सरकार भन्छ, 'काेराेना जाेखिम बढ्याे' तर भारतबाट हुलका हुल मानिस बिनापरीक्षण गाउँ पस्दैछन्

सरकार भन्छ, 'काेराेना जाेखिम बढ्याे' तर भारतबाट हुलका हुल मानिस बिनापरीक्षण गाउँ पस्दैछन्

A+ A A-

भारतमा कोरोनाको दोस्रो लहर सुरु भएसँगै त्यहाँ अस्थायी बसोबास गर्दै आएका नेपाली स्वदेश फर्किन थालेका छन् । एक सातायता नेपालसँग जोडिएका सिमानामा स्वदेश फर्किने नेपालीको लर्काे छ ।

यसरी घर फर्किनुअघि धेरैजसाे कोरोना परीक्षण नगरी आउने गरेका छन् । सीमानाकामा पनि सामान्य ज्वरो परीक्षण मात्र गरिन्छ ।

भारतमा रोजगारी, अध्ययन र पेसा, व्यवसाय गर्दै आएका नेपाली कोरोना भाइरसको दोस्रो लहर सुरु भएसँगै ठूलो समूहमा स्वदेश फर्किन थालेको अध्यागमन विभागले जनाएको छ । सुदूरपश्चिमका मुख्य दुई नाका कैलालीको गौरीफन्टा, कञ्चनपुरको गड्डाचौकी, मोरङको जोगबनी, झापाको काकाँडभित्ता, वीरजञ्ग, सुनौली नाकामा अहिले घर फर्किनेकाे घुइँचाे देखिन थालेकाे छ ।

नेपाल–भारतको सिमाना हुँदै दैनिक ३ देखि ५ हजार नेपाली स्वदेश फर्किइरहेकाे भए पनि उनीहरूको कोरोना परीक्षण गर्ने व्यवस्था सरकारले गरेको छैन । यसरी भारतबाट फर्किएका नेपालीलाई राख्ने क्वारेन्टाइन समेत छैन । जसले नेपालमा पनि भारतमा जस्तै संक्रमण दर ह्वात्तै बढ्ने जाेखिम बढेकाे जनस्वास्थ्यविद्हरू बताउँछन् ।

तर, कोभिड-१९ संकट व्यवस्थापन केन्द्र (सीसीएमसी) का सचिव खगराज बराल भने विदेशबाट फर्किएका नागरिकले कोरोना परीक्षण अनिवार्य गर्नुपर्ने तथा १० दिन हाेम क्वारेन्टाइन बस्नुपर्ने बताउँछन् । घरमा बस्दा परिवारमा जाेखिम हुन्छ, परिवारका सदस्य गाउँमा अरूसँग पनि घुलमिल हुन सक्छ । यसबाट जाेखिम बढ्दैन र ?

जवाफमा उनी भन्छन्, 'सम्बन्धित गाउँमा पर्याप्त क्वारेन्टाइनका लागि प्रदेश र स्थानीय सरकारसँग छलफल भइरहेकाे छ, छिट्टै एकखाले निर्णय आउँछ ।'

भारतसँग जाेडिएका नाकाबाट श्रीलंका, भुटान र बंगलादेशसम्म पुगेका नेपाली फर्किने गरेका छन् । भारतको रेलवे स्टेसनमा स्वदेश फर्किने नेपालीको भीडभाड रहेकाे भारतीय सञ्चारमाध्यमले जनाएका छन् । यसरी स्वदेश फर्किने नेपाली बस, रेलकाे भीडभाड छिचाेलेर घर आउनुपर्छ ।

प्रकाशित मिति: आइतबार, चैत २९, २०७७ १७:०५