विरहा संस्कृतिमा रमाउँदै पर्यटक

A+ A A-

बुद्ध पूर्णिमाका अवसरमा शनिबार दिनभरि बुद्ध जन्मस्थल लुम्बिनीमा धार्मिक मेला लाग्यो। २५६३औं बुद्ध जयन्तीका अवसरमा शुक्रबारदेखि लुम्बिनीग्राममा जम्मा भएका तिर्थालुले बिहानैदेखि मायादेवी मन्दिर दर्शन गरे।

सोही अवसरमा बिहान निस्केको शान्ति पदयात्रामा थरीथरीका समुदाय सहभागी भए। त्यही हुलमा एउटा सांगीतिक समूह पनि थियो, लुम्बिनी सांस्कृतिक विरहा समूह। यो समाचार लुम्बिनीबाट अमृत भादगाउँलेले लेखेका हुन् ।

समूहले बुद्धको जन्म र जीवनीसम्बन्धी गीत गाउँदै लुम्बिनीग्राम परिक्रमा गरेको थियो। समूहका १२ सदस्यले फर्सा, ढोल, मझिरा, चङ, हार्मोनियम, माइक, घुँगरु र डफला बाजाको तालमा गीत गाए, नाचे र बुद्धको दर्शन गर्न आएकाहरूलाई मनोरञ्जन दिलाए। खासमा लुम्बिनी सांस्कृतिक नगरपालिका–१० महलिवारको समूह रामायण र महाभारतका कथा गाउने समूह हो।

यसले पछिल्लो एक दशकदेखि बुद्धसम्बन्धी कथा पनि गाउँदै आएको छ। ‘परम्परागत रूपमा हामी रामायण, महाभारत र इतिहासका कथा गाउँदै आएका थियौं,’ समूहका अध्यक्ष राधेश्याम पाल भन्छन्, ‘पहिला–पहिला विरहका गीत मात्रै गाइन्थ्यो। अचेल रमाइला गीत पनि गाउँछौं।’

पर्यटकीय क्षेत्र लुम्बिनीनजिकै बसोबास गर्ने कलाकार भएकाले कलाबाट आम्दानी लिन पछिल्लो समय उनीहरूले बुद्धको जीवनीसम्बन्धी गीत गाउन थालेका हुन्। त्यसैले १० वर्षअघि समूहमा संगठित भएर उनीहरूले संस्कृति प्रदर्शन गर्दै आएका छन्।

गाउँघरमा रातभर परम्परागत रूपमा नाचगान गरिन्छ भने पर्यटकलाई उनीहरू आधा घन्टादेखि एक घन्टासम्म नाच देखाउँछन्। विशेषतः विवाह, व्रतबन्ध जस्ता शुभकार्यमा उनीहरू विरहा गाउँछन्। पर्यटकलाई भने मागअनुसार हरपल देखाउँछन्। उनीहरू आधा घन्टाजति परम्परागत फुरुवादी नाच नाच्छन्।

प्रकाशित मिति: आइतबार, जेठ ५, २०७६ १६:५५