‘बाहिर गोलीको आवाज आइरहेछ, घरभित्र बसेर मृत्यु पर्खिरहेजस्तो लाग्छ'

A+ A A-

म्यानमारको मोगोक नगरमा तीन पुस्तादेखि बसोबास गर्दै आएका ८८ वर्षीय 'आचार्य बा'लाई कति बेला सैनिकले गोली हानेर मार्छन् भन्ने चिन्ता छ । उनी बेला–बेला झ्यालबाट बाहिरको सुनसान सडक हेर्छन् । गोलीको आवाज सुनेपछि आत्तिएर झ्याल बन्द गर्ने गरेको उनी बताउँछन् ।

'मर्ने बेला त भएकै हो । तर, कति बेला तातो गोली खाएर मरिन्छ भन्ने हो,' उनले शिलापत्रसँग भने, ‘बाहिर सेनाले चलाएको गोलीको आवाज मात्र सुनिन्छ । घरभित्र परिवारका सबै जना सदस्य एक–अर्काेलाई हेर्दै कति बेला मारिने हौँ भनेर बाँचेका छौँ ।’

उनी अगाडि भन्छन्, ‘सडकमा निस्किएका मान्छेलाई सेनाले गोली ठोकेर मारिरहेका छन् । आफन्तले शव उठाउन पाएका छैनन् । सडक रगतले पोतिएको छ । घाइते र मरेका व्यक्तिलाई आफन्तले मेरो मान्छे भन्न पाएनन् ।’

सेनाले नियन्त्रणमा लिएका नागरिकलाई समेत परिवारको आँखैअगाडि गोली ठोकेर मारिरहेको उनको भनाइ छ ।

म्यानमारको पहिलेको राजधानी याङ्गुनमा शनिबार ५ घण्टासम्म सेनाले गोली चलायो । यहाँ धेरै नेपालीभाषी नागरिक बसोबास गर्दै आएका छन् । म्यानमारमा सैनिक कुविरुद्ध नेपालीभाषी नागरिकसमेत आन्दोलनमा उत्रिएका छन् ।

याङ्गुन र मोगोक शहरमा सेनाले घर–घरमा पसेर गोली हान्ने गरेको म्यानमार देशीय गोर्खा संघका पूर्वमहासचिव लक्ष्मण न्यौपानेले जानकारी दिए । मोगोकमा ठूलो बम विस्फोट भएको तथा यङ्गुनमा शनिबार सेनाले ५ घण्टा गोली चलाएको उनले बताए । त्यसक्रममा गोली लागेर धेरै घाइते भएको न्यौपानेले बताए ।

‘बाहिर गोलीको आवाज आइरहेको छ । घरभित्र परिवारसँग बसेर मृत्यु पर्खिरहेजस्तो लाग्छ । कति बेला सैनिकले चलाएको गोली झ्यालबाट भित्र पसेर परिवारका कुन सदस्यको मृत्य हुने हो, थाहा छैन,’ न्यौपानेले भने, ‘म्यानमारका सेनाले बालबच्चा पनि भन्दैन । घरबाहिर सामान्य काममा निस्किएका सर्वसाधारणलाई गोली ठोकिरहेको छ ।’

सैनिकले निर्दोष बालबालिकालाई समेत गोली हान्ने गरेको उनको भनाइ छ । देशीय गोर्खा संघका अनुसार हलसम्म गोली लागेर तीन जना नेपालीभाषीको मृत्यु भएको छ । तीन जना घाइते भएका छन् । २१ जना थुनामा परेकोमा ११ जनालाई मात्र छाडिएको छ ।

म्यानमारका ३६ वटा नगरमा नेपाली मूलका मानिसहरू बसोबास गर्छन् । ती नेपाली भाषीमाथि पनि सेनाले दमन गरिरहेको उनीहरूको भनाइ छ । म्यानमारमा १ लाख ५० हजारभन्दा धेरै नेपालीभाषी रहेको संघले जानकारी दिएको छ ।

गत १ फेब्रअरीमा म्यानमारको सेनाले शासन आफ्नो हातमा लिएको थियो । त्यसयता म्यानमारमा भइरहेको प्रदर्शनमा सेनाले व्यापक दमन गरेको छ ।