माधव नेपालको आरोप- केपी ओलीको दम्भले नवनिर्मित धरहराको उकालो चढ्दै छ

A+ A A-

नेकपा एमालेका नेता माधवकुमार नेपालले प्रधानमन्त्री तथा पार्टी अध्यक्ष केपी शर्मा ओलीको हठका कारण पार्टी एकतावद्ध हुन नसकेको आरोप लगाएका छन् ।

शुक्रबार जनकपुरधामस्थित एमाले पार्टी कार्यालयमा आयोजित पत्रकार सम्मेलनमा उनले प्रधानमन्त्री ओलीको दम्भ र अहंकारले कम्युनिस्ट आन्दोलन नै धरापमा परेको आरोप लगाए ।

प्रधानमन्त्री ओलीकै हठका कारण मेरियट होटलमा भएको वार्ता सकारात्मक दिशातर्फ अघि बढ्न नसकेको उनले बताए ।

‘पार्टी फुट्न नदिन पटक–पटक भेटघाट गरे पनि ओलीको हठका कारण सफल भएन । उहाँको भनाइ छ, माने मान नभए बाटो खुला छ जा,’ नेपालले भने, ‘बालुवाटारको बालुवामा पेलेर तेल निस्किनेवाला छैन ।’

नेपालले बुधबारको भेटमा पार्टीको विवाद मिल्ने सम्भावन देखिए पनि हिजोको भेटबाट त्यो कुरा टाढिएको बताए । ‘अस्तिको भेटमा पार्टी विवाद मिल्छ कि भनेर अलिकति आशा जागेको थियो । मैले भनेको थिएँ– तपाईंको अध्यक्ष पद पनि हामीले खोस्न खोजेका होइनौँ, प्रधानमन्त्रीबाट हट्नुस् भनेको पनि छैन । तर, पार्टीलाई सिस्टममा चलाउनुस् भनेको हो,’ नेपालले भने ।

उनले अध्यक्ष ओली २ जेठ २०७५ को स्थितिमै पार्टीलाई फर्काउन तयार भए मात्रै विवाद समाधान हुने बताए ।

‘मैले उहाँलाई स्पष्टीकरण सोध्ने र कारबाही गर्ने निर्णय फिर्ता लिन भनेपछि तपाईंबारे विचार गर्न सकिन्छ भन्नुभयो । तर, अन्य जिल्ला अध्यक्षले राम्रो भूमिका नखेलेकाले हटाइएको हो त्यसमा केही हुन्न भन्नुभयो,’ उनले भने, ‘केपी ओलीको दम्भले नवनिर्मित धरहराको उकालो चढ्दै छ ।’

उनले आफू पार्टीमा अल्पमतमा परेपछि अध्यक्ष ओलीले बाटोमा हिँडिरहेकाहरूलाई समातेर मनमौजी तरिकाले केन्द्रीय सदस्य बनाएको आरोप लगाए ।

प्रकाशित मिति: शुक्रबार, वैशाख १०, २०७८ १२:३४