ।

नेपालस्थित अमेरिकी दूतावासलेसमेत फोटो सेयर गर्दै लेखेको छ, ‘आजको दिनमा हामी मिलेर ती सबै स्वास्थ्यकर्मीलगायत कोभिड– १९ विरुद्धको लडाइँमा अग्रपंक्तिमा रहनुभएका सबै जनाको सम्मान गरौँ, जसले आफ्नो जीवन नै जोखिममा राखेर नेपाल होस् या अमेरिका अथवा संसारको अन्य कुनै भागमा अरूको जीवन बचाउने कार्यमा दिनरात नभनी खटिनुभएको छ । समस्त विश्वमा आइपरेको यो विपत्तिमा तपाईंहरू सबैको सेवाभाव र समर्पण अतुलनीय छ, धेरै धेरै धन्यवाद ।’

भेरी अस्पतालमा शनिबारसम्म ९० जना स्वास्थ्यकर्मी संक्रमित भएका छन् । ‘डाक्टर, नर्स, सहयोगी, अन्य कर्मचारी गरेर ९० जना संक्रमित भएका छन्’, डा. रिसालले भने, ‘स्वास्थ्यकर्मीलाई नै परामर्श दिइरहेका छौँ । अस्पतालमै क्वाटरको व्यवस्था गरिएको छ ।’

अस्पतालमा २ सय ७२ जना संक्रमित भर्ना भएको उनले बताए । ‘भर्ना भएका ८० प्रतिशत अक्सिजनमा छन् । भेन्टिलेटरमा ७ जना । स्थिति गाह्रो छ’, उनले भने, ‘कुरुवा नै संक्रमित छन् । तीन हप्ता आर्मी शासनको लकडाउन लगाउनुपर्छ । अनि मात्र कोरोनाको चेन ब्रेक गर्न सकिन्छ ।’

भारतको महाराष्ट्रमा संक्रमण फैलदा नेपालमा असर देखिएका र विद्यालय बन्द गर्न आग्रह गर्दा कसैले नमानेकाले आज यो स्थिति आएको उनी बताउँछन् ।

भेरी अस्पतालका नर्स । तस्वीर : सामाजिक सञ्जालबाट ।

‘पहिलेभन्दा कसैले मानेनन् । लकडाउन भनेको छ गाडी आएकै छन् । नाका खोल्ने कुरा चल्दै छ । दूरी कायम भएको छैन । कडा बन्द नभएसम्म कोरोनाको चेन ब्रेक हुँदैन’, उनी भन्छन्, ‘भिजिटर बिरामीलाई खान दिन आउँछन् । बिरामीबाट भिजिटरमा सर्छ । भिजिटर बजारमा जान्छन् । बजारका पसलमा पुग्छ । पसलबाट घरघरमा कोरोना पुग्छ । ब्रेक कसरी हुन्छ ?’

प्रकाशित मिति: शनिबार, वैशाख १८, २०७८ २०:४७