प्रधानमन्त्रीकाे दाबी- तातोपानीको नस लिएर स्याँकसुँक गरे काेराेना चैट, डाक्टर भन्छन्- सरासर झुट

प्रधानमन्त्रीकाे दाबी- तातोपानीको नस लिएर स्याँकसुँक गरे काेराेना चैट, डाक्टर भन्छन्- सरासर झुट

A+ A A-

नेपाल चेम्बर अफ कमर्सको ७०औँ वार्षिक साधारणसभामा प्रधानमन्त्री केपी ओलीले दिएको अभिव्यक्तिलाई लिएर अहिले सामाजिक सञ्जालमा चर्को आलोचना भइरहेको छ । कोरोना भाइरससम्बन्धी भ्रामक अभिव्यक्ति दिएको भन्दै ओली आलोचित बनेका हुन् ।

‘पहिला कोरोना गएर नाकमा बस्ने हो, तातोपानीको नस लिएर स्याँकस्याँक सुँकसुँक गरियो भने भाइरस चैट,’ उक्त कार्यक्रममा प्रधानमन्त्रीकाे ठोकुवा थियाे । कोरोना निको पार्ने उपायबारे उनको सुझाव यत्तिमै सकिँदैन ।

‘नुनपानीले गालगुल गरिदियो, अझ सकिन्छ भने अम्बाका दुईवटा पात उमालेरै गालगुल गरिदियो भने घाँटीमा बसेको कोरोना भाइरस चैट, स्टिम लिइदिऊँ फोक्सोबाट पनि चैट’, उनले थपे, ‘शतप्रतिशत निको त भ्याक्सिनले पनि गर्दैन । केही प्रतिशत निको पार्ने हो, केही बाँकी रहन्छ, त्यही बाँकीभित्र परियो भने गइयो त ।’

के याे दाबी सही छ ?

कोरोना महामारीको सामना गर्न प्रधानमन्त्रीले भनेजस्तो सहज नभएको जनस्वास्थ्यविद्हरू बताउँछन् । बिहीबार ट्वीट गर्दै जनस्वास्थ्यविद् डा. अनुप सुवेदीले कोभिडको दोस्रो उभारमा कोही सिकिस्त भएमा अघिल्लो उभारमा भन्दा उपचार गर्न थप कठिन हुने र मृत्युदर पनि बढी देखिने सम्भावना रहेको टिप्पणी गरे । वायु प्रदूषणका कारण अहिले मानिसको फोक्सोमा असर गरेको बेला कोरोना सङ्क्रमण भए बिरामीलाई थप जोखिम हुन सक्ने उनकाे भनाइ छ ।

यस पटकको उभारमा कोभिड लागेर कोही सिकिस्त भएमा अघिल्लो उभारमा भन्दा उपचार गर्न बढी कठिन हुने, मृत्युदर बढी देखिने सम्भावना ठूलो छ। केही कारणः
१. नयाँ भेरिएन्टहरूको संक्रमणशीलता मात्र हैन, मृत्युदर नै पहिलेको भन्दा बढी छ।
२. गत उभारको बेला समुदाय र स्वास्थ्य केन्द्रहरूमा (१/५)
— Anup (@AnupSubedee) April 8, 2021

प्रधानमन्त्रीले भनेजस्तो जडीबुटी सेवन गर्दा केही सकारात्मक असर देखिए पनि त्यसले कोभिड नै निको हुन्छ भन्ने प्रमाण नभेटिएको जनस्वास्थ्यविद् डा. शेरबहादुर पुन बताउँछन् । शिलापत्रसँगको संवादमा उनले भने, ‘प्रधानमन्त्रीले भनेजस्तो खाँदा त राम्रै होला । तर कोभिड नै निको हुन्छ भन्ने प्रमाण भने भेटिएको छैन । त्यही खाएर निको हुन्थ्यो भने त सबैले खाइहाल्थे नि ।’

आधुनिक विज्ञानको नजरमा प्रधानमन्त्रीको दाबी सत्य नभएको डा. पुन बताउँछन् । त्यसैले कोभिडसम्बन्धी कुनै लक्षण देखिएमा तुरुन्त नजिकैको अस्पतालमा जान उनको सुझाव छ । ‘सकेसम्म कोभिड डेडिकेटेड अस्पतालमै जानुपर्छ । आयुर्वेदिक दबाईको भरमा मात्र बस्दा थप जोखिम निम्तिन सक्छ, त्यसैले सचेत हुन आवश्यक छ,’ उनी सुझाउँछन् ।

पुनका अनुसार अरु बेला आयुर्वेदिक औषधि धेरै फाइदाजनक भए पनि कोभिड नै निको हुन्छ भनेर प्रमाणित भइसकेको छैन । तर, कोभिड नै चैट हुन्छ भन्ने आशयका अभिव्यक्ति प्रधानमन्त्रीबाट आइरहनु अहिलेको अवस्थामा घातकसिद्ध हुन सक्छ । त्यसैले भ्याक्सिन लगाएका नलगाएका सबैलाई सचेत भएर जनस्वास्थ्यका मापदण्ड पालना गर्न उनको अनुरोध छ ।

त्यस्तै, आयुर्वेद विज्ञानका जानकारसमेत रहेका डा. प्रदीप केसी प्रधानमन्त्रीको कुरा शतप्रतिशत सही नभएको बताउँछन् । भन्छन्, ‘प्रधानमन्त्रीले भनेजस्तो तातोपानी वा अरु केहीले फाइदा त गर्छ नै, तर कोरोना निको नै हुन्छ भन्नेचाहिँ प्रमाणित नभई भन्न सकिन्न ।’

प्रकाशित मिति: शुक्रबार, चैत २७, २०७७ १६:४७