तीन वर्ष बितिसक्दा पनि पाएनन् रामपुरका विद्यार्थीले स्नातक र डिग्रीको सर्टिफिकेट

तीन वर्ष बितिसक्दा पनि पाएनन् रामपुरका विद्यार्थीले स्नातक र डिग्रीको सर्टिफिकेट

A+ A A-

कृषि तथा वन विज्ञान विश्वविद्यालयले तीन वर्ष बितिसक्दा पनि स्नातक तहको प्रमाणपत्र (सर्टिफिकेट) उपलब्ध गराउन सकेको छैन ।

२०७५ सालको असोज महिनामा स्नातक उत्तीर्ण विद्यार्थीहरूले अझैसम्म पनि सर्टिफिकेट नपाएको गुनासो गरेका छन् । ‘पशु विज्ञान तथा पशु चिकित्सा संकायमा २०७५ सालमा स्नातक गरेको हुँ । त्यतिखेर ट्रान्सस्क्रिप्ट र क्यारेक्टर सर्टिफिकेट पाएँ । दीक्षान्त समारोहपछि पाइने ओरिजिनल (डिग्री) सर्टिफिकेट पाएको छैन’, विद्यार्थी प्रकाश अधिकारीले भने, ‘छ महिनाभित्र नै हामीले पाउनुपर्ने हो । तीन वर्ष बित्न लाग्दा पनि पाएका छैनौँ ।’

स्नातक र स्नातकोत्तर तह पास गरेका विद्यार्थीलाई दीक्षान्त समारोहपछि मात्र ओरिजिनल सर्टिफिकेट दिइन्छ । तर, सो विश्वविद्यालयले तीन वर्ष बितिसक्दा पनि दीक्षान्त समारोह गर्न नसक्दा विद्यार्थीले सर्टिफिकेट पाउन नसकेको अधिकारीले बताए ।

कुनै पनि तहमा अध्ययन गर्नलाई त्यसभन्दा अघिल्लो तहको सर्टिफिकेट अनिवार्य हुन्छ । तर, विश्वविद्यालयले सर्टिफिकेट नदिँदा विद्यार्थीहरू धेरै समस्यामा पर्दै आएको रामपुर क्याम्पसका विद्यार्थी बामदेव गौली बताउँछन् ।

‘सेमेस्टरको नतिजा देखाएर विद्यार्थी भर्ना भएका छन्,’ उनले भने, ‘समयमा सर्टिफिकेट नपाउँदा हामीहरू धेरै समस्यामा छौँ ।’ विश्वविद्यालयले ओरिजिनल सर्टिफिकेट नदिएर विद्यार्थीको भविष्यमाथि नै खेलवाड गरेको आरोप उनले लगाए ।

स्वदेशमा पढ्नेभन्दा विदेशमा गएर पढ्ने विद्यार्थीलाई सर्टिफिकेट नहुँदा समस्या छ । नेपालमा पढिरहेका विद्यार्थी सेमेस्टरको रिजल्टका आधारमा पनि भर्ना भएका छन् । तर, त्यस सर्टिफिकेटले विदेशमा पढ्न नपाइने विद्यार्थी नसिब कोइरालाले बताए ।

हाल अमेरिकामा कृषि विषयमा स्नातकोत्तर अध्ययनरत नसिब कोइरालाले भर्ना हुने बेलामा बुझाउनुपर्ने सर्टिफिकेट अहिलेसम्म कलेजलाई बुझाउन नसकेको दुखेसो पोखे ।

‘हाल हामी उच्च शिक्षा अध्ययनका लागि विभिन्न मुलुकमा पुगेका छौँ,’ उनले भने, ‘एएफयुले अहिलेसम्म हाम्रो स्नातक तहको सर्टिफिकेट दिएको छैन । आफ्नै विश्वविद्यालयले नबुझिँदिँदा हामी ठूलो मर्कामा परेका छौँ ।’

उनले भने, 'प्रत्येक सेमेस्टरमा धेरै पहलपछि हामीलाई यहाँको विश्वविद्यालयले कोर्स रजिस्टर गर्न दिएको छ । तर, अब हामीमध्ये धेरैको स्नातकोत्तर सकिन एक महिना मात्र बाँकी रहँदा यो समस्या झनै जटिल बनेको छ ।’

अब पनि सर्टिफिकेट नबुझाएमा उच्च शिक्षा नसकी स्वदेश फर्कनुपर्ने बाध्यात्मक परिस्थिति आउन सक्ने अमेरिकामै अध्ययनरत अर्की विद्यार्थी प्रमिशा थपलिया बताउँछिन् ।

‘यत्रो समयको मिहिनेतलाई तिलाञ्जली दिएर अध्ययन पूरा नगरी नेपाल फर्किनुपर्ने परिस्थिति सिर्जना हुन सक्छ,’ उनले भनिन् । आफ्नै सिर्टिफिकेटका लागि विश्वविद्यालयलाई पटक-पटक अनुरोध गर्दा पनि सुनुवाइ नगरेको थपलिया बताउँछिन् ।

पीडित विद्यार्थीका अनुसार कृषि तथा वन विज्ञान विश्वविद्यालयबाट स्नातक तह उत्तीर्णपछि ३५ प्रतिशत विद्यार्थी विदेश पढ्न जाने गरेका छन् । विशेष गरी विदेशमा स्नातकको सर्टिफिकेट नहुँदा विद्यार्थीहरूलाई ठूलो समस्या उत्पन्न भएको उनीहरूको भनाइ छ ।

पटक-पटकको विद्यार्थीको दबाबपछि विश्वविद्यालयका उपकुलपति डा. पुण्यप्रसाद रेग्मीले गत २१ मंसिरमा विद्यार्थीलाई तीन महिनाभित्र सर्टिफिकेट उपलब्ध गराउने आश्वासन दिएका थिए । फागुनमा हुने भनिएको दीक्षान्त समारोह ३० चैतमा भर्चुअल माध्यमबाट गर्ने सूचना आएपछि विद्यार्थीले अनलाइनबाट रजिस्टर पनि गरिसकेका थिए । तर, दीक्षान्त समारोह हुने दुई दिनअगाडि एक्कासी सूचना निकाली कार्यक्रम स्थगन गरिएको जानकारी गराइएको थियो ।

सूचनामा शिक्षामन्त्री एवं विश्वविद्यालयका सहकुलपति कृष्णगोपाल श्रेष्ठको मौखिक निर्देशनमा पूर्वनिर्धारित कार्यक्रम स्थगित भएको जानकारी गराइएको थियो । ‘अन्तिम समयमा स्थगन भयो भन्छन् । किन भयो, स्पष्ट जानकारी पनि छैन । अब कहिले हुन्छ, हामीले सर्टिफिकेट पाउँछौँ कि पाउँदैनौं, जानकारी छैन ,’ अर्का विद्यार्थी प्रशान्त भण्डारी आक्रोश पोख्छन्, 'मन्त्रीले किन रोक्छन् ?'

विश्वविद्यालयको जैविक प्रविधि केन्द्रका निर्देशक प्रा.डा. ईश्वरीप्रसाद कडरिया विश्वविद्यालयको कमजोरीका कारण विद्यार्थीलाई समस्या भएको बताउँछन् । 'विद्यार्थी उत्तीर्ण भएपछि दीक्षान्त समारोह गरेर विश्वविद्यालयले सर्टिफिकेट दिनुपर्ने हो । तर, अघिल्लो वर्ष विश्विद्यालयमा पदाधिकारीको नियुक्तिमा ढिलाइ, आन्तरिक विवाद र तालाबन्दीले शैक्षिक मुद्दा ओझेलमा पर्‍यो,' उनले भने ।

विश्वविद्यालयको पशु विज्ञान,पशु चिकित्सा तथा मत्स्य विज्ञान संकायका डिन होमबहादुर बस्नेतले सम्पूर्ण तयारी पूरा भएको दीक्षान्त समारोह कुलपति र सहकुलपतिको ठाडो निर्देशनमा रोक्नुपरेको बताउँछन् ।

‘विश्वविद्यालयले पहल नगरेको होइन । तयारी पूरा भइसकेको कार्यक्रम दुई दिनअगाडि ठाडो आदेशमा रोक्नुपर्‍यो’, प्रमुख बस्नेतले भने, ‘यहाँ हलो ठूला मान्छेबाटै अड्किरा'को छ ।’

विश्वविद्यालयकी रजिस्ट्रार प्रा.डा. शारदा थपलियाले दुई वर्षभित्रमा सक्नुपर्ने दीक्षान्त समारोह अघिल्लो वर्ष कोरोनाका कारणले रोकिए पनि यो वर्ष गर्ने तयारीमा रहेको बताउँछिन् । कृषि विश्वविद्यालयमा कुलपति प्रधानमन्त्री र सहकुलपति शिक्षामन्त्री रहने व्यवस्था छ ।

अहिलेसम्म १ सय ५० जनाको हाराहारीले दीक्षान्त समारोह कुरिरहेका छन् । विश्वविद्यालयले दीक्षान्त समारोह गरेपछि विद्यार्थीले डिग्रीको सर्टिफिकेट हात पार्दछन् ।

कृषि विश्वविद्यालय रामपुरका उपकुलपति डा. पुण्यप्रसाद रेग्मीले यही १४ वैशाखमा दीक्षान्त समारोह हुने शिलापत्रसँग बताए ।

‘१४ वैशाखमा दीक्षान्त समारोह गर्ने गरी तयारी गरेका छौँ । प्रधानमन्त्रीले समय दिनुभएको छ’, उनले भने, ‘भर्चुअल हुन्छ कि कसरी हुन्छ, गर्छौं । ढुक्क हुनुहोस् । हामी सूचना निकाल्ने तयारीमा छौँ ।’

विद्यार्थी भने उपकुलपतिको भनाइमा विश्वस्त छैनन् ।

प्रकाशित मिति: बिहीबार, वैशाख ९, २०७८ १९:३५