'दर्शक, स्रोताको मायाले अघि बढ्ने हौसला मिलेको छ'

A+ A A-

युवराज चौलागाईले ४ सय बढी गीतमा स्वर दिएका छन् । उनका लैजा चरी मेरो सन्देश, तिमीलाई के भनूँ, तिम्रा डोला डोला हात, हारें हारें, छ एकान छलगायतका दर्जन बढी गीत हिट भए । शिलापत्रकर्मी पवन बराइलीले नेपाली गीत–संगीतबारे चौलागाईंसँग गरेको कुराकानीको सम्पादित अंश :

तपाईं के गर्दै हुनुहुन्छ ?

अहिले ‘लटरपटर’ म्युजिक भिडियो रिलिज भएको छ । त्यसैको प्रमोसनका लागि व्यस्त भइरहेको छु । साथै कलेक्सन एल्बमको पनि रेकर्डिङ गरिहेको छु । समग्रमा भन्दा सांगीतिक क्षेत्रमै व्यस्त छु ।

‘लटरपटर’बारे कस्तो प्रतिक्रिया पाउनुभएको छ ?

यो गीत आफैंमा फरक शैलीमा छ त्यसैले एकदमै राम्रो फिडब्याक पाइरहेको छु । गीतको शब्द पनि फरक शैलीमा कथिएको छ । अहिलेका युवा पुस्ताले औधी रुचाएका छन् । आफ्नै युट्युब च्यानलबाट अपलोड गरेको छु । यसको शब्द पनि युवा पुस्ताको मायाको ट्रेनलाई लक्षित गरेर शब्द रचिएको हो । गीतको शब्द राजेन्द्र थापाजीले लेख्नुभएको हो भने मलाई अनुष्का पाठकजीले साथ दिनुभएको छ ।

गायक बन्ने प्रेरणा कसरी पाउनुभयो ?

स्कुले जीवनदेखि नै नाचगानमा रमाउँथें । सिनेमाको हिरोसँगै कोरसमा नृत्य गर्न पाउने आशामा नृत्य सिकेको थिएँ । त्यो बेला फिल्मको नायक बन्ने रहर पनि थियो । तर, म गीत गाउँथें । स्कुलमा हुने विभिन्न सांस्कृतिक कार्यक्रममा गाउँथें । त्यो कुराले पनि कलाकारितामा तान्यो ।

अग्रजहरुले मेरा स्वरको तारिफ गर्नुहुन्थ्यो । त्यस बेला गायकै बन्छ भन्ने लाग्थ्यो । काठमाडौंमा आएपछि एउटा भ्रम थियो, चाँडै गायक बन्छु । तर, त्यो होइन रहेछ । सिक्दै गर्दा बल्ल बुझियो, संगीत ।

यहाँको सांगीतिक यात्रा कति वर्ष भयो ?

आज औपचारिक रुपमा संगीतमा लागेको १५ वर्ष नाघ्यो । संगीतमा लागेको हिजोजस्तो लाग्छ । तर, धेरै दिन खाई सकियो ।

औपचारिक रुपमा रेकर्ड गरेको पहिलो गीत ?

मेरो पहिलो रेकर्डेड गीत ‘मेरो मायालाई तिमीले बुझ्न सकिनौ’ हो । जुनचाहिँ भोकल ट्रायलको गीत हो । त्यो भोकल टेस्टका लागि गरिएको गीत थियो । त्यसअघि पनि संगीत औपचारिक रूपमा संगीत सिकेको थिएँ ।

त्यो भोकल टेस्ट गरेको पाँच वर्षपछि सोलो एल्बमको तयारी गरें । ‘साँझपख सम्झनामा किन आउनु’ गीत रेकर्ड गरें ।

कति चल्यो ?
त्यो बेला एकदमै चल्यो । पपको गीत बाढी आइरहेको बेला मैले च्यालेन्ज वा रिस्क लिएर क्लासिक टच भएको गीत निकाल्नुपर्छ भन्ने हेतुले त्यो गीत ल्याएँ । गीत एकदमै राम्रो चल्यो । अवार्डमा नोमिनेसन पनि भयो । त्यही गीतबाट पहिलो कालिका अवार्ड पनि पाएँ । त्यो गीत मेरो करियरको कोसेढुंगा साबित भयो । त्यो पहिलो एल्बमले सांगीतक उद्योगमा गायकका रुपमा स्थापित गर्यो ।

पहिले र अहिले संगीतमा के फरक छ ?

त्यो बेला मिडिया कम थिए । अहिले स्ट्रगल कम मिडिया ज्यादा छन् । बुझ्ने मान्छेले संघर्ष गर्न खोज्नुहुन्छ, त्यसले ठूलो महत्त्व राख्छ । त्यसले पछि राम्रो परिणाम ल्याउँछ भनेर स्ट्रगल गर्ने हो । त्यो बेला र अहिले धेरै नै फरक छ ।

गीत हिट र फ्लप भनेर मापन गर्ने आधार के हो ?

एक साता गीत हिट र फ्लप हुने जमाना आयो । अहिले प्रविधिले फड्को मार्दै छ । एक सातामै गीत हिट र फ्लपको मापन गर्ने आधार बनाइएको छ । गीत हेर्ने भन्दा पनि सुन्ने हो ।

गीत सबै श्रोत तथा दर्शकमाझ पुग्नुपर्छ । त्यसपछि त्यसको फिडब्याक आउनुपर्छ । अनि मात्र हिट र फ्लपको मूल्यांकन हुन्छ । अहिले भ्युअर्सका आधारमा गीतको मापन गरिन्छ । कुनै राम्रो गीतले भ्युअर्स नपाउन पनि सक्छ । त्यसैले युट्युबमा पनि एउटा मापन बोर्ड राख्न आवश्यक पर्छ जस्तो लाग्छ ।

नेपाली सांगीतिक क्षेत्रमा तपाईंले आफूलाई कसरी मूल्यांकन गर्नुहुन्छ ?

म नेपाली संगीतिक क्षेत्रकाे गायक हुँ । म नयाँ सिक्न रुचाउने र सिकेर आएको मान्छु हुँ । सांगीतिक क्षेत्रमा संघर्ष गरेर यहाँसम्म आइपुगेको छु।

म प्रायः चलचित्रका लागि गीत गाउँछु । दर्शक श्रोताको माया पाइरहेको छु । यो मायाले नै नयाँ नयाँ गीत ल्याउने हौसला मिलिरहेको छ । नयाँ गीत ल्याउने कोसिस गरिरहेको छु । त्यही मायाले पनि झन् एउटा जिम्मेवारी थपिएको छ ।

श्रोता तथा दर्शकले तपाईंको नदेखेको पाटो के छ ?

मलाई दीनदुःखीलाई सहयोग गर्न मन लाग्छ । सामाजिक कार्यक्रममा रुचि छ । कहिलेकाहीँ सामाजिक कार्य पनि गरिरहेको हुन्छु ।

गीत कतिको सुन्नुहुन्छ ?

म प्रायः गीत सुन्दा अर्थपूर्ण र भावले भरिएका गीत सुन्न रुचाउँछु । फिलोसफिक गीत सुन्न मन पर्छ ।

भविष्यमा कस्ता गीत ल्याउनुहुन्छ ?
समय तथा दर्शक श्रोताको मात्रै नभएर देश र समाजको सन्देश दिने गीत गाउने मन छ ।

गीत गाएर बाँच्नु सकिन्छ ?

त्योचाहिँ गायकमा भर पर्छ । उसले चलचित्रका गीत, आधुनिक गीतलगायत सबै गीत गाउँछ । साथै विभिन्न देश विदेशका कार्यक्रममा जान्छ भने केही रकम कमाउँछ र जीविका चलाउँछ । नेपाली सांगीतिक क्षेत्रमा मज्जाले टिक्न सक्छ ।

तस्विर ः किरण पन्थ

प्रकाशित मिति: शनिबार, जेठ ४, २०७६ २०:५७