कोरोना महामारीमा यातायात व्यवसायीको कालोबजारी : ट्राफिक भन्छ- भित्रभित्रै मिलाएर जान्छन् त के गर्नु ?

कोरोना महामारीमा यातायात व्यवसायीको कालोबजारी : ट्राफिक भन्छ- भित्रभित्रै मिलाएर जान्छन् त के गर्नु ?

A+ A A-

‘सिट छैन !’

मंगलबार उपत्यकाबाट बाहिरिन चाहने अधिकांश यात्रुले टिकट काउन्टरबाट पाएको जवाफ हो यो । कि त धेरै पैसा हुनुपर्‍यो, कि त पहुँच । नभए टिकट पाउन मुस्किल थियो ।

उपत्यकाका तीनवटै जिल्ला प्रशासन कार्यालयले बीहीबारदेखि निषेधाज्ञा लगाउने निर्णय गरेसँगै उपत्यका छोडेर बाहिरिनेको संख्या बढ्यो । त्यसको नाजायज फाइदा उठाउँदै छन्, यातयात व्यवसायी ।

‘उता बहिनीको बिहे छ । भोलि नपुगी भाको छैन,’ गौर जाने तयारीमा नयाँ बसपार्क पुगेका मदन शर्माले भने । टिकट नपाएर उनी छटपटिएका थिए ।

एकैछिन हराएर पुन: भेटिएका मदन एकाएक खुसी देखिए । उनले टिकटको व्यवस्था गरिसकेका रहेछन् ।

नयाँ बसपार्कमा घर फर्कन चाहनेहरू ।

‘सुरुमा त टिकट छैन भन्थ्यो,' मदनले भने, 'पछि १५ सय रुपैयाँ दिन्छु भनेपछि बल्ल पाइयो ।’ टिकट लिन भने उनलाई कलंकी बोलाइएको रहेछ । अन्य समयमा ६ सय ५० रुपैयाँ तिरेर जाने गरेको उनले बताए ।

‘अनि उजुरी गर्नुभएन ?’

‘उजुरी गरेर के गर्ने, आफूलाई नपुगी भाको छैन,’ मदन शंका गर्छन्, ‘त्यही पनि ट्राफिकले चाहिँ के गर्छ र ? उनीहरू भित्रभित्रै मिलेका हुन्छन् । पिल्सिने त हामी नै हौँ नि ।’

त्यसपछि हामी अन्य यात्रुको अवस्था बुझ्न लाग्यौँ । अपवादबाहेक सहजै टिकट पाउने यात्रु भेटिएनन् ।

टीकाराम (नाम परिवर्तन) ले पनि घर फर्कने टिकट काटिसकेका छन् । उनलाई बिहान ८ बजे गाडी लाग्छ भनेर बोलाइयो । १२ बज्दासम्म गाडी हिँडेन । पछि काउन्टर सञ्चालकसँग कुरा गर्दा सो टिकट आफूले नकाटेको भन्दै पन्छिन खोजेको उनी बताउँछन् ।

घर फर्कने क्रममा सामान मिलाउँदै यात्रुहरू ।

‘हामी जाने भनेको गाडी हिँडिसक्यो अहिले बहाना पार्छ,’ टीकाराम आक्रोशित भए, ‘पैसाका लागि हामीलाई बर्बाद पार्‍यो ।’

उनको टिकटमा रकमसमेत उल्लेख गरिएको थिएन । मनपरी भाडा असुल्ने यातायात व्यवसायीको नियत यहीँबाट प्रस्ट हुन्छ । उनले महोत्तरीको बर्दिबाससम्मका लागि मात्र १२ सय रुपैयाँ तिरिसकेका रहेछन् । पहिला ७ सय भाडा तिर्ने गरेको उनी बताउँछन् ।

त्यसपछि हामीले यात्रु बनेर नयाँ बसपार्कका काउन्टर चहार्‍यौँ । तर, टिकट छ भन्ने जवाफ कतै पाइएन । जनकपुरका लागि प्रतिटिकट १४ सय रुपैयाँ दिने भनेपछि टिकट बेच्न राजी देखिए, काबेली मिथिला यातायातका सुमन ।

‘भरेतिर मलाई कल गर्नु, तपाईंलाई मिल्छ,’ आफ्नो परिचय कार्ड दिँदै उनले इशारा गरे ।

त्यस्तै, सिन्धुलीका लागि १२ सय रुपैयाँ भाडा मागे, काउन्टर सञ्चालकले । यसअघि ६ सयमा सिन्धुलीको टिकट पाइन्थ्यो ।

यातायात व्यवसायी राष्ट्रिय महासंघका महासचिव सरोज सिटौला त्यस्तो कालोबजारी नदेखिएको तर्क गर्छन् । अचानक बाहिरिनेको संख्या बढेकाले व्यवस्थापनमा केही कमजोरी भएको हुन सक्ने उनले बताए । 'तर, हामीले त्यस्तो भएको भेटेका छैनौँ,' सिटौलाले भने, 'यदि त्यसरी मनलाग्दी भाडा असुली भएको भेटिए कारबाही हुनुपर्छ ।'

महानगरीय ट्राफिक प्रहरी महाशाखाका प्रवक्ता श्यामकृष्ण अधिकारी बढी भाडा लिएको विषयमा हालसम्म यात्रुहरूको गुनासो नआएको दाबी गर्छन् । ‘अहिलेसम्म कसैले उजुरी गरेको छैन । उजुरी आए कारबाही गर्छौँ,’ उनले भने, ‘अब भित्रभित्रै मिलाएर जान्छन्, उजुरी गर्दैनन् भने त के गर्न सकिन्छ र ?’

उपत्यकाका हरेक बसपार्कमा ट्राफिक प्रहरीले डेस्क राखेर अनुगमन गरिरहेको बताइएको छ । तर, व्यवहारमा त्यो पाइँदैन ।

तस्वीर : सुशील श्रेष्ठ/शिलापत्र

प्रकाशित मिति: बुधबार, वैशाख १५, २०७८ १२:४७