भीम रावलले गायब पारेको भनिएको ३० लाख रुपैयाँ सुवेदीको खातामा भेटियो

A+ A A-

तत्कालीन नेपाल कम्युनिस्ट पार्टी (नेकपा) को खाताबाट गायब भएको ३० लाख रुपैयाँ व्यक्तिको खातामा जम्मा भएको खुलेको छ ।

पार्टीभित्र विवाद बढ्दै गएपछि १३ पुसमा पार्टीको खातामा रहेको ३० लाख रुपैयाँ दिनेशचन्द्र सुवेदीको व्यक्तिगत खातामा रकमान्तर गर्न लगाएको खुलेको हो ।

विवादअघि तत्कालीन नेपाल कम्युनिस्ट पार्टी (नेकपा)को खातामा ३८ लाख रुपैयाँ थियो । पार्टी प्रदेश अध्यक्ष कर्णबहादुर थापा, सचिव नेपबहादुर चौधरी र कार्यालय सचिव दिनेशचन्द्र सुवेदीको हस्ताक्षरमध्ये कुनै दुई जनाको हस्ताक्षरले खाता सञ्चालन हुन सक्ने कानुनी व्यवस्था गरिएको थियो ।

केपी ओली र प्रचण्ड-माधव समूहबीच विवाद बढ्दै गएपछि १३ पुसमा रावलको निर्देशनमा पार्टीका प्रदेश सचिव चौधरी र कार्यालय सचिव सुवेदीले पार्टीको खातामा रहेको ३० लाख रुपैयाँ झिके । रकम झिकेको एसएमएस पार्टीका प्रदेश अध्यक्ष थापाले पाएपछि विवाद चर्कियो । प्रदेश सचिव माओवादी केन्द्रका तर्फबाट थिए भने कार्यालय सचिव सुवेदी माधव समूहका थिए ।

यसअघि सुदूरपश्चिम अध्यक्ष थापाले पार्टीको खातामा रहेको ३० लाख रुपैयाँ नेता भीमबहादुर रावलले नै गायब पारेको आरोप लगाएका थिए ।

प्रदेश इञ्चार्ज रहेका रावलले आफ्नो निर्देशनमा रकम झिकिएको स्वीकार समेत गरेका थिए । पार्टी अध्यक्ष थापालगायतकाले १९ चैतमा बैंक खाताको रहेको रकम कहाँ गयो भन्ने लिखित जानकारी माग गर्दै कृषि विकास बैंकलाई पत्र पठाएका थिए ।

२९ चैतमा उनीहरूको पत्रको जवाफ दिँदै बैंकले पार्टीको खाताबाट ३० लाख रुपैयाँ सुवेदीको व्यक्तिगत खातामा रकमान्तर गरिएको जानकारीसहितको पत्र पठाएको थियो ।

नेकपाको नाममा कृषि विकास बैंक धनगढी शाखामा रहेको २८२२५०१२६५४७७०१४ नम्बरको खाताबाट उक्त रकम सुवेदीको नाममा सोही बैंकमा रहेको ०८२१९०१२७५८७६०१७ नम्बरको खातामा रकमान्तर गरेको बैंकले जनाएको छ ।

प्रकाशित मिति: मंगलबार, चैत ३१, २०७७ १३:४०