कोरोना कहरमा घर फर्किएकाहरू भन्छन्- शहर त पैसा हुन्जेल सम्मका लागि मात्रै रहेछ

कोरोना कहरमा घर फर्किएकाहरू भन्छन्- शहर त पैसा हुन्जेल सम्मका लागि मात्रै रहेछ

A+ A A-

धरानका राजेन्द्र गौतम काठमाडौंको एक क्लब रेस्टुरामा वेटरको काम गर्थे । गौतम कार्यरत क्लब कोरोना भाइरसको दोस्रो लहर फैलिएसँगै गत सातादेखि बन्द भयो । शंकरदेव क्याम्पसमा डिग्रीमा अध्ययनरत उनी कोरोनाका कारण रोजगारी र पढाइ नभएपछि घर फर्कन बाध्य भए ।

कोटेश्वरमा भेटिएका गौतमले बेरोजगार भएपछि खेतिपाती गर्न परिवारलाई सघाउनुपर्‍यो भनेर घर हिँडेको बताए । ‘शहरमा घर छैन । दिन गन्ती भाडा तिर्नुपर्छ । कोरोनाले रोजगारी गुमेपछि भाडा तिर्ने पैसा हुँदैन,’ उनले भने, ‘घरमा बा–आमालाई बर्खे धान र मकै थन्काउन सघाउनुपर्‍यो भनेर गाँउ फर्किएको हुँ । शहर त पैसा हुन्जेल सम्मको लागि मात्र रहेछ ।’

रोजगारीका अवसरको खोजी र अध्ययनका लागि बाध्य भएर काठमाडौं आउनु परेको उनको भनाइ छ ।

नयाँ बसपार्कमा झोला बोकेर घर फर्किन बस कुरीरहेकी गुल्मीकी सविना भण्डारीको समस्या पनि उस्तै छ । लोकसेवा पढ्दै भक्तपुरको एक नीजि बोर्डिङमा पढाउने भण्डारी पनि कोरोना जोखिमबाट बच्न घर फर्किएको बताउँछिन् ।

शहरसँग साइनो भनेको बस्दा ओत लाग्ने र समस्या पर्दा भाग्ने मात्र भएको भण्डारीले बताइन् । ‘यस्तो बेला यो शहर अनौठो र डरलाग्दो छ । कोरोना लाग्यो भने विचरा भन्ने कोही छैन । फेरी उपचार गर्न समेत समस्या छ रे,’ उनले भनिन्, ‘गाँउमा त विचरा बिरामी छे भनेर हेरविचार त हुन्छ । परिवार साथमा हुन्छन् । परिवारसँग भएपछि मनोबल बढ्छ । रोगसँग लड्ने क्षमता पनि बढ्छ ।’

गाँउ–घरमा बस्ती पातलो भएकाले कोरोना सर्ने सम्भावना पनि कम हुने उनको बुझाइ छ । शहरमा सुविधा खोज्न आउँदा धेरै समस्या र दुःख भोगेर हिडनुपर्ने बाध्यता रहेको उनको भनाइ छ ।

कारोना भाइरस संक्रमणको दोस्रो लहर सुरु भएसँगै उपत्यकामा बिहीबारदेखि निषेधाज्ञा लाग्ने भएको छ । जसका कारण उपत्यका छाड्नेहरूको भीड छ ।

नयाँ बसपार्क, कोटेश्वर, कलंकी, बालाजुलगायतका स्थानमा मंगलबार बिहानैबाट घर फर्किने सर्वसाधारणको भीड छ । यी स्थानका टिकट काउन्टरमा घर फर्किन चाहनेहरू लाइनमा बसेका छन् ।

कोरोना भाइरस फैलिएसँगै सर्वसाधारण उपत्यका मात्र होइन देशका अन्य मुख्य शहरमा झोला बोकेर गन्तव्यतिर गइरहेका देखिन्छन् । कतिपय दुधे बच्चा काखमा राखेर घर फर्किन गाडी कुरीरहेका भेटिन्छन् ।

सार्वजनिक यातायातमा सिट क्षमताभन्दा बढी यात्रु नराख्ने, यात्रुले अनिवार्य मास्क लगाउनुपर्ने, स्वास्थ्य मापदण्ड पालना गर्दै स्यानिटाइजरको व्यवस्था गर्नुपर्ने स्वास्थ्य मापदण्ड सरकारले तोकेको छ ।

सार्वजनिक यातायात चढ्ने धेरैले स्वास्थ्य मापदण्ड पालना गर्ने र केही व्यक्तिले लापरबाही गर्दा यात्रुमा कोरोना संक्रमण सर्ने जोखिम छ ।

गाडीमा चढ्न यात्रुको तँछाड मछाँड नै छ । सामाजिक दूरी कायम भएको छैन । बसपार्कहरूमा प्रतिक्षा गरिरहेकाहरूले कोरोना सर्ने जोखिमलाई बेवास्ता गरिरहेको देखिन्छ ।

सर्वसाधारण, सवारी चालक र सहचालकलाई अनिवार्य मास्क लगाउन तथा सेनिटाइजर प्रयोग गर्न लगाएको ट्राफिक प्रहरी महाशाखा, रामशाहपथका प्रमुख एसएसपी जनकराज भट्टराईले जानकारी दिए ।

ट्राफिक प्रहरीले शहरमा मास्क नलगाई यात्रा गर्ने सवसाधारणलाई सचेत र कारबाही समेत गरिररहेको महाशाखा प्रमुख भट्टराईले बताए । एकै पटक ठूलो संख्यामा सर्वसाधारण घर फर्किएका कारण कतै लाहपरबाही हुन सक्ने उनको भनाइ छ ।

आइतबारदेखि बुधबार विहानसम्म करिब ३ लाख सर्वसाधारण उपत्यकाबाट बाहिरिएको महाशाखाले जनाएको छ ।

प्रकाशित मिति: बुधबार, वैशाख १५, २०७८ ०७:१२