प्रदेश २ : भारतीय सीमामा निर्वाध आउजाउ, न रेकर्ड राखिन्छ, न स्वास्थ्य परीक्षण हुन्छ

प्रदेश २ : भारतीय सीमामा निर्वाध आउजाउ, न रेकर्ड राखिन्छ, न स्वास्थ्य परीक्षण हुन्छ

धनुषाको जटही नाकाबाट सीमा वारपार गरिरहेका सर्वसाधारण ।

A+ A A-

धनुषाको नगराइन नगरपालिकास्थित जटही नाकामा भारततर्फ आउजाउ गर्नेहरूको लर्को छ ।

सीमामा रहेको जमुनी खोलाको पुल नहुँदा छेउकै खेतको बाटो प्रयोग गरी दिनभर हजारौँ मानिस निर्वाध रूपमै ओहोरदोहोर गर्दै छन् । कसैले टाउकोमा ठूला-ठूला पोका बोकेका छन् भने केहीले हातमा सामान भरिएको झोला झुन्ड्याएका छन् ।

सीमा पार हुने बाटो नहुँदा बिहेबारीका सामान पनि मानिसले बोकेरै सीमा वारपार गरिरहेका छन् । भन्सार कार्यालयको उत्तरतिरको बाटो बन्द गरी हेल्थ डेस्क राखिएको दक्षिणको बाटो प्रयोग गर्ने सहमति भए पनि सर्वसाधारणले मानेका छैनन् ।

सो बाटो प्रयोग गर्न नदिन दुई ठाउँमा माटो काटेर अग्लो ढिस्को बनाइएको छ । तर, अप्ठ्यारो भए पनि त्यहीँबाट पैदल, साइकल र मोटरसाइकलबाट आवतजावत भइरहेको छ ।

धनुषाको जटही नाकाबाट सीमा वारपार गरिरहेका सर्वसाधारण ।

ज्वरो नाप्न थर्मोमिटर र स्यानिटाइजरसहित नगराइन नगरपालिकाले हेल्थ डेस्क राखेको छ । तर, स्वास्थ्यकर्मीले स्वास्थ्य जाँच गरिरहेका छैनन् । सशस्त्र प्रहरी सुरक्षार्थ सीमामा खटिएका छन् । तर, दुवैतर्फका मानिस बिनास्वास्थ्य जाँच आउजाउ गरिरहेको देखिन्छ । प्रहरीले पनि कुनै रोकटोक गरेको देखिँदैन ।

जटही नाकामा संक्रमणको बेला सीमा वारपार गर्नेको तथ्यांक छैन । दशगजामा रहेको पिलरकै छेउमा भारतीय प्रहरीले पहरा दिइरहेको छ । तर, भारततिर पनि स्वास्थ्य जाँच भइरहेको छैन ।

स्वास्थ्य जाँचका लागि एक जना कर्मचारी ८ घण्टा खट्ने गरी सीमामा नगरपालिकाले स्वास्थ्यकर्मी खटाएको नगराइन नगरपालिकाका प्रमुख प्रशासकीय अधिकृत राजकुमार केसीले बताए ।

सीमामा पुल निर्माणाधीन रहेकाले गोरेटो बाटो प्रयोग गर्दै सर्वसाधारण ।

केसीका अनुसार आलोपालो गरी त्यहाँ एक सिफ्टमा दुई जना कर्मचारी खटाइएको छ । तर, खटिएका कर्मचारीले आउजाउ गर्नेको स्वास्थ्य परीक्षणमा वास्ता गरेका छैनन् ।

जिल्ला प्रशासन कार्यालय धनुषाले हेल्थ डेस्कमा भारतबाट आउनेको एन्टिजेन विधिबाट जाँच गर्न सामग्री उपलब्ध गराउने आश्वासन दिए पनि हालसम्म उपलब्ध नभएको केसीको भनाइ छ ।

जटही नाकामा मात्र होइन, प्रदेश २ का पर्साबाहेक अधिकांश जिल्लाका सीमामा यस्तै हेलचेक्र्याइँ छ । पर्साबाहेकका जिल्लाका अधिकांश नाकामा न भारतबाट आउनेको स्वास्थ्य परीक्षण भएको छ, न रेकर्ड नै राखिएको छ ।

स्वास्थ्य जाँच गर्ने काम स्वास्थ्यकर्मीको भएको तर उनीहरू नाकामा बस्नै नमानेको सशस्त्र प्रहरी प्रदेश २ का प्रमुख डीआईजी चन्द्रप्रकाश गौतमले बताए । ‘नाकाबाट आउनेलाई एन्टिजेन जाँच गर्ने भनिएको छ । थर्मल गनले पहिला चेक गर्ने ज्वरो वा शंका लागे एन्टिजेन गर्ने र रिपोर्ट नआएसम्म होल्डिङ सेन्टरमा राख्ने नीति लागू गरिएको छ,' उनले भने, ‘प्रहरीले स्वास्थ्य जाँच्ने त होइन । सबै निकायले आ–आफ्नो भूमिका निर्वाह गर्नुपर्छ । नत्र स्थिति भयावह हुनेछ ।'

संक्रमण बढेपछि प्रदेशका आठवटै जिल्लाका मूल नाकामा कडाइ गरिएको गौतमको दाबी छ ।

सीमामा सतर्कता नअपनाई यस्तै लापर्बाही गरिरहे अवस्था भारतजस्तै भयावह हुने जनस्वास्थ्य विज्ञले चेतावनी दिएका छन् । तर, सरकोकारवाला निकायको ध्यान पुगेको देखिँदैन ।

प्रकाशित मिति: बुधबार, वैशाख १५, २०७८ ०९:०४