अन्तर्राष्ट्रिय विमानस्थलमै कोरोना मापदण्ड पालना हुँदैन, ज्वरो परीक्षण नगरी यात्रुको आवतजावत

अन्तर्राष्ट्रिय विमानस्थलमै कोरोना मापदण्ड पालना हुँदैन, ज्वरो परीक्षण नगरी यात्रुको आवतजावत

A+ A A-

बुधबार काम विशेषले यती एयरलाइन्समार्फत काठमाडौं अवतरण गरेका इटहरीका मनोज श्रेष्ठलाई हल्का रुघाखोकीसँगै सामान्य ज्वरो आएको थियो । उनलाई विराटनगर विमानस्थलमा ज्वरो परीक्षण गरेर घर फर्काउँछ कि भन्ने डर थियो । तर, विमानस्थलमा ज्वरोसमेत परीक्षण नगरी काठमाडौं आएको यात्रु श्रेष्ठले जानकारी दिए ।

विमानस्थलमा सामान्य समयमा जस्तै झोला र जीउको मात्र परीक्षण भएको श्रेष्ठले बताए । ‘खोइ कोरोनाको नामसमेत उच्चारण भएन । टिकट लिएपछि सिधै बोर्डिङ दिएर जाँचमा पठायो,’ उनले भने, ‘हवाईयात्रामा समेत कोरोना भाइरस सर्ने जोखिम देखियो । यात्रुले यात्रा र विमानस्थलमा कोरोना भाइरसको बेवास्ता गरेको देखियो ।’

स्वास्थ्य तथा जनसंख्या मन्त्रालय, त्रिभुवन अन्तर्राष्ट्रिय विमानस्थल र देशभरका आन्तरिक विमानस्थलमा अवतरण गर्ने सबै विमानका यात्रुहरूको जानुअघि नै कोरोना परीक्षण गर्न निर्देशन दिएको थियो । तर, पछिल्लो समयमा आन्तरिक हवाई यात्रुको कोरोना महामारीको जाँच गर्न छाडिएको छ ।

सरकारले कोरोनाबाट बच्न सामाजिक दूरी, मास्क, सेनिटाइजर र फेससिल्ड अनिवार्य लगाउनुपर्ने निर्देशन दिए पनि विमानस्थलहुँदै यात्रा गर्ने यात्रुका हकमा यो लागू भएको देखिँदैन ।

विगतमा हवाई यात्रुलाई दुई साताअघि ज्वरो, रुघाखोकी आए–नआएको विवरण फारम भरेर लिने गरे पनि अहिले यस्तो गर्न छाडिएको छ ।

विमानस्थल हुँदै आन्तरिक र बाह्य गरेर १० हजार मानिस आवतजावत गर्ने गरेको विमानस्थलले जानकारी दिएको छ । तर, विमानस्थल हुँदै यात्रा गर्ने यात्रुले भने सरकारले कोरोना नियन्त्रणका लागि लागू गरेको मापदण्डले छोएको देखिँदैन ।

विमानस्थलका प्रवक्ता देवचन्द्र कर्ण विमानस्थलमा हवाई यात्रुका हकमा कोरोना नियन्त्रणका लागू गरेको मापदण्डअनुसार नै परीक्षण भइरहेको दाबी गर्छन् ।

सरकारले हवाई यात्रुलाई विमानस्थलमा कोरोना भाइरस जोखिमबाट बच्न र सामाजिक दूरी कायम गर्ने सूचनासँगै अनिवार्यसमेत गरेको कर्णले जानकारी दिए ।

सरकारले लागू गरेको मापदण्ड पालन भइरहेको कर्णले बताए । ‘हाल विमानस्थलले यात्रुका आफन्तलाई पुर्‍याउन आउनसमेत रोक लगाएको छ । भीड नियन्त्रण गर्न र सामाजिक दूरी कायम गराउन सम्बन्धित एयरलाइन्सलाई सूचित गराएका छौँ,’ उनले भने, ‘विमानस्थलले अन्तर्राष्ट्रिय मापदण्डसमेत पालन गरिरहेको छ । कोरोना जोखिमबाट बच्न यात्रुलाई मात्र होइन, एयरलाइन्सका कर्मचारीलाई समेत सुरक्षित हुन विमानस्थलले आग्रह गरिरहेको छ ।’

घन्टौँ विमानस्थलभित्र उडानको प्रतीक्षामा बसेका यात्रु भीड नै लागेर बस्ने गरेका छन् । उनीहरूले टिकट लिने बेलामा पनि सामाजिक दूरी कायम गरेको देखिँदैन ।

आन्तरिक मात्र होइन, अन्तर्राष्ट्रिय उडानमा पनि समस्या उस्तै छ । अन्तर्राष्ट्रिय उडानमार्फत आउने र जाने यात्रुसमेत विमानस्थलभित्र कोरोना भाइरस सर्ने जोखिम धेरै रहेको बताउँछन् ।

विदेशबाट आउने यात्रुका हकमा कोरोना भाइरस परीक्षण गरेको रिपोर्ट अनिवार्य हुनुपर्नेछ । नेपालको अन्तर्राष्ट्रिय विमानस्थलमा कोरोना नियन्त्रणका लागि सामाजिक दूरी र अन्य बच्ने उपाय पालन नगरिएको यूएईबाट आएका धुनषाका शैलेन्द्र शाह बताउँछन् ।

नेपालमा यात्रुलाई आवतजावतमा धेरै खुकुलो देखियो । विदेशमा यसरी सँगै हिँडेको देखियो भने प्रहरीले समाएर जेल र जरिवानासमेत तिराउने गरेको उनको भनाइ छ ।

देशकै एक मात्र अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थलमा आवश्यक भौतिक संरचनाको अभावका कारण पनि थोरै यात्रु हुँदासमेत भीड नै देखिन्छ । विमानस्थल साँघुरो हुँदा यात्रुलाई असहज भइरहेको छ । सरकारले विमानस्थलको उचित व्यवथापन गर्न नसकेको विमानस्थलका कर्मचारी नै बताउँछन् ।

अन्तर्राष्ट्रिय विमानस्थलमा हवाई यात्रुको ज्वरो परीक्षण गर्ने थर्मल स्क्यानर मेसिन जडान गरिएको थियो । कोरोनाको जोखिम न्यूनीकरणका लागि स्वास्थ्य तथा जनसंख्या मन्त्रालयले विमानस्थलस्थित हेल्थ डेस्कमा थर्मल स्क्यानर मेसिन जडान गरी परीक्षण गर्दै आएको छ ।

चीन, दक्षिण कोरिया, जापान, बेलायत, फ्रान्स, जर्मनी, इटाली र इरानबाट त्यहाँको चिकित्सकले १० दिनअघिदेखि कोरोनाको संक्रमण छैन भन्ने प्रमाणित गरेको प्रमाणपत्र भए मात्रै नेपालीहरू स्वदेश फर्कन पाउँछन् । तर, पछिल्लो समय यो परीक्षण गरेको रिपोर्टसमेत जाँच हुन छाडेको छ ।

कोरोना भाइरसको त्रास बढेसँगै धेरै देशले विदेशी नागरिकको आवतजावतमा कडाइ गरेका छन् । सङ्क्रमण नियन्त्रणका लागि धेरै देशले नागारिकलाई अन्य देश जान दिएका छैनन् ।

कोरोनाको त्रास फैलिएसँगै विमानस्थल र सीमानाका मुख्य भन्सार नाकामा परीक्षण गर्न हेल्थ डेस्क सञ्चालनमा ल्याइएको थियो । तर, पछिल्लो समय ती नाम मात्रका छन् ।

प्रकाशित मिति: बिहीबार, वैशाख ९, २०७८ १३:५५