क्यामेराको बटन दाब्नुअघि चलचित्रकर्मीको डर, 'बर्बाद भइने हो कि !'

A+ A A-

निर्माता रोज राणाले 'खलनायक २' चलचित्र बनाउने घोषणा गरेको दुई वर्ष भयाे । गएकाे भदौबाटै फिल्मको छायांकन थाल्ने उनकाे तयारी थियाे । तर, कोरोनाले उनको योजना तुहाइदियो ।

उनले त्यही फिल्म अब २०७८ सालमा खिच्ने तय गरे । तर, याे वर्ष काेराेनाकाे दाेस्राे लहरकाे भयले याे याेजना पनि असफल हुने सक्नेमा उनी चिन्तित छन् । भन्छन्, 'थालाैँ कि नथालाैँ अन्याेलमा छु । फिल्म भनेको सानो लगानी होइन । तत्काल लगानी गरेर फिल्म त खिचौँला, तर रिलिज गर्ने माहोल बनेन भने त डुबियो नि !'

रोजले फिल्मको लागि कलाकार छानेका छैनन् । 'अहिले कलाकार अनुबन्धित गर्दा केही पैसा दिनुपर्छ । तर, पछि फिल्म खिच्ने वातावरण बनेन वा फिल्म बनाएर पनि रिलिज गर्नसक्ने स्थिति रहेन भने समस्या पर्छ', उनले भने, 'त्यसैले पर्ख र हेरमा छु ।'

रोजजस्तै दुविधामा छिन्, अभिनेत्री तथा निर्माता रेखा थापा ।

रेखाले पनि गत वर्ष फिल्मको छायाँकन गर्ने सोच बनाएकी थिइन् । उनले कलाकारदेखि प्राविधिकसम्मलाई पारिश्रमिक नै दिइसकेकी थिइन् । तर, कोरोनाका कारण उनकाे फिल्म रोकियो ।

अहिले रेखा पनि अन्याेलमा छिन् । फिल्म खिचौँ, रिलिज गर्ने कसरी ? नखिचौँ, आधा लगानी भइसक्यो । भन्छिन्, 'के गर्ने-गर्ने ? साह्रै दुविधामा परियो ।'

माहोल केही साम्य भए यसै वर्ष फिल्‍मको बाँकी काम पूरा गर्ने उनकाे याेजना छ ।

निर्माता बन्न लागेका अभिनेता धिरेन शाक्यले त काम थाल्ने आँट गर्नै सकेका छैनन् । फिल्म बनाउने घोषणा गरि पनि अहिलेको अवस्थामा फिल्म खिच्ने हिम्मत नआएकाे उनी बताउँछन् ।

'हामी त खुट्टा उचालेर बसेका छौँ, तर खोइ त काम गर्ने माहोल नै बनेको छैन । फेरि कोरोना सुरु हुन्छ भन्ने हल्ला छ', धिरेन भन्छन्, 'यस्तो अवस्थामा कसरी काम गर्नु र !'

तेलुगु फिल्म 'अर्जुन रेड्डी'को नेपाली रिमेकका लागि निर्माण पक्षले मुख्य कलाकारको छनोट गर्न अडिसन लिइसकेको छ । अब कलाकार टुंगाे लगाउने अन्तिम तयारी छ । तर, तत्काल फिल्मको काम सुरु गर्न भने निर्माण पक्ष डराइरहेको छ ।

'अहिलेकै अवस्थामा फिल्म थाल्ने सोच छैन । जे छ कोरोनाकै हातमा छ ।' विशालका अनुसार कोरोना कहरले छाडे उनको टिम २०७८ मै फिल्मको काम थाल्ने छ', निर्देशक विशाल सापकोटाले भने ।

'छक्का पञ्जा' टिम पनि यतिबेला अन्योलमै छ । २०७८ मा नयाँ फिल्म बनाउने कि नबनाउने भन्नेमा टिमले निर्णय गर्न सकेकाे छैन ।

निर्देशक दीपाश्री निरौला भन्छिन्, 'हाम्रो चाहाना भनेको २०७८ सालमा एउटा फिल्म दिने भन्ने नै छ । तर, समय यस्तो भइदियो, दिन्छौँ नै भनेर तोक्न सकिने अवस्था रहेन । माहोल राम्रो भयो भने पक्कै एउटा फिल्म बनाउनेछौँ ।'

छक्का पञ्जाकै सिरिजमा काम गर्ने वा अन्य कुनै फिल्ममा काम गर्ने पनि अहिले टुंगो नभएको दीपाश्रीले सुनाइन् ।

'बुलबुल' फ्रेम्ड निर्देशक विनोद पौडेल नयाँ फिल्मकै तयारीमा छन् । र्‍यापर र महिला प्रहरीको कथालाई फिल्ममा उतार्ने उनकाे याेजना छ ।

निर्देशक विनोद याे फिल्मको काम २०७८ मा नै गर्न चाहन्छन् । तर, उनी ढुक्क छैनन् । भन्छन्, 'कोरोनाले कुन रूप लिन्छ, धेरै कुरा त्यसैमा निर्भर छ ।'

निर्देशक प्रदीप भट्टराई नयाँ फिल्मकाे कथा लेखिरहेका छन् । याे वर्ष त्यही कथालाई सिँगारपटार गर्ने उनकाे याेजना छ । भन्‍छन्, 'कोरोनाले छाेड्याे भने फिल्म नै बन्छ । छाेडेन भने पनि काेही बात छैन, कथा/पटकथामा विशेष मिहिनेत गर्नेछौँ ।'

निर्देशक मीन भाम 'चिसो वर्ष'को छायाँकनकाे तयारीमा छन् । याे वर्ष फिल्मकाे छायाँकन सक्ने लक्ष्य उनले राखेका छन् ।

निर्माता सन्तोष सेन मुम्बईको दौडधुपमा छन् । फिल्‍म 'प्रेम गीत ३' लाई भारतमा रिलिज गर्न उनी संघर्षरत छन् । भन्छन्, 'नेपाली फिल्मले कहिले पनि मार्केट खोजेन । यो कोरोनाले हामीलाई मार्केट खोज्ने समय दिएको छ । त्यसैले म नेपाली फिल्म बजार विस्तारका लागि पहल गरिरहेकाे छ ।'

घोषणा भइसकेकाे फिल्म 'हुतुतु' यसै वर्ष बनाउने याेजना पनि बनाएका छन् उनले ।

यता निर्देशक दिनेश राउत फिल्म 'प्रकाश' को छायाँकनमा व्यस्त छन् । २०७८ मा उनले 'प्रकाश'बाहेक सोचेका छैनन् । उनी भन्छन्, '२०७८ का लागि त प्रकाशलाई नै राम्रो बनाउने सोचिन्छ । समय राम्रो भएछ भने यसै वर्ष प्रकाश रिलिज गर्नेछौँ ।'

जुम्ला पुगेर खिचिइरहेको 'प्रकाश'मा ग्रामिण भेगको शिक्षित युवाले शिक्षक बन्नका लागि गरेको संघर्षलाई देखाइने छ ।

प्रकाशित मिति: बुधबार, वैशाख १, २०७८ १५:५२