यो कस्तो देखासिकी ? सक्कली रुख काटेर धमाधम कंक्रिट प्रतिमा ठड्याउँदैछन् स्थानीय तह

यो कस्तो देखासिकी ? सक्कली रुख काटेर धमाधम कंक्रिट प्रतिमा ठड्याउँदैछन् स्थानीय तह

A+ A A-

पर्यटक लोभ्याउने नाममा प्राकृतिक बोटविरुवा मासेर स्थानीय सरकारहरू कंक्रिटका प्रतिमा बनाउन तल्लीन देखिएका छन् । केन्द्र सरकारको 'भ्युटावर मोह'बारे आलोचना सेलाउन नपाउँदै स्थानीय तहहरू प्रकृति मासेर नक्कली प्रतिमाहरू ठड्याउन उद्यत देखिएका हुन् ।

हालै मात्र संखुवासभाको धर्मदेवी नगरपालिका–३ मुढे बजारमा बनाइएको चाँपको रुखाकार प्रतिमाबारे सामाजिक संजालमा चर्चा भइरहेको छ । सक्कली रुख मासेर नक्कली बनाएको भन्दै सामाजिक सञ्जालमा धेरैले नगर सरकारको आलोचना गरेका छन् ।

‘यस्तो किन ?’

नगरप्रमुख रमेशकुमार जिमिले बस्ती बढेसँगै जंगल मासिएकाले त्यसको अस्तित्वका लागि रुखको प्रतिमा खडा गरिएको तर्क गरे । उनका अनुसार अहिले कंक्रिटको प्रतिमा राखिएको स्थान चाँप डाँडामा पहिले चाँपको जङ्गल थियो । तर, विस्तारै बस्ती बढेसँगै जङ्गल मासिन थालेपछि पहिचान जोगाउन प्रतिमा बनाइएको उनको भनाइ छ ।

‘जंगल मासिँदा बिरुवा रोप्ने कि नक्कली रुख खडा गर्ने ?’

उनको जवाफ छ, ‘रुखकै बगैँचा बनाउन खाेज्दा पर्याप्त जग्गा पाइएन, त्यसैले यस्तो बनाइएको हो ।’ नगरप्रमुख जिमिले त्यो प्रतिमा तयार गर्दा नगरपालिकाको ३२ लाख रुपैयाँ सकिएको बताए ।

एक स्थानीवासीका अनुसार प्रकृतिको दोहन गर्ने सिलसिला यहाँ अहिले मात्र होइन, पहिले देखिकै हो । नक्कली रुख बनाइएको स्थान छेउमा एउटा बसपार्क छ, जुन पोखरी मासेर बनाइएको हो ।

नक्कली रुखको तस्वीर हिजाेआज फेसबुक, ट्विटरमा भाइरल छ । तर, त्यो एक वर्ष अगाडि नै बनेको थियो । नगरप्रमुख जिमिका अनुसार रुखको त्यो प्रतिमा बनाउन झण्डै तीन वर्ष लागेको थियो ।

तर कंक्रिट नै किन ?

नगरपालिकाले देखासिकी गरेको उनको जवाफबाट पुष्टि हुन्छ । ‘दैलेखको गुराँस गाउँपालिकाले गुराँसपार्क बनाउने भयो । हामीले पनि केही त गर्नैपर्छ भनेर चाँपे डाँडाको पहिचान बचाउन प्रतिमा खडा गरेका हौँ’, उनले भने, ‘योजना सुनाएका बेला कसैले केही भनेनन्, बनिसकेपछि विरोध गरे ।’ बेलैमा उचित सुझाव नपाएकोमा भने उनको गुनासो छ ।

मेयर जिमिले देखासिकी गरेको पार्क तथा भ्यूूटावर दैलेखको गुराँस गाउँपालिका–५ मा पर्छ, जुन बनिसक्नै लागेको छ । गाउँपालिकाकी उपाध्यक्ष दीपा बीसीका अनुसार कर्णाली प्रदेश सरकार र गाउँपालिकाको संयुक्त लगानीमा पार्क तयार गर्न लागिएको हो । पार्क बनाउन ८० लाख रुपैयाँ खर्च भइसकेको उनले बताइन् ।

बिस्मातको कुरा त के भने, यसअघि भएका रुखबिरुवा फाँडेर बनाउन लागिएको पार्कमा कंक्रिटकै रुखविरुवा बनाउने तयारी छ । उपाध्यक्ष बीसीले पार्क बनिसकेपछि सक्कली बोटविरुवा रोप्ने बताइन् ।

दैलेख र संखुवासभा मात्र होइन, अहिले देशका धेरै स्थानीय तहमा कंक्रिट मोह देखिन्छ, जहाँ उनीहरू बोटविरुवा मासेर नक्कली प्रतिमा खडा गर्न तल्लीन छन् ।

जस्तो कि, सिन्धुली कमलामाई नगरपालिकाको लोकतान्त्रिक चोकमा कृत्रिम जुनारको रुख बनाइएकाे छ, जुन सिमेन्टको हो । त्यो बनाउन सक्कली रुख मासिएको थियो ।

विकासको नाममा भएका यस्ता कार्यलाई उट्पट्याङ ठान्छन् पूर्वाधारविद् सूर्यराज आचार्य । ‘हाम्रो राजनैतिक नेतृत्वदेखि प्राविधिक तहसम्म सौन्दर्य चेतको पर्याप्त ज्ञान नभएकोले यस्ता उट्पट्याङ भइरहेका छन्’, उनले भने ।

आचार्यका अनुसार आर्थिक र सामाजिक विकासमा भौतिक विकास कसरी जोडिन्छ भनेर पहिला स्पष्ट हुन आवश्यक छ । स्थानीय तहमा भएका आर्किटेकले नक्सा पास गर्नेबाहेक अरु केही काम नगरेकोमा उनले चिन्ता व्यक्त गरे । ‘संघीय तहमा नै हाम्रो भौतिक विकासको स्वरुप कस्तो हुने भन्नेमा कुनै स्पष्टता छैन’, उनले भने, ‘अनि स्थानीय तहको त के कुरा गर्नु ?’

त्यसैले हाम्रा हरेक स्थानीय तहका प्राविधिकलाई व्यवस्थित शहरीकरणबारे प्रशिक्षण दिन आवश्यक रहेको आचार्य बताउँछन् । भन्छन्, ‘के भइरहेको छ भनेर अलोचना मात्र गर्ने भन्दा पनि किन यस्तो भइरहेको छ भन्नेतिर अब हाम्रो बहसलाई केन्द्रित गर्न जरुरी छ ।’

प्रकाशित मिति: शनिबार, वैशाख ४, २०७८ ०९:४०