सिरहामा बोक्सी आरोपमा महिलालाई कुटपिट गर्दै मलमूत्र खुवाइयो, गाउँमै मिल्न पीडितलाई दबाब

सिरहामा बोक्सी आरोपमा महिलालाई कुटपिट गर्दै मलमूत्र खुवाइयो, गाउँमै मिल्न पीडितलाई दबाब

A+ A A-

सिरहामा बोक्सी आरोपमा एक महिलामाथि अमानवीय व्यवहार भएको छ । औरही गाउँपालिका-५ की ५० वर्षीया हीरादेवी साहलाई बोक्सी आरोपमा निर्घात कुटपिट गर्दै मलमूत्र खुवाइएको छ ।

गाईलाई टुना लगाएर मारेको भन्दै शनिबार बिहान साढे ६ बजे भतिजा र बुहारीहरूले कुटपिट गरी जबर्जस्ती मलमूत्र खुवाएका खुवाएका छन् । आफूमाथि जेठाजुका छोरा र बुहारीले कुटपिट गर्दै मानव मलमूत्र खुवाएको हीरादेवीले बताइन् ।

भतिज घुरन साहले हात समातेर भुइँमा लडाएको र बुहारीहरू कौशिला, निशा र कविताले जबर्जस्ती मानव मलमूत्र खुवाएको उनले बताइन् । २ वैशाखमा जुडशीतलका दिन हीरादेवी जेठाजुका छोराबुहारीलाई पानी बोकेर आशीर्वाद दिन उनीहरूको घर पुगेकी थिइन् । पानी छर्किने क्रममा घरमा रहेको गाईमाथि पानी परेको थियो ।

जीउमा पानी परेको गाईको शनिबार बिहान मृत्यु भएपछि टुना गरेर गाई मारेको भन्दै हीरादेवीमाथि अमानवीय व्यवहार भएको हो । गाई मरेको देखेपछि भतिज र बुहारीहरूले तथानाम गाली गर्न थालेको र सडकमा घिसार्दै कुटपिट गर्न थालेको पीडितले बताइन् ।

घुरनले पाखुरा र हात समातेर भुइँमा लडाएको र बुहारीहरूले जबर्जस्ती मलमूत्र खुवाएको उनको भनाइ छ । उनीमाथि अमानवीय व्यवहार भइरहँदा पनि स्थानीय भने रमिते बनेर हिरिरहे । गाईलाई आफूले नभई घुरनले नै पानी छर्केको तर, आरोप आफूलाई लगाएर अमानवीय व्यवहार गरेको उनको दु:खेसो छ ।

हीरादेवीका श्रीमान् रामचलितर साह रोजगारका क्रममा भारतको चण्डीगढमा छन् । उनी छोराछोरीसहित घरमा बस्दै आएकी छन् । उनीमाथि कुटपिट हुँदा दुई छोरी र एक छोरामध्ये जेठी छोरी मात्र घरमा थिइन् । उनले आमालाई बचाउने प्रयास त गरिन्, तर केही चलेन । पीडित हीरादेवीले दोषीमाथि कडा कारबाही गर्न माग गरेकी छिन् ।

गाउँमै मिल्न पीडितलाई दबाब

आफूमाथि अमानवीय व्यवहार भएपछि पीडित साह उजुरी गर्न प्रहरी चौकी औरही पुगिन् । तर, स्थानीय श्रीदेव यादवलगायतले गाउँमै मिलापत्र गर्ने गरी उनलाई फर्काएर ल्याए । आफन्तबीचको घटना भएकाले प्रहरीमा जानुभन्दा गाउँमै मिल्नु राम्रो हुन्छ भनेर फर्काएको श्रीदेवले बताए ।

बोक्सी आरोपमा कुटपिट गर्ने र मलमूत्र खुवाउने घटनाका दोषीलाई कानुनी कारबाही गर्नुको सट्टा गाउँमै पञ्चायती गरेर मिलापत्र गराउने तयारी स्थानीय अगुवाको छ । प्रहरीमा नजान उनीहरूले पीडितलाई दबाब दिइरहेका छन् ।

यता, बोक्सी आरोप लगाउँदै काकीलाई यातना दिने घुरन साह भने फरार छन् । प्रहरीले सो घटनामा संलग्न कौशिला, निशा र कवितालाई पनि नियन्त्रणमा लिएको छैन ।

प्रहरी चौकी औरहीका इन्चार्जसमेत रहेका प्रहरी सहायक निरीक्षक कलानन्द यादवले घटनाबारे लिखित उजुरी नआएकाले कसैलाई नियन्त्रणमा नलिइएको बताए ।

प्रकाशित मिति: आइतबार, वैशाख ५, २०७८ १७:००