भाेकभाेकै अस्पताल चहार्दैछन् काेराेना संक्रमित, तर बेड पाउन मुस्किल

A+ A A-

मंगलबार दिउँसो ३ बजेतिर बाँके कोहलपुरबाट आइपुगेको एम्बुलेन्स टेकु प्राङ्गणमा टक्क रोकियो । कपाल फुलेका, सेताे दौरा सुरुवाल लगाएका एक पाका व्यक्ति एम्बुलेन्सबाट ओर्लिए । गह्रुँगाे पाइला अनि थकित अनुहार, ६० वर्षीय सत्यराज उपाध्याय मलिन देखिन्थे । उनी २० घण्टा लामो यात्रा गरेर टेकु आइपुगेका थिए ।

कोभिड संक्रमित श्रीमतीलाई एम्बुलेन्समा राखी टिकापुरबाट टेकु आएका सत्यराज उपाध्याय ।

ओर्लिएर एम्बुलेन्सको पीठतिरको ढोका उघार्दै उनले भित्र अक्सिजन लिँदै गरेकी बिरामी श्रीमतीलाई हेरे, जो कोराेना संक्रमणले ग्रस्त भएको खबर बाटोमा आउँदाआउँदै टिकापुर अस्पतालबाट आइपुगेको थियो । सोमबार राति ७ बजे टिकापुरदेखि कोहलपुरसम्म एउटा एम्बुलेन्समा अनि कोहलपुरबाट काठमाडौंसम्म अर्को एम्बुलेन्समा श्रीमतीलाई लिएर उपाध्याय टेकु आएका हुन् ।

हप्ता/दस दिनअघि सत्यराजकी श्रीमतीलाई ज्वरो आउने र रुघा लाग्ने समस्या देखिएपछि टिकापुरकै अस्पतालमा भर्ना गरियो । अस्पतालले फोक्सोमा कालो धब्बा देखिनुका साथै संक्रमण भएको बतायो । यत्तिकैमा उनलाई सास फेर्न गाह्रो हुन थाल्यो । अक्सिजन पूर्ति गर्न जिल्लामा सम्भव नहुने जवाफ अस्पतालले दिएपछि राति नै श्रीमती लिएर उपाध्याय काठमाडौंका लागि निस्किए ।

विभिन्न अस्पताल चहार्दै टिकापुरबाट टेकु आइपुगेकी ५४ वर्षीया महिला ।

फोनमा खोजखबर गर्दै कोहलपुरबाट आउँदा सत्यराजले अल्का अस्पतालमा एउटा बेड पाइने जानकारी पाए । तर, बाटोमा ढिला भएकाले २ घण्टा कुर्दा पनि अल्कामा बेड मिलेन ।

केही सीप नलागेपछि उपाध्याय दम्पती फोन घुमाउँदाघुमाउँदै अन्ततः बेड पाइने आसमा टेकु आइपुगेका हुन् । एम्बुलेन्स चालक रामकुमार चौधरी भन्छन्, ‘हिजोदेखि खाना पनि नखाईकन, अस्पताल चहार्दाचहार्दै समय बित्यो ।’

तनावमा संक्रमितका आफन्त ।

नभन्दै बेलुका अबेर उनीहरूले बल्लबल्ल बेड पाए ।

जिल्लाबाट मात्रै होइन, उपत्यकाभित्रै पनि संक्रमितहरू यतिखेर अस्पताल चहार्न बाध्य छन् । तिनैमध्ये एक हुन्, कुमारीगलका ७४ वर्षीय संक्रमित । उनकी ७० वर्षीया श्रीमती विजया अधिकारी भन्छिन्, ‘सुगरको बिरामी हुनुहुन्छ । हिजो मेडिकेयर भर्ना गरेको । साँझपख कोरोना पोजिटिभ भनेर बिहान टेुक अस्पताल ल्याइपुर्‍यायौँ । दिउँसो ४ बजे मात्रै बेड पाइयो ।’

आईसीयू बेडका लागि टेकुको इमर्जेन्सी वार्डमा पालो कुर्दै विजय अधिकारी ।

संक्रमित अधिकारीलाई सास फेर्न गाह्रो भएकाले अहिले उनलाई टेकु अस्पतालमा अक्सिजनका दुईवटा सिलिन्डर दिएर राखिएको छ । विजया भन्छिन्, ‘कहाँबाट यो दुष्ट रोग आयो नि हे भगवान् ! जे भए पनि अब त भगवान् भरोसा नै हो ।’

त्यस्तै, शुक्रराज ट्रपिकल तथा सरुवा रोग अस्पताल टेकुमा २८ दिनदेखि भक्तपुरकी ३६ वर्षीया महिला उपचाररत छिन् । उनका १७ र २० वर्षीया छोरी पनि संक्रमित नै हुन् ।

३६ वर्षीया ती महिलालाई टेकु अस्पतालबाहिर वार्डमा उनकी आमा तारादेवी खत्री कुरिरहेकी छिन् ।