काठमाडौंलाई जुम्ला र मुस्ताङको स्वाद चखाउने पूर्वसांसद (भिडियाे)

A+ A A-

‘यो जुम्लाको मार्सी चामल’ नयाँ पसल हेर्न आएका मुस्ताङका पूर्वसीडीओ रत्न पाण्डेलाई पूर्वसांसद श्रीमाया थकाली बताउँदै थिइन्, ‘अनि यो रातो मकै, खान निकै टेस्टी हुन्छ, स्वास्थ्यका लागि पनि फाइदाजनक छ ।’

छेउबाट पूर्वसांसद रीता रावल थप्दै थिइन्, ‘तपाईं सीडीओ हुँदा मुस्ताङमा फलेका केही खानेकुरा छुटाउनुभएको भए चिन्ताको कोही बात छैन । हामी यहीँ ल्याएर खुवाउँछौँ ।’

गत शनिबार पूर्वप्रधानमन्त्री झलनाथ खनाल त्यो पसलमा छिरेका थिए । ‘तपाईंहरूले त गजब गर्नुभएछ, कर्णालीका उत्पादन काठमाडौंसँग सिधै गाँसिदिनुभयो’, खनालको भनाइ सम्झँदै श्रीमायाले भनिन्, ‘नेपाली किसानले फलाएको एउटा मात्रै स्याउ, एक पाउ मात्र दाल खेर जान हुँदैन भन्ने हाम्रो ध्येय हो ।’

पुतलीसडकस्थित स्टार मलको आडैमा रहेको घरको अण्डरग्राउण्डमा छ, दुई पूर्वसांसदसहित चार महिलाले १ वैशाखदेखि खोलेको अर्ग्यानिक पसल, जहाँ जुम्ला र मुस्ताङका स्थानीय उत्पादनहरू बेच्न राखिएको छ । सुर्खेतकी कुशुम शर्मा चालिसे र रामेछापकी सबिना बजगाईं पसलका अन्य सञ्चालका हुन् ।

जुम्ला र मुस्ताङबाट ल्याइएका कृषिउपज यही पसलमा ल्याएर प्याकिङ गर्ने गरेको पसल सञ्चालक रिताले बताइन् । पसलमा जुम्लाको मार्सी चामल, मुस्ताङको रातो मकै, फापर, जंगली मौरीको मह, सिमी, बोडी, गहतको दाल, तोरीको तेललगायत खाद्यान्न पाउन सकिन्छ ।

यस्ता अर्ग्यानिक पसल त काठमाडौंमा थुप्रै खुलेका छन्, यस्तोमा तपाईंहरूको पसल किन ?’

रिता रावलले प्रस्ट्याइन्, ‘राजनीतिक पहुँचको दुरुपयोग गर्न चाहेको भए हामी दुवै जनाले धेरै पैसा कमाउने कुनै पनि व्यवसाय चुन्न सक्थ्याैँ तर हामीले स्थानीय उत्पादनको प्रवर्द्धन गर्ने सोचेर अर्ग्यानिक पसल खालेका छौँ, यो आफैँमा एउटा गतिलो सन्देश होइन र ?’

पूर्वसांसदहरू नै स्वदेशी उत्पादनको प्रचार, प्रवर्द्धन र व्यवसायमा लाग्दा अन्य थुप्रै महिलालाई यसले उद्यम, व्यवसायमा उत्प्रेरित गर्ने रिताको विश्वास छ । अर्ग्यानिक उत्पादन व्यक्तिको आर्थिक पाटो मात्र नभएर स्वास्थ्यसँग समेत जोडिएको उनी बताउँछिन् । ‘विदेशबाट आयात गरेर खाँदा एक त यहाँको पैसा बाहिरिन्छ, अर्को आफ्नै बारीको अमृत नचिनेर हामीले विदेशको विषादी पो खाइरहेका छौँ कि !’, उनी संशय व्यक्त गर्छिन् ।

१२ लाख सुरुवाती लगानीबाट सुरु भएको पसलमा अहिले दुई जनाले रोजगारी पनि पाएका छन् ।

एमाले पोलिट्ब्युरो सदस्यसमेत रहेकी थकाली ४० वर्षदेखि राजनीतिमा छिन् । राष्ट्रियसभा र अन्तरिम व्यवस्थापिका संसद सदस्यका रूपमा समेत उनले योगदान गरेकी छन् । संविधानसभा सदस्य रीता रावल पनि दुई दशकयता निरन्तर राजनीतिमा छिन् । विभाजित एमालेमा यी दुवै सांसद वरिष्ठ नेता माधव नेपाल समूहतिर छन् । अहिले राजनीतिक रूपमा नेपाल समूह निकै अप्ठेरोमा छ । यही बेला व्यवसायमा लागेकाले धेरैले उनीहरू राजनीतिबाट टाढिन लागेको अड्कल काटिरहेका छन् ।

यस्तो अनुमानमा कति सत्यता छ त ?

श्रीमायाले जवाफ दिइन्, ‘नेपालमा उत्पादित अर्ग्यानिक कृषि उपजको प्रवर्द्धन गरेर हामीले आफ्नो राजनीतिलाई अझ बलियो पारेका छौँ । अब भाषणले मात्र जनताको मन, मत जित्न सकिँदैन, काम गरेर देखाउनुपर्छ ।’

भिडियो :

प्रकाशित मिति: सोमबार, वैशाख ६, २०७८ १६:१४