सोमत नभएका शिक्षामन्त्री- मनपरी बोल्छन्, जवाफदेही छैनन्

A+ A A-

शिक्षामन्त्री भन्नेबित्तिकै प्राज्ञहरूकाे बीचमा ढंगले कुरा गर्न सक्ने, आफ्नाे विषयमा प्रस्ट दृष्टिकाेण भएकाे, विनयशील नेता हाेला भन्ने कल्पना तपाईंकाे मनमा आउन सक्छ ।

संघीय सरकारका शिक्षामन्त्री कृष्णगाेपाल श्रेष्ठ ती सबै अपेक्षा बिर्साउन तयार छन् ।अहिले युट्युबमा हास्यपरकताका लागि उनकाे सर्च हुनेसमेत गर्छ । नेपाल सरकारको शिक्षामन्त्रीका रूपमा श्रेष्ठकाे वास्तविकता भने दिक्कलाग्दाे छ ।

प्राज्ञिक क्षेत्रहरूलाई हेर्ने मन्त्रालयको नेतृत्व गरेका श्रेष्ठले प्रधानमन्त्री केपी शर्मा ओलीको बचाउ हाेस् या पार्टीभित्रका विपक्षीलाई तल्लाेस्तरमा गर्ने टिप्पणी र कोरोना महामारीको विषयमा दिएको असंवेदनशील अभिव्यक्तिका कारण उनी आलाेचित बनिरहेका छन् ।

कतिपय सार्वजनिक कार्यक्रममा उनले पूरा हुने कुरा मात्रै आफू बोल्ने गरेको दाबी गर्छन् । तर, सामान्य आकलन पनि नगरी बोल्दा त्यसले उनलाई नै ठेस दिँदै आएको छ ।

गत शनिबार आइक्यानले आयोजना गरेको कार्यक्रममा उनले विद्यालय बन्द नै नगर्ने अड्डी कसेका थिए । उनले विद्यार्थीहरू घरमा भन्दा स्कुलमा सुरक्षित हुने दाबी गरे । ‘विद्यालय बिदा भएर के हुन्छ, के कोरोना भाग्छ ?,’ प्रश्‍न गर्दै उनले भनेका थिए, ‘बालबालिका घरमा भन्दा स्कुलमा नै सुरक्षित रहन्छन् ।’

तर, उनीसहितकाे मन्त्रिपरिषद् बैठकले त्यसकाे ७२ घण्टा नबित्दै शहरकेन्द्रित सबै विद्यालय बन्द गर्ने निर्णय गर्‍यो ।

जति बेला उनी संसद् सदस्यको रूपमा मात्रै थिए, त्यसक्रममा उनी सरकार र सरकारका मन्त्रीहरूलाई संसदमा रहेका उनीजस्तै सदस्यले उठाएको प्रश्‍नको उत्तर दिन नपर्ने तर्कमा हुन्थे ।

संसदमा उनले सरकारलाई सोधिएका प्रश्नलाई दुत्कारे । ‘गुड प्रश्न गुड एन्सर, ब्याड प्रश्न नो एन्सर’ भन्दै प्रश्न गर्ने माथि नै जाइलाग्ने शैली देखाए ।

२५ जनाभन्दा बढी उपस्थित नहुन सरकारले आह्वान गरिरहेको अवस्थामा दर्जनौँ मानिसहरूका बीच भाषण गर्दै उनले भनेका थिए, ‘हुन त २५ जनाभदा बढी भीड नहुने भनिएको छ, यसो भन्दा आफैँलाई प्रश्‍न गरेजस्तो हुन्छ तर म धेरै भीडभाडमा हुन्छु कोरोना लागेको छैन ।’

मन्त्रिपरिषद्‍मा हुँदा पूर्वसूचना तथा सञ्चार प्रविधिमन्त्री गोकुल बाँस्कोटाजस्तै उनले ठाडो उत्तर दिने र अनावश्यक ठाउँमा अनावश्यक कुरा बोल्ने गरेको देखिन्छ ।

गत ५ पुसमा प्रधानमन्त्री ओलीले संसद् विघटनको निर्णय गरेपछि त्यसलाई ११ फागुनमा सर्वोच्च अदालतले उल्ट्याइदियो । नैतिकताका आधारमा प्रधानमन्त्री ओलीले राजीनामा दिनुपर्ने आवाज उठिरहेका बेला सीटीईभीटीको ३२औँ वार्षिकाेत्सवमा उनले भनेका थिए, ‘ओली इज द केपी ओली, फुटबलको पेलेजस्तै हो । कोही माइकालाल छ सडकमा ल्याएर पछार्न सक्ने ?’

विश्वविद्यालयहरूकाे सहकुलपतिका रूपमा शिक्षामन्त्री रहने प्रावधान भए पनि पछिल्लाे दीक्षान्त समाराेहमा उनले प्रयाेग गरेकाे भाषा आपत्तिजनक थियो । मन्त्रीका यस्ता शब्दले समाजको स्तर घटाउने र समाजमा नकारात्मक प्रभाव पर्ने बताउँछन्, मानवशास्त्री दिनेश प्रसाईं ।

‘यस्ता शब्दहरू प्रयोग गरिनु राम्रो होइन । विद्यार्थीमा नकारात्मक प्रभाव त पर्छ नै, समाजको स्तर पनि घटाउँछ,’ उनले भने । कुनै पनि सार्वजनिक कार्यक्रममा बोलिने भाषामा मन्त्रीहरूले निकै ध्यान दिनुपर्ने उनको तर्क छ ।

कहाँ के बोल्ने भन्‍ने ज्ञान त भएन नै, हदैसम्मको तुच्छ भाषाशैली प्रयोग गर्न पोक्त छन् श्रेष्ठ । हुन त उनी आलोचना गरेको मन पर्ने गरेको प्रतिक्रिया दिन्छन् । सहज बाटाे हिँड्न मन पर्दैन, सार्वजनिक कार्यक्रममै भन्ने गरेका छन् ।

‘मलाई एन्टिकरेन्ट हिँड्न मन पर्छ । करेन्टमा त जो पनि हिँडिहाल्छ नि,’ उनले काठमाडौंमा भएको एक कार्यक्रममा भनेका थिए ।

प्रधानमन्त्री ओलीले संसद् विघटनपछि गल्ती सच्याए पार्टी एक हुन सक्ने प्रतिक्रिया सचिव योगेश भट्टराईले दिएपछि हुने भनेका थिए, ‘ताप्लेजुङको केटोले केपी ओलीलाई पार्टी प्रवेश गराउने रे, कति हाँस्नु !’

उनी अहिले कोरोनाबाट बच्ने शिक्षा ‘ओली स्टाइल’ मा दिन सुरु गरेका छन् । शनिबार भएको एक कार्यक्रममा उनले भने, 'कोरोना हुनु भनेको त्यही ज्वरो आउनु र रुघा लाग्नु त हो नि ! रुघा हटाउन तीतो, टर्रो र अमिलो खाने ज्वरो आयो भने सिटामोल ।'

‘थर्मोमिटर राख्‍नुस्, १०१ डिग्री ज्वरो आयो भने ५०० एमजीको सिटामोल खानुस् । १०२ पुग्नासाथ डब्बलडोज खानुस्,’ उनले भनेका थिए । जनस्वास्थ्यविद् अनुप बाँस्तोला सबैलाई होलसेलमा यसो भन्न नहुने तर्क गर्छन् ।

‘ज्वरो आउँदा सिटामोल खाने त गरिन्छ तर कोरोना हटाउन यही खाए पुग्छ भन्‍ने कुनै मान्यता छैन । सिटामोल पनि केस र व्यक्ति हेरर खुवाइने हो,’ बाँस्तोलाले भने ।

श्रेष्ठ विगतमा नेकपा एमालेको काठमाडौं, ललितपुर र भक्तपुर पार्टी सचिव बनिसकेका नेता हुन् । २०४८ मा काठमाडौं क्षेत्र नम्बर ५, २०५१ मा काठमाडौं ७ र २०७४ मा काठमाडौं ९ बाट निर्वाचित उनले उत्ति नै हार पनि ब्यहोरेका छन् । २०५६, २०६४ र २०७० मा उनी काठमाडौं ९ बाट पराजित भएका थिए ।

पटक-पटक जनताबाट निर्वाचित भएर आएका श्रेष्ठले आफ्नो उटपट्याङ भाषणशैलीले जनतामा पार्ने प्रभाव पनि बुझ्न सके राम्रो हुन्छ । म बोल्ने कुरा जनताले सिक्छ भन्ने कुरालाई दृष्टिगत गर्न सके शिक्षामन्त्रीबाट जनताले केही शिक्षा लिन पाउलान् कि !

प्रकाशित मिति: मंगलबार, वैशाख ७, २०७८ १४:३०