लुम्बिनी प्रदेश : कोरोना संक्रमितले भरिए अस्पताल

A+ A A-

कोरोना भाइरस संक्रमतको दर बढेसँगै लुम्बिनीका कोरोना विशेष अस्पतालका बेड संक्रमितले भरिएका छन् । चैतको अन्तिम सातादेखि निरन्तर संक्रमित बढ्दै जाँदा लुम्बिनी प्रदेशका चारवटै कोरोना विशेष अस्पताल भरिएका हुन् । अस्पतालका आईसीयू बेडसमेत भरिएकाले नयाँ बिरामीका लागि बेडसमेत पाउन मुस्किल परेको छ ।

बुटवल धागो काराखनास्थित कोरोना विशेष अस्पतालका १३ आईसीयू बेड संक्रमितले भरिएका छन् भने भीम अस्पतालमा पाँच बेडको आईसीयू कक्ष पनि भरिएको छ । बुटवलमा आएका गम्भीर प्रकृतिका संक्रमितलाई भैरहवामा रिफर गरे पनि अहिले बेड नहुँदा काठमाडौं रिफर गर्नुपरेको लुम्बिनी प्रादेशिक अस्पतालका बुटवलका सूचना अधिकारी डा. विष्णु गौतमले बताए ।

बाँकेको कोहलपुरमा रहेको भेरी अस्पतालमा पनि आईसीयु र एचडीयू बेड संक्रमितले भरिएका छन् । अस्पतालका मेडिकल सुपरिटेण्डन डा. प्रकाश थापाले एक हप्ताअघिदेखि अस्पतालका सामान्य बेडसहित १ सय ४२ बेड संक्रमितले भरिएको बताए । उनले अस्पताल संक्रमितले भरिएपछि नयाँ बिरामीको उपचारमा निकै समस्या परेको बताए । दाङको बेलझुण्डी कोरोना अस्पतालमा बुधबार साँझसम्म २८ वटा बेडमा बिरामी रहेका छन् ।

बेड थप गर्ने तयारीमा छौँ : मन्त्री गिरी

आन्तरिक मामिला तथा कानुन मान्त्रालयसँगै स्वास्थ्य तथा जनसंख्या मन्त्रालयको जिम्मेवारी पाएका मन्त्री लिला गिरीले प्रदेशमा कोरोनाको अवस्था आकंलन गरेरै कोभिड अस्पतालमा थप बेड थप्न लागेको बताए ।

उनले अहिलकै चारवटा अस्पतालमा बेड थप्ने तयारी भएको र त्यसको सुरुवात बुटवलको कोरोना विशेष अस्पतालबाट गर्न थालिएको बताए । उनले बुटवल धागो कारखाना अर्को भवन खाली गराएर बेड थप गर्ने तयारी भएको बताए । धागो कारखानाको कोरोना अस्पतालमा अहिले ४० बेड छन् ।

‘त्यहाँको अर्को भवन पनि खाली गरेर बेड संख्या थप्छौँ । सबैमा अक्सिजनको व्यवस्था गर्छौं,’ उनले भने, ‘प्रदेशका चारवटै कोरोना अस्पतालमा २ सय बेड थप्दै छौँ । आवश्यकताअनुसार आइसीयू र एचडीयू पनि थपिन्छ । त्यो काम हामी छिट्टै गर्छौं ।’

उनले प्रदेशमा संक्रमण फैलिए नियन्त्रणबाहिर जाने भएकाले स्वयं नागरिकलाई सचेत हुन आग्रह गरे । सीमाबाट भित्रिने नेपाली अनिवार्य होम क्वाराइन्टेन वा स्थानीय तहले बनाएको स्वास्थ्य मापदण्ड पूरा गर्न आग्रह गर्दै सरकारले लागू गरेका सम्पूर्ण स्वास्थ्य सावधानी अपनाउन नागरिकलाई आग्रह गरे ।

प्रकाशित मिति: बिहीबार, वैशाख ९, २०७८ १८:५०