वैदेशिक रोजगारमा कोरोनाको दोस्रो लहरको प्रभाव, भिसा लागेका कामदार पनि रोकिए

वैदेशिक रोजगारमा कोरोनाको दोस्रो लहरको प्रभाव, भिसा लागेका कामदार पनि रोकिए

A+ A A-

नेपाली श्रमिकहरूको प्रमुख रोजगार गन्तव्य मलेसिया, खाडीका देश र युरोपमा कोरोना भाइरसको दोस्रो लहरको प्रभाव पर्न थालेको छ । जसका कारण ती देश जाने तयारीमा रहेका नेपाली श्रमिक पनि प्रभावित बनेका छन् ।

कोरोना भाइरसको महामारीका कारण लामो समयसम्म वैदेशिक रोजगारीमा कामदारको आवतजावत रोकिएको थियो । कोरोनाकै कारण वैदेशिक रोजगारीमा कार्यरत २ लाखभन्दा धेरै नेपाली श्रमिक रोजगारी गुमाएर फर्किएका थिए । त्यस्तै सबै प्रक्रिया पूरा गरेका ३ लाख कामदार रोजगारीमा जान पाएनन् ।

कोरोनाको कारण धेरैले रोजगारी गुमाए । वैदेशिक रोजगारीमा रहेका नेपाली श्रमिक पनि यसबाट आतंकित नै बनेको वैदेशिक रोजगार विभागका सूचना अधिकारी महेन्द्रनाथ भट्टराई बताउँछन् । सामान्य बन्दै गएको वैदेशिक रोजगारी क्षेत्र कोरोनाको दोस्रो लहरले आक्रान्त बनेको उनको भनाइ छ ।

रोजगारदाता देशको अवस्था यस्तो छ ।

कतार

कोरोनाको दोस्रो लहर फैलिएसँगै कतारले सार्वजनिक समुद्री किनार, सार्वजनिक पार्क, कर्निसलगायत अन्य सार्वजनिक स्थल बन्द गरेको छ । सार्वजनिक स्थलमा एकै परिवारका दुई जनाभन्दा बढीलाई हिडडुल गर्न रोक लगाइएको छ ।

निजी अस्पतालका इमर्जेन्सीबाहेकका सेवा बन्द गर्न निर्देशन दिइएको छ । सिनेमा हल, ब्युटी पार्लर, रेस्टुरेन्टहरू बन्द गरिएका छन् । घरबाहिर निस्कँदा कोरोनासम्बन्धी जानकारी दिइने एटेराज एप्लिकेसन मोबाइलमा अनिवार्य राख्न निर्देशन दिइएको छ ।

मार्च २६ देखि लागू गरेका मापदण्डमा कतारमा निजी तथा सरकारी क्षेत्रका बैठकहरूमा पाँच जनाभन्दा बढी उपस्थित हुन रोक लगाइएको थियो । कतारले कोरोनासम्बन्धी ३३ बुँदे निर्देशन लागू गरेको छ ।

निर्देशनको पालना नगरे कडा कारबाही हुने भएकाले त्यसको पालन गर्न दूतावासले नेपाली श्रमिकलाई आग्रह गरेको छ ।

कतारबाट २० हजारभन्दा बढी कामदारको माग आएको र करिब ५ हजार भिसा लागेका कामदार कोरोना कारण रोकिने सम्भावना रहेको म्यानपावर व्यवसायीले जानकारी दिएका छन् । कोरोनाका कारण कतारको मात्र ९० हजार रोजगारी गुमेको व्यवसायी बताउँछन् ।

हाल कतारमा ४ लाखभन्दा धेरै नेपाली कार्यरत रहेको सरकारी अनुमान छ ।

मलेसिया

कोरोनाको दोस्रो लहरका कारण जनवरी १३ देखि मलेसियामा संकटकाल घोषणा भएको छ । क्रमण फैलिएसँगै कोरोना नियन्त्रणका लागि मलेसिया सरकारले संकटकाल लागू गरेको हो । यो संकटकाल ६ महिनासम्म जानेसक्ने बताइएको छ । तर, संक्रमण घटे संकटकाल घट्न सक्ने जनाइएको छ ।

मलेसियास्थित नेपाली दूतावासले कोरोनाबाट बच्न सतर्कता अपनाउन र मलेसिया सरकारको निर्देशन पालन गर्न नेपाली कामदारलाई आग्रह गरेको छ ।

कोरोनाका कारण एक वर्षदेखि मलेसिया कामदार पठाउन नसकेको तथा कोरोनाको दोस्रो लहरले झन् समस्या सिर्जना गरेको म्यानपावर व्यवसायीहरूले बताएका छन् । कोरोना तथा सरकारको नीतिका कारण मलेसियामा तीन वर्षको अवधिमा ३ लाख रोजगारी गुमेको व्यवसायीको दाबी छ ।

दक्षिण कोरिया

कोरोना भाइरसका कारण नेपाली कामदारका लागि दक्षिण कोरियाको रोजगारी बन्द छ । भाषा परीक्षा पास गरेका १२ हजारभन्दा धेरै कामदार कोरिया जान पाएका छैनन् ।

कोरिया सरकारले सन् २०२० देखि ईपीएस परीक्षा सञ्चालन गरेको छैन । नेपालमा सन् २०२१ मा पनि कोरियन भाषा परीक्षा हुने सम्भावना देखिएको छैन ।

साउदी अरब

साउदी अरबले पनि कोरोनाका कारण यात्रा, सार्वजनिक स्थल र व्यापारिक गतिविधिमा रोक लगाएको छ । व्यापारिक मल तथा रेस्टुरेन्टहरूमा मानिसको आवतजावतमा सीमित संख्या तोकिएको छ ।

साउदीले पूर्ण रूपमा लकडाउन नगरे पनि स्वास्थ्य मापदण्ड लागू गरेको छ । कोरोना नियन्त्रणको लागि आफ्ना अन्तर्राष्ट्रिय उडानहरू बन्द गरेको छ । मे १७ देखि मात्र उडान खुला गर्ने बताइएको छ ।

साउदीमा रहेका आप्रवासीहरूलाई कोरोनाको खोप निःशुल्क प्रदान गरिँदै आएको छ । कोरोनाकै कारण साउदी जान भिसा लागेका ७ हजार नेपाली कामदार प्रभावित भएको म्यानपावर व्यवसायीले बताएका छन् ।

साउदीबाट २५ हजारभन्दा धेरै कामदारको माग आए पनि कोरोनाका कारण रोकिएको उनीहरूको भनाइ छ ।

यूएई

कोरोनाको संक्रमण पुन: फैलिए पनि यूएईले लकडाउन गरेको छैन । स्वास्थ्यका मापदण्ड अनिवार्य गरी सार्वजनिक स्थल खोलिएको छ । कोरोना विरुद्धको भ्याक्सिन सातै इमिरेट्सहरूका तोकिएका स्वास्थ्य केन्द्रहरूमा निःशुल्क उपलब्ध गराइएको छ ।

यूएईले स्वदेशी तथा विदेशी नागरिकलाई निःशुल्क खोप उपलब्ध गराएको छ । नेपाली कामदारले पनि ती केन्द्रमा गएर भ्याक्सिन लगाउन सक्ने यूएईस्थित नेपाली दूतावासले जनाएको छ ।

तोकिएको स्वास्थ्य प्रोटोकलहरूको पूर्ण पालना गरी सतर्कता अपनाउन नेपाली श्रमिकलाई दूतावासले आग्रह गरेको छ ।

यूएई जान भिसा लागेका करिब ५ हजार कामदार प्रभावित भएको म्यानपावर व्यवसायीको दाबी छ । कोरोना भाइरसका कारण २० हजारभन्दा धेरै माग गुम्ने अवस्था रहेको व्यवसायीले जानकारी दिएका छन् ।

कुवेत

कुवेतले पनि कोरोनाबाट बच्न स्थानीय सरकारले जारी गरेको स्वास्थ्य सुरक्षासम्बन्धी निर्देशन, प्रोटोकल एवं पूर्वसावधानी अपनाउन देशविदेशका नागरिकलाई आग्रह गरेको छ । सामाजिक दूरी कायम गर्ने, भीडभाडमा नजाने, मास्क तथा पञ्जाको प्रयोग गर्नेलगायतका स्वास्थ्य मापदण्ड पालना गर्न कुवेतस्थित नेपाली दूतावासले आग्रह गरेको छ । कोरोना सङ्क्रमण बढेसँगै कुवेतमा अप्रिल २२ तारिखसम्मको लागि रात्रिकालीन कर्फ्यु लागू भएको छ ।

कुवेत जानका लागि भिसा लागेका २ हजारभन्दा धेरै कामदार कोरोनाका कारण रोकिएको म्यानपावर व्यवसायीले जानकारी दिएका छन् । कोरोनाका कारण ४ हजारभन्दा धेरै माग गुम्ने जोखिम बढेको उनीहरूको भनाइ छ ।

ओमान

ओमानमा इस्लाम धर्मावलम्बीहरूको पवित्र महिना रमजान चलिरहेको छ । रमजानको अवधिभर अप्रिल १२ देखि मार्च १२ सम्म लागू हुने गरी साँझ ९ बजेदेखि बिहान ४ बजेसम्म सम्पूर्ण व्यापारिक गतिविधि तथा सवारी साधन र मानिसहरूको आवतजावतमा रोक लगाइएको छ ।

ओमानमा विदेशी कामदारलाई निःशुल्क कोरानाविरुद्धको खोप लगाइँदै छ । ओमान पनि रोजगारीमा जान भिसा लागेका कामदार जान पाएका छैनन् भने ओमानबाट आएका मागसमेत गुम्ने थालेको म्यानपावर व्यवसायीले बताएका छन् ।

बहराइन

बहराइनमा रमजानको बेला मस्जिद खोलिएका छन् तर कोरोनाको खोप लगाएका व्यक्तिलाई मात्र मस्जिदमा प्रवेश गर्न दिइएको छ । मस्जिदभित्र गएर प्रार्थना गर्न कोरोनाको खोप लगाएको प्रमाणपत्र अथवा कोरोना निको भएको प्रमाणपत्र साथमा हुनुपर्नेछ ।

बहराइनमा अहिले व्यापारिक क्रियाकलापहरूलाई केही खुकुलो गरिएको छ । स्वास्थ्य मापदण्ड अपनाएर व्यापारिक क्रियाकलाप सामान्य रुपमा नै चलिरहेका छन् ।

कोरोना भाइरसका कारण बहराइनको रोजगारीसमेत प्रभावित भएको छ । बहराइनबाट कामदारको माग ल्याउन समेत समस्या भएको म्यानपावर व्यवसायीहरु बताउँछन् ।

प्रकाशित मिति: सोमबार, वैशाख ६, २०७८ ०७:२२