लुम्बिनी प्रदेश : अनिर्णीत जसपा, निरीह प्रतिपक्ष

A+ A A-

जनता समाजवादी पार्टी अनिर्णीत हुँदा लुम्बिनी प्रदेश सरकारविरुद्धको अविश्वास प्रस्ताव अलमलमा परेको छ ।

गत साता अविश्वासको प्रस्ताव दर्ता गर्न प्रमुख प्रतिपक्ष दल नेपाली कांग्रेस, माओवादी केन्द्र र जसपाले मुख्यमन्त्री शंकर पोखरेलविरुद्ध अविश्वास प्रस्ताव दर्ता गर्न भन्दै हस्ताक्षर संकलन सुरु गरेका थिए ।

आफूविरूद्ध अविश्वास प्रस्ताव दर्ता हुन लागेको जानकारी पाएपछि मुख्यमन्त्री पोखरेलले साँझ जसपाका प्रमुख सचेतक सन्तोष पाण्डेसँग सत्ता साझेदारीका विषयमा छलफल गरे ।

जसपाको केन्द्रमा देखिएको विवाद प्रदेशमा पनि छ । लुम्बिनीमा जसपाका ६ सांसदमध्ये ३ जना पोखरेल सरकारको पक्षमा र तीन जना उनको बहिर्गमनको पक्षमा छन् । जसका कारण जसपाले निर्णय गर्न सकेको छैन ।

अविश्वासको प्रस्ताव दर्ता गर्न हस्ताक्षर संकलन गर्न सुरु गरे पनि सरकार फेरबदलको निर्णायक मोडमा मुख्यमन्त्री पोखरेलको सत्ता साझेदारीको प्रस्ताव गरेपछि अल्मलिएको छ । कांग्रेस पनि दुविधामा छ ।

उता जसपासँग छलपफलमा रहेका पोखरेलले माओवादीबाट मन्त्री बनेकालाई हटाइहालेका छैनन् । जसपासंग गठबन्धनको टुंगो लागे माओवादीका मन्त्री हटाएर जसपाका २ जनालाई मन्त्री बनाउने पोखरेलको तयारी छ ।

लुम्बिनीमा माओवादीका तर्फबाट कुल प्रसाद केसी आन्तारिक मामिला तथा कानुनमन्त्री र सुदर्शन बराल सामाजिक विकासमन्त्री छन् ।

जसपाले गठबन्धन निर्माणका मुख्यमन्त्री पोखरेलसँग तीन वटा मन्त्रालय माग गरेको छ । उता कांग्रेस र माओवादीसँगको छलफलमा भने जसपाले प्रदेश सरकारको नेतृत्व दाबी गरेको छ ।

जसपाका सचेतक सन्तोष पाण्डेले पक्ष विपक्षमा भन्दा पनि केन्द्रको निर्णय नआएकाले नै सरकारमा जाने वा नजाने भन्ने विषयमा अन्यौल रहेको बताए ।

माओवादी केन्द्र, कांग्रेस, जसपा र जनमोर्चाको १ जना सांसद एकातिर उभिँदा बहुमत पुग्छ । जसपाले भने एमाले र एमालेइतरलाई निर्णय दिइसकेको छैन ।

जसपाका प्रमुख सचेतक पाण्डे सरकारमा रहेको माओवादी केन्द्रले अविश्वासको प्रस्ताव ल्याउँछु भन्दै हिँड्नु गलत भएको बताउँछन् । सरकारविरूद्ध अविश्वासको प्रस्ताव ल्याउने भए माओवादीले सरकार छाड्नुपर्ने उनको तर्क छ ।

माओवादीकी सांसद दामा कुमारी शर्मा पनि लुम्बिनी सरकारविरूद्ध अविश्वास प्रस्ताव ल्याउनु त्यति सजिलो नभएको बताउँछिन् । ‘केन्द्रमा मोर्चा बनेछ भने प्रदेशमा त्यही अनुसार मोर्चा बन्ला । तर, केन्द्रमा अलमल भएको देखेर यहाँ पनि एकढिक्का भएको अवस्था छैन,’ शर्माले भनिन् ।

प्रदेशसभामा नेपाली कांग्रेसका सचेतक फकरुद्दिन खानले जसपा अनिर्णीत बन्दा सरकारविरुद्धको सबै काम प्रभावित भएको बताए ।

प्रकाशित मिति: बुधबार, वैशाख १, २०७८ १०:१७