विदेशी भूमिमा कोरोनाको त्रास : कतिबेला बेरोजगार भइन्छ थाहा छैन, घर फर्कन समस्या छ

विदेशी भूमिमा कोरोनाको त्रास : कतिबेला बेरोजगार भइन्छ थाहा छैन, घर फर्कन समस्या छ

A+ A A-

दिल्लीमा अटो मोटर कम्पनीमा कार्यरत झापा वितामोडका सागर सापकोटा कोरोना भाइरसको दोस्रो लहर फैलिएसँगै घर फर्किन बाध्य भए ।

अघिल्लो साता नै कम्पनीले कोरोना भाइरसको संक्रमण फैलिएको भन्दै कार्यालय बन्द हुने सूचना दियो । कम्पनीको होस्टेलमा बस्दै आएका सापकोटा कार्यालय बन्द भएपछि बिचल्लीमा परेर बस्नुभन्दा घर फर्किन बाध्य भए ।

कम्पनीले होस्टल पनि बन्द गरेपछि घर फर्कन बाध्य भएको उनी बताउँछन् । ‘कम्पनी बन्द भएपछि जसोतसो दिल्लीबाट सुनौली नाका हुँदै नेपाल फर्किए,' उनले भने, 'घर फर्कदा बाटोमा धेरै समस्या भयो । कम्पनीले विदेशी कामदारलाई वस्ता गदैन ।’ कामसँग मात्र मतलब राख्ने कम्पनीले महामारीमा सुरक्षित राख्न नसकेको उनी बताउँछन् ।

यस्तै, यूएईमा सुरक्षा गार्डमा कार्यरत धनकुटाका लक्ष्मी राई कोरोना भाइरसका कारण कम्पनीले कामदार कोटा कटौती गरेपछि स्वदेश फर्किन बाध्य भए । राईलाई कम्पनीले कोरोना भाइरसको समस्या देखाउँदै स्वदेश पठायो ।

डिउटीमै रहेका बेला घर फर्कन तयार हुनु भनेर कम्पनीले मोबाइलमा म्यासेज पठाएको उनी बताउँछन् । कम्पनीले कोरोनाका कारण विदेशी कामदारको कोटा कटौती गर्दा उनी पनि परे ।

‘विदेशको रोजगारी जति बेला जा भन्छ झोला बोकेर हिँड्नुपर्छ । कम्पनीले महामारीमा विदेशी कामदारलाई वाहाना बनाएर घर पठाउँछ,’ उनले भने, ‘कोरोनाका कारण ७ वर्ष काम गरेको बोनस पनी पाइँन । तबलविन होस्टेलमा बस्नुपर्छ भनेपछि घर फर्किएँ ।’

कोरोनाका कारण रोजगारी गुमाएका धेरै नेपाली स्वदेश फर्किने तयारीमा रहेको राईले बताए ।

गत वर्षको कोरोना भाइरसका कारण वैदेशिक रोजगारीमा कार्यरत ४ लाख नेपाली रोजगारी गुमाएर चार्टर उडानमार्फत स्वदेश फर्किएका थिए ।

मलेसिया, कतार, यूएई साउदी, जापान, कोरिया, बहराइन, कुवेत, ओमानलगायतका देशमा कार्यरत नेपालीहरू कति बेला स्वदेश फर्किनुपर्ने हो भन्ने त्रासमा छन् ।

कोरोना भाइरसको संक्रमण रहेका देशमा करिब ४५ लाखभन्दा धेरै नेपाली कार्यरत रहेको सरकारी अनुमान छ ।

रोजगारीका लागि भारत पुगेका धेरै नेपाली कामदार कोरोना महामारीको मारमा परेका छन् । भारतमा कोरोना भाइरसको दोस्रो लहर फैलिएसँगै स्वदेश फर्किने नेपाली श्रमिकको सीमानामा लर्को नै लागेको थियो ।

भारतमा यति कामदार छन् भन्ने सरकारी तथ्यांक छैन । तर, भारतमा करिब ९ देखि ११ लाख नेपाली रोजगारीमा कार्यरत रहेको सरकारी अनुमान छ ।

भारतको नयाँ दिल्लीमा १६ र अन्य क्षेत्रमा १० गरी २६ जना नेपालीको कोरोना संक्रमणका कारण मृत्यु भएको अल इन्डिया इन्टिच्युट अफ मेडिकल साइन्समा कार्यरत डा. सागर पौडेलले फेसबुकमा स्टाटस लखेका छन् ।

यस्तै, कुवेतमा दुई जना र कतारमा एक जना नेपालीको कोरोना भाइरसका कारण मृत्यु भएको गैरआवासीय नेपाली संघअन्तर्गतको स्वास्थ्य समितिले जनाएको छ ।

प्रकाशित मिति: शुक्रबार, जेठ १४, २०७८ ०९:१५