गाउँका कसैले जंगलमा डढेलाे लगाए, आगोले खानेपानीकाे पाइप नै जलाइदियाे

A+ A A-

मकवानपुरकाे एउटा सिंगो गाउँ डढेलाेका कारण प्रभावित बनेकाे छ । बागमती प्रदेश राजधानी हेटौंडासँगै जोडिएको मकवानपुरगढीमा डढेलोले खानेपानी तथा सिँचाइका पाइपमा ठूलो क्षति पुगेको हाे ।

मकवानपुरगढीको सानोगढीबाट केही दिनअघि लगाइएको डढेलोले मकवानपुरगढी बृहत् खानेपानीको १ सय ४० एमएमको करिब १ सय मिटर तथा ५० एमएमको करिब १ सय मिटर पाइप नष्ट गरेकाे हो । प्रथम धवाडी सिँचाइ, माथिल्लो धवाडी सिँचाइ, धवाडी दोश्रो खानेपानी र धरमपानी खानेपानी अन्तर्गतका ४ सय मिटर पाइप नष्ट भएको धवाडी दोश्रो खानेपानी उपभोक्ता समूहका सचिव इमनाथ तिमल्सिनाले जानकारी दिए ।

भीर र अप्ठ्यारो ठाउँ भएकोले स्थानीयले आगो निभाउने प्रयास गर्दा पनि निभाउन नसकिएको तिमल्सिनाले बताए । यसैगरी मकवानपुरगढी बृहत् खानेपानी योजनाअन्तर्गतको भालुन्टार क्षेत्रमा ४० र ३२ एमएमको गरी २ सय मिटर र भानु माविनजिक ६३ एमएमको १ सय ५० मिटर पाइप डढेलोकै कारण नष्ट भएको बृहत खानेपानी उपभोक्ता समूहका अध्यक्ष विष्णुप्रसाद न्यौपानेले बताए । पाइप नष्ट हुँदा मकवानपुरगढी वडा नम्बर २, ३ र ४ का गरी करिब १५ सय घरपरिवार प्रभावित भएका छन् ।

नष्ट भएका ठाउँमा नयाँ पाइप ल्याई मर्मत गर्न समय लाग्ने भएकोले केही दिन पानी अभाव हुनसक्ने बताइएकाे छ । वैकल्पिक उपाय नहुन्जेल वा मर्मत कार्य अवधिभर पानीको प्रयोग कम गर्न तथा वैकल्पिक उपाय भए त्यसको प्रयोग गर्न आम उपभोक्तालाई अनुरोध गरिएको छ । कतै अन्जानका कारण डढेलो लाग्ने गरेको तथा कतै जानीजानी डढेलो लगाइँदा ठूलो नोक्सान भइरहेको छ ।

एक महिनादेखि मकवानपुरका विभिन्न स्थानमा डढेलोका कारण करिब ४ करोड क्षति भएको छ । जिल्ला प्रहरी कार्यालय मकवानपुरका अनुसार डढेलोका कारण चालु आर्थिक वर्ष २०७७/०७८ को हालसम्म ३ करोड ७० लाख क्षति भएको हो ।

प्रहरीको तथ्यांकअनुसार डढेलोका कारण ३८ घर जलेर नष्ट भएका छन् । डढेलोले एक हप्ताअघि मकवानपुरमा एक वृद्ध महिलाको मृत्यु र पाँच घाइते भएको प्रहरीले जनाएको छ । डढेलोले ३ पक्की र ३५ कच्ची घर जलेर नष्ट भएको प्रहरी नायब उपरीक्षक जयश्वर रिमालले जानकारी दिए । जिल्लामा २३ गोठ र ५० चौपाया जलेका छन् ।

प्रकाशित मिति: आइतबार, चैत २९, २०७७ २०:१०