कोरोना कहर : फेरि हिँडेरै घर फर्किने दिन आए

A+ A A-

पर्साका नवीन साह घर फर्किन दुई दिनसम्म गौशाला बसपार्कमा झोला बोकेर पुगे । तर, गाडी चढ्न नसकेपछि उनी काठमाडाैंमै राेकिए । अन्ततः हिँडेरै धादिङसम्म जाने अठाेटसहित उनी बिहीबार बाटाे लागेका छन् ।

भोलि बिहानसम्म त जसरी भए पनि वीरगञ्ज पुग्ने याेजनासहित बिहानै जोरपार्टीबाट हिँडेका साह भन्छन्, ‘हिजो नै जाने भनेको थिएँ । गाडी चढ्न सकिनँ । के गर्नु, बाँच्न मुस्किल छ । सबै जना घरतिर लागेकाले म मात्र के खाएर बस्नु भनेर हिँडेको हुँ ।’

गत वर्ष पनि लकडाउनका बेला सात दिन हिँडेर उनी घर पुगेका थिए । यो पटक पनि एक दिन हिँड्नु पर्‍यो । धादिङबाट गाडी चल्ने आसले उनी पैदल यात्रा थालेका हुन् ।

गौशलाको फर्निचर उद्योगमा काम गर्दै आएका साह एक महिना निषेधाज्ञा हुने भन्ने सुनेर घर फर्किएको बताउँछन् । उनीसँगै अन्य चार–छ जना साथीहरू पनि छन् । सबै काठमाडौंमै रोजगारी गर्दै आएका थिए ।

यस्तै समस्यामा आफू पनि परेको सिन्धुलीमाडी हिँडेकी बबिता कार्की बताउँछिन् । साँगा नाकामा भेटिएकी उनी पद्मकन्या क्यापसमा बीआीएस दोस्रो वर्षमा अध्ययरत छिन् । उनी बनेपाबाट गाडी चढेर घर फर्किनेगरी हिँडेकी हुन् ।

‘बीबीएसको परीक्षा हुँदै थियो त्यो पनि रोकियो । ट्युसन केन्द्रमा काम गर्थें, निषेधाज्ञा हुँदा बन्द भयो’ उनले भनिन्, ‘काठमाडौंमा के गरेर बस्नु भनेर घर फर्किएको हुँ । निषेधाज्ञा छिटै खुले फर्किनुपर्ला । नत्र गत वर्षजस्तै सात महिना घरमा बस्ने हो ।’

कोरोनाले फेरि एक पटक हिँडेरै गाउँघर फर्किन बाध्य बनाएको उनी बताउँछिन् ।

यस्तै, श्रीमतीको उपचारका लागि काठमाडौं आएका काभ्रे नवबुद्धका रवि तामाङ बनेपासम्म हिँडेर जाँदै थिए । काठमाडौंको जडीबुटीमा भेटिएका तामाङले तीन बच्चासमेत डोर्‍याएर हिँडिरहेका थिए ।

‘हस्पिटलले बिहान मात्र डिस्चार्ज दियो । के गर्नु सर जसरी पनि घर जानुपर्‍यो । बनेपादेखि त गाडी चलिरहेको छ रे । त्यहाँसम्म हिँडेर जाने हो’ उनले भने, ‘बिहानदेखि गाडी पाइन्छ कि भन्ने आसमा सडकपेटीबाट हिँडिरहेका छौँ । एक्लै भए त हिँडेर घर पुगिन्थ्यो, साथमा बच्चा छन् । त्यही भएर समस्या भयो ।’

कोरोना भाइरस नियन्त्रण गर्न सरकारले निषेधाज्ञा जारी गरेको पहिलो दिन उपत्यका आसपासका जिल्लासम्म हिँडेर जाने सर्वसाधरण बाटोमा भेटिए । उनीहरूले उपत्यकासँग जोडिएका जिल्लासम्म पुगेर गाडी चढेर घर फर्किने बताएका छन् । नागढुंगा, साँगा र बल्खु हुँदै सर्वसाधारण घर फर्किंदै थिए ।

निषेधाज्ञामा सरकारी कार्यालय, औषधि, दूध, खाद्यान्न, पानी, तरकारी, बैंक तथा वित्तीय संस्था, सञ्चार र सूचना प्रविधिसँग सम्बन्धित सवारी साधन मात्र चलेको छन् । अन्य निजी तथा सार्वजनिक सवारी साधन चल्न निषेध गरिएकाले सडक सुनसान छ । विमानस्थल जाने यात्रु चढेका सवारी साधन भने चल्न दिइएको छ ।