वैदेशिक रोजगारी : कोरोनाको त्रासभन्दा ठूलो चिन्ता- एजेन्टले खाएको पैसा कसरी उठाउने ?

वैदेशिक रोजगारी : कोरोनाको त्रासभन्दा ठूलो चिन्ता- एजेन्टले खाएको पैसा कसरी उठाउने ?

A+ A A-

धादिङका रमेश कार्कीलाई कोरोना भाइरस सर्ने डरभन्दा वैदेशिक रोजगारीमा ठगिएको पैसा कसरी उठाउने भन्ने चिन्ता बढी छ ।

कार्कीलगायत अन्जिल थापा तथा सन्दिप पौडेललाई वैदेशिक रोजगारीका लागि क्रोएसिया पठाइदिने भनेर अमृतकुमार नेपालीले साढे १७ लाख रुपैयाँ लिएका थिए । तर, उनीहरू पाँच महिनासम्म पनि क्रोएसिया गएनन् । राहदानी र पैसा लिएका नेपाली उनीहरूको सम्पर्कमा आएका छैनन् । उनीहरूलाई नेपालीको स्थायी ठेगाना पनि थाहा छैन ।

क्रोएसिया पठाइदिन्छु भनी पैसा र राहदानी लगेका नेपाली सम्पर्कमा नआएपछि उनीहरू वैदेशिक रोजगार विभागमा उजुरी गर्न आएका छन् ।

सोमबार विभागमा भेटिएका कार्कीले देशभित्र रोजगारी नपाएर विदेश जान खोज्दा आफूहरू ठगिएको गुनासो गरे ।

‘वैदेशिक रोजगारीको चक्करमा पैसा र राहदानी एजेन्टले लिएर भाग्यो । कोरोना महामारीभन्दा ठूलो चिन्ता पैसा कसरी उठाउने भन्ने हो,’ कार्कीले भने ‘विदेश जाने चक्करमा घरबार नै जाने भयो । फेरि कसरी जोडनु ?’

तीन वर्ष यूएईमा काम गरेर फर्केका कार्की पैसा फिर्ता नभए परिवारको समेत विचल्ली हुने गुनासो गर्छन् ।

नेपालीले कार्कीको मात्र होइन, क्रोएसिया पठाइदिने भनी इटहरीका गणेश आचार्यको ६० हजार र नेपालगञ्जका गोपालप्रसाद पन्थीको २ लाख लिएर भागेको पीडितको गुनासो छ । नेपालीको नाममा ठगीको उजुरी गर्न पन्थी र आचार्य पनि विभाग आएका छन् ।

आफूलाई बेल्जियम पठाउने भनेर अनिल परियारले १ लाख १० हजार रुपैयाँ लिए काभ्रेका भारती तामाङले बताए । ४ महिनासम्म पनि बेल्जियम नपठाएपछि परियारका नाममा ठगीको उजुरी गर्न आएको तामाङ बताउँछन् । ‘विदेश जाने लैह–लैहमा घरबार नै घुम्न भयो’ उनले भने, ‘एकतिर कोरोनाकै कारण रोजगारी गुम्यो । अर्कोतिर विदेश जाने भनेर काढेको ऋण एजेन्टले खाएर भाग्यो ।’

तामाङ साउदीमा राम्रै कम्पनीमा काम गरिरहेको थिए । कोरोना कारण कम्पनीले घर पठाएपछि बेरोजगारी हुनुपरेको उनको भनाइ छ ।

यसैगरी, रोजगारीमा क्यानडा पठाइदिने भनेर सम्सुर आलमले ७ लाख रुपैयाँ लिएको इलामका श्रीहाङ एकतिन बताउँछन् । तर, चार महिनासम्म पनि आलमले क्यानडा नपठाएपछि उनी पनि विभागमा ठगीको उजुरी गर्न पुगेका छन् । यसअघि कतारमा काम गर्दै आएका एकतिन कोरोना कारण कम्पनीले कोटा कटौती गर्दा आफ्नो रोजगारी गुमेर स्वदेश फर्किएको बताउँछन् ।

‘कोरोनाका कारण रोजगारी गुम्यो । फेरि विदेशिन खोज्दा एजेन्टले पैसा खाइदियो । काम नगरी परिवार पाल्न सक्ने अवस्था छैन,’ एकतिन भन्छन्, ‘वैदेशिक रोजगारीमा जान खोज्दा पाइलापिच्छे ठग्ने भेटिन्छन् । बेरोजगारलाई जता गए नि गाह्रो छ ।’

रोजगारीका नाममा ठगिएका पीडित धेरै प्रकारको समस्या लिएर आउने गरेको वैदेशिक रोजगार विभागका सूचना अधिकारी महेन्द्रनाथ भट्टराईले जानकारी दिए । रोजगारीका नाममा ठगी गर्न एजेन्टले आफ्नो परिचय लुकाउने गरेको पाइन्छ । पीडितलेसमेत रोजगारीको प्रलोभन देखाएपछि केही प्रमाणबिनै पैसा दिने गरेको विभागका सूचना अधिकारी भट्टराईले बताए ।

‘वैदेशिक रोजगारीमा जान पाइने भनेपछि केही नबुझी पैसा दिने समस्या देखिएको छ । यसरी पैसा उठाउने कतिपय एजेन्टलाई विदेशका बारेमा राम्रो थाहा समेत हुँदैन,’ भट्टराईले भने, ‘विभागले रोजगारीका नाममा ठगिएका पीडितलाई सकेसम्म प्रमाणका आधारमा क्षतिपूर्ति भराउँदै आएको छ । रोजगारीका नाममा आर्थिक ठगी गर्दै आएका एजेन्टलाई समेत वैदेशिक रोजगार ऐनअनुसार कारबाही भइरहेको छ ।’

प्रमाणबिना नै नगद दिने गरेकाले दोषीलाई कारबाही गर्न समस्या भएको भट्टराई बताउँछन् । ‘एजेन्टलाई प्रमाणबिन नै नगद दिने गरेको छ । जसका कारण दोषीलाई कारबाही गर्न समस्या भइरहेको छ ।’

कोरोना भाइरसको महामारीमा पनि एजेन्ट र म्यानपावर कम्पनीले ठगी गरेको उजुरी लिएर दैनिक ४० जनाभन्दा धेरै पीडित आउने गरेको विभागले जनाएको छ ।

प्रकाशित मिति: मंगलबार, वैशाख १४, २०७८ ०७:०७