तीन बैंकको नाफा तीन अर्बमाथि, तीनवटाले एक अर्ब पनि पुर्‍याउन सकेनन्

A+ A A-

पछिल्लो नौ महिनामा तीनवटा वाणिज्य बैंकले तीन अर्ब बढी नाफा कमाएका छन् । नौ महिनामा तीन अर्ब बढी नाफा कमाउनेमा नबिल, ग्लोबल आईएमई र एनआईसी एसिया बैंक रहेका छन् ।

२७ वाणिज्य बैंकहरूले ५० अर्ब ७४ करोड रुपैयाँ नाफा कमाउँदा यी तीन बैंकको नाफा योगदान २० प्रतिशत छ । नबिल बैंकले तीन अर्ब ६८ करोड नाफा कमाउँदा ग्लोबलले तीन अर्ब ५७ करोड पुर्‍याएको छ भने एनआईसी एसियाले तीन अर्ब रुपैयाँ नाफा गरेको छ ।

गत वर्षको नाफाको हिसाबले सबैभन्दा बढी वृद्धिदर कायम गर्न ग्लोबल सफल भएको छ । ग्लोबलले ३२ प्रतिशत बढाउँदा एनआईसीले २० र नबिलले १६ प्रतिशत नाफा बढाएका छन् ।

चालु आर्थिक वर्षको साउनदेखि पुससम्ममा सबैभन्दा बढी नाफा ग्लोबलले कमाएकोमा पछिल्लो तीन महिनामा नबिल बैंकले अत्यधिक नाफा बढाएको छ । पुसदेखि चैतसम्म नबिलले एक अर्ब ६७ करोड नाफा बढाउँदा ग्लोबलले एक अर्ब २६ करोड बढाएको छ ।

२७ मध्ये तीन २४ वटा बैंकको नाफा एक अर्बमाथि छ । तर, तीन बैंकले एक अर्ब पनि नाफा बढाउन सकेका छैनन् । एक अर्बतल नाफा रहेनेमा सञ्चुरी, सिभिल र नेपाल एसबीआई बैंक छन् ।

सेञ्चुरीले नौ महिनामा जम्मा ३५ करोड रुपैयाँ नाफा कमाएको छ भने सिभिलले ५० करोड र नेपाल एसबीआईले ८७ करोड पुर्‍याएको छ ।

गत वर्षको तुलनामा एसबीआईको नाफामा ६० प्रतिशतले घटेको छ भने सेञ्चुरीको ३९ प्रतिशतले गिरावट आएको छ । त्यस्तै, सिभिलको भने ३९ प्रतिशतले नाफा बढेको छ ।

अघिल्लो त्रैमाससम्म (साउनदेखि पुससम्म) बैंकहरूको नाफा तीन प्रतिशतभन्दा कम रहेकोमा पछिल्लो त्रैमासमा १३ प्रतिशतभन्दा धेरै कमाउन सफल भएका छन् ।

कसले कति कमाए

गत वर्षभन्दा बैंकहरूको ब्याजदर न्यून रहे पनि शेयर कारोबार बढेको र पहिलेको कर्जा उठेका कारण नाफा बढी भएको बैंकरहरूले बताएका छन् । कर्जा लागनीका हिसाबले भने चालु वर्षको नाफा न्यून रहेको बैंकर संघका अध्यक्ष भुवन दाहाल बताउँछन् ।