ब्राजिलमा कोरोनाबाट एकै दिन ४ हजार २ सय ४९ को मृत्यु, अस्पतालले बिरामीको चाप थेग्न सकेनन्

ब्राजिलमा कोरोनाबाट एकै दिन ४ हजार २ सय ४९ को मृत्यु, अस्पतालले बिरामीको चाप थेग्न सकेनन्

A+ A A-

ब्राजिलमा कोरोना भाइरसका कारण एकैदिनमा थप ४ हजार २ सय ४९ जनाको मृत्यु भएको छ । सरकारी अधिकारीहरूले बिहीबार दिएको जानकारीअनुसार योसँगै ब्राजिलमा कोरोनाका कारण अहिलेसम्म मृत्यु भएकाहरूको संख्या ३ लाख ४५ हजार २५ पुगेको छ ।

स्वास्थ्य मन्त्रालयले दैनिक ४ हजारभन्दा बढीको मृत्यु भएको एकै हप्तामा यो दोस्रो पटक भएको जनाएको छ । यसअघि गत मंगलबार ब्राजिलमा कोरोनाका कारण एकै दिनमा ४ हजार १ सय ९५ जनाको मृत्यु भएको मन्त्रालयको तथ्याङ्क छ ।

सरकारी अधिकारीहरूले अप्रिल महिनामा कोरोनाका कारण नराम्रो क्षति धेरै ब्यहोर्नुपर्ने अवस्था रहेको बताएका छन् । कोरोनाका कारण पछिल्लो २४ घण्टामा ८६ हजार ६ सय ५२ जना संक्रमण भएको मन्त्रालयले जनाएको छ । योसँगै ब्राजिलमा अहिलेसम्म कोरोना भाइरसबाट संक्रमितको कुल संख्या १ करोड ३२ लाख ७९ हजार ८ सय ५७ पुगेको छ ।

ब्राजिलमा मध्य जनवरीदेखि कोरोना भाइरसविरुद्ध खोप अभियान सुरु भएको छ । तर संक्रमित र मृतकको संख्यामा भने कमी आएको छैन । देशभरी अहिलेसम्म २ करोड ७५ हजार ११ हजार ५ सय ३७ जनालाई कोरोनाविरुद्धको खोप लगाइएको मन्त्रालयले जनाएको छ ।

कोरोना भाइरसबाट धेरै प्रभावितहरूको सूचीमा ब्राजिल दोस्रो क्रममा छ । ब्राजिलमा भन्दा धेरै अमेरिकामा कोरोनाको असर परेको छ । हाल ब्राजिलको स्वास्थ्य प्रणालीले कोभिड–१९ को भयानक तनाव खेपिरेहको छ । स्वास्थ्य मन्त्रालयका अनुसार पछिल्लो समय ब्राजिलमा कोरोना भाइरसको संक्रमण निकै तीव्र बन्दै गएको छ । अस्पतालहरूले बिरामीको चाप थेग्न नसकेपछि उपचारमा समस्या भएको जनाएका छन् ।

देशको जनसंख्याको १० प्रतिशतले पहिलो डोजको खोप लगाएका छन् । तर, हाल अत्यधिक रूपमा फैलिएको भाइरसको प्रकोपलाई नियन्त्रण गर्नका लागि एक मात्र उपाय कम्तीमा २० दिनसम्म प्रभावकारी लकडाउन भएको विज्ञहरूको दाबी छ ।

तर, राष्ट्रपति जैर बोल्सोनारोले भाइरसको नियन्त्रणका लागि कुनै पनि प्रतिबन्ध तथा लकडाउन घोषणा गरेका छन् । भाइरस नियन्त्रणका कारण आवश्यक कदम नचालेको भन्दै उनको निकै चर्को आलोचना हुने गरेको छ ।

तर, राष्ट्रपति बोल्सोनारोले भने आफ्नो नीतिको बचाउ गर्दै आएका छन् । उनले लकडाउन तथा प्रतिबन्धहरूका कारण देशको अर्थतन्त्र बिग्रने दाबी गर्दै आएका छन् । जुन देशका लागि भाइरसको प्रभावभन्दा बढी हानिकारक हुने उनको दाबी छ ।

तर, देशको राजनीतिका पस्थितिको कारण ब्राजिलका यो स्थिति आएको र दुभाग्यबस ठूलो संख्यामा व्यक्तिहरु ज्यान गुमाएका विज्ञहरूको भनाइ रहेको छ । कोरोना भाइरस नियन्त्रणका लागि विशेषज्ञहरूको सल्लाह नमानेको र देशमा यस प्रकारले स्वास्थ्य संकट निम्त्याउनुमा राष्ट्रपति जैर बोल्सोनारो जिम्मेवार भएको आरोप लगाइएको छ ।

सन् २०१९ को डिसेम्बरमा चीनको वुहानबाट फैलिएको कोरोना भाइरसका कारण हालसम्म विश्वभर २९ लाखभन्दा बढीले ज्यान गुमाइसकेका छन् । त्यसैगरी १३ करोड ४५ लाखभन्दा बढी संक्रमित भइसकेका छन् ।

प्रकाशित मिति: शुक्रबार, चैत २७, २०७७ १४:३९