लुम्बिनी : कारबाहीविरुद्ध जसपाका पदमुक्त चार सांसद पुगे सर्वोच्च

फाइल तस्वीर

A+ A A-

जनता समाजवादी पार्टीको केन्द्रीय कार्यकारिणी समितिका २६ सदस्यको निर्णयले लुम्बिनी प्रदेशसभा सदस्यबाट पदमुक्त भएका जसपाका चार सांसद रिट दायर गर्न सर्वोच्च अदालत पुगेका छन् ।

६ वैशाखमा प्रदेशसभा सचिवालयमा मुख्यमन्त्री शंकर पोखरेलविरुद्ध अविश्वासको प्रस्तावमा हस्ताक्षर गरी सोही दिन ४ बजे मन्त्रीको सपथ खाएका जसपाका सांसद सन्तोषकुमार पाण्डे, विजयबहादुर यादव, सुमन शर्मा रायमाझी र कल्पना पाण्डे लम्साल पार्टीबाट फर्जी निर्णय भएको भन्दै कानुनी उपचारका लागि सर्वोच्च अदालतमा पुगेका हुन् ।

जसपा नेता पाण्डेले पार्टीको कार्यकारिणी समितिले फर्जी निर्णय गरेको र प्रदेशसभा सचिवालयले फर्जी निर्णयमा किर्ते गरेकाले रिट दायरका लागि सर्वोच्चमा पुगेको बताए । उनले फर्जी निर्णय गर्ने पार्टीका नेता र प्रदेशसभा सचिवालयलाई विपक्ष बनाएर दुईवटा मुद्दा दर्ता गर्न लागेको शिलापत्रलाई बताए । ‘हामीलाई निकाल्ने अधिकार छैन । अधिकारभन्दा बाहिर गएर हामीलाई कारबाही गरिएको छ । त्यसैले मुद्दा दर्ताका लागि काठमाडौं आएको हौँ,’ उनले भने ।

बिहीबार प्रदेशसभा सचिवालयले जसपाको संसदीय दलको निर्णयअनुसार चारै जना सांसदलाई पदमुक्त गरेको सूचना निकालेको थियो । जसपाका अर्का पदमुक्त भएका सांसद यादवले पनि पार्टीको केन्द्रीय कार्यकारिणी समितिको बैठक अहिलेसम्म नबसेकाले बताए । उनले बैठकको निर्णय भन्दै पदमुक्त गर्नु आपत्तिजनक रहेको बताए ।

चार सांसद पदमुक्त भएको सूचना आएसँगै जसपाका अध्यक्ष महन्त ठाकुरले प्रदेशसभा सचिवालयलाई पत्र पठाएर उनीहरूलाई पार्टीले कारबाही नगरेको बताएका छन् । त्यस्तै, यस विषयमा उनले निर्वाचन आयोगमा पनि ध्यानाकर्षण पत्र पठाएका छन् ।

जसपाका अध्यक्ष उपेन्द्र यादव र संघीय परिषद् अध्यक्ष डा. बाबुराम भट्टराई पक्षधरले बहुमत पुर्‍याएर सांसदलाई कारबाही गरिएको पत्र प्रदेशसभा सचिवालयमा दर्ता गराएका थिए ।

प्रकाशित मिति: शुक्रबार, वैशाख १७, २०७८ १५:१३