उपप्राध्यापक प्रेम चलाउने आक्रमण काण्डलाई सांसद भीमसेन प्रधानले विद्यार्थी झगडा भनेपछि...

उपप्राध्यापक प्रेम चलाउने आक्रमण काण्डलाई सांसद भीमसेन प्रधानले विद्यार्थी झगडा भनेपछि...

A+ A A-

संसदीय सुनुवाइ समितिमा शुक्रबार दिउँसो सांसद भीमसेनदास प्रधान अदालतले राजनीतिक पूर्वाग्रह राखेर न्याय सम्पादन गर्ने गरेको आरोप लगाउँदै थिए । उनले भने, ‘विद्यार्थीको झगडामा अदालतले राजनीतिक आस्थाका आधारमा ३६ लाख रुपैयाँ धरौटी मागेको छ ।’

प्रधानले यस्तो आरोप लगाइरहँदा संसदीय सुनुवाइका लागि सामुन्नेमा थिए, पाटन उच्च अदालतका मुख्य न्यायाधीश कुमार चुडाल । र, ३६ लाख धरौटी मागेको मुद्दा हो, प्रधानको दल नेपाली कांग्रेस समर्थित नेविसंघका नेताविरुद्ध परेको ज्यान मार्ने उद्योग । त्रिभुवन विश्वविद्यालय समाजशास्त्र विभागका उपप्राध्यापक प्रेम चलाउनलेमाथि हमला गर्ने नेविसंघका दुई नेतासहित सात जनाको मुद्दामा अदालतले धरौटी रकम लिने आदेश दिएको थियो ।

आदेश दिनेमध्येका एक न्यायाधीश उनै चुडाल हुन् । सर्वोच्च अदालतकाे न्यायाधीश सिफारिसमा परेका चुडाल र नहकुल सुवेदीविरुद्ध परेको उजुरीमा संसदीय सुनुवाइ हुँदै थियाे । त्यही क्रममा चुडालाई प्रधानले राजनीतिक पूर्वाग्रहसहित आदेश आएको जिकिर गरेका हुन् ।

जवाफमा चुडालले ज्यान मार्ने उद्योगमा मुद्दा चलेको र कानुनअनुसार नै धरौटी रकम मागिएको बताए । ‘एक जनालाई ३६ लाख रुपैयाँ मागिएको होइन । व्यक्ति धेरै भएकाले ठूलो रकम देखिएको होला,’ सांसद प्रधानले उठाएको जिज्ञासा शान्त पार्दै चुडालले भने, ‘त्यसमा उपचार खर्च पनि पर्छ ।’

चलाउनेलाई आक्रमण गर्ने विद्यार्थी छुटाउन कांग्रेस नेताहरूले ‘लबिङ’ गरिरहेको आरोप लागेको पृष्ठभूमिमा प्रधानले सार्वजनिक रूपमै न्यायालयले राजनीतिक पूर्वाग्रह पालेर आदेश दिएको सार्वजनिक अभिव्यक्ति दिए ।

गत २० असोजमा विश्वविद्यालय परिसरमै हमला हुँदा चलाउने बेहोस भएका थिए भने दाहिने खुट्टा अप्रेसन गर्नुपरेको थियो । सात महिनासम्म पनि उनी वैशाखीको सहाराले मात्र सामान्य हिँडडुल गर्छन् । प्रहरी अनुसन्धानबाट विश्वविद्यालयको नेविसंघ इकाइका हरि आचार्य र योगेन्द्र रावलको योजनामा आक्रमण भएको खुलेको थियो ।

आचार्य र रावलले बाहिरबाट आधा दर्जन मानिस खटाएर चलाउनेमाथि आक्रमण गर्न लगाएका थिए । रुपेश साह, सयुज श्रेष्ठ, रविनकुमार लामा, निरेन्द्र रानामगर र दीपकराज ओझा आक्रमणमा संलग्न थिए । सात जनाविरुद्ध प्रहरीले ज्यान मार्ने उद्योगमा मुद्दा दर्ता गराएको थियो ।

आचार्य र रावलबाहेक सबैलाई प्रहरीले पक्राउ गरेको थियो । दुई जना भने अदालतमा सुटुक्क हाजिर भएका थिए । अभियुक्तहरुलाई काठमाडौं जिल्ला अदालतले ३५ देखि ५५ हजार रुपैयाँ धरौटीमा छोड्ने आदेश दिएको थियो ।

थुनामा राखेर मुद्दा छिन्न माग गर्दै चलाउने पुनरावेदनका लागि उच्च अदालत पाटन गए । १३ फागुनमा उच्च अदालतका मु्ख्य न्ययाधीश चुडाल र न्यायाधीश किरणकुमार पोखरेलले ओझाबाहेक सबैलाई जनही ५ लाख रुपैयाँ धरौटी र पीडित उपप्राध्यापकको उपचारका लागि थप जनही एक लाख रुपैयाँ भराउन आदेश दिएको थियो । जिल्ला अदालतले मुद्दाको छिनोफानो गर्न भने बाँकी हुँदै पीडित चलाउने भने धरौटीमा छोड्ने दुवै तहका अदालतको निर्णयविरुद्ध सर्वोच्च अदालत पुगेका छन् ।

यही मुद्दाको प्रसंग सांसद प्रधानले सुनुवाइ समितिमा उठाएका हुन् । समितिमा प्रधानले यो प्रकरणलाई ‘विद्यार्थीको झगडा’को संज्ञा दिए ।

उच्च अदालतले मागेको धरौटी रकम पनि हरि आचार्यबाहेक अरुले दिएका छैनन् । चलाउनेले काठमाडौं जिल्ला अदालतमा उच्च अदालतको आदेश कार्यान्वयनको निवेदन दिएका छन् ।

जिल्ला अदालतले ओझाबाहेक सबैले अदालतले दिएको तारेख गुजारेको पत्र दिएको छ । जबकि उच्च अदालतले धरौटी र क्षतिपूर्तिको रकम दाखिला नगरेमा थुनामा राखेर मुद्दा सुनुवाइ गर्न आदेश दिएको छ ।

प्रकाशित मिति: शुक्रबार, वैशाख ३, २०७८ १७:३९