रात्रिकालीन व्यवसाय बन्द गरिँदा ८० हजारभन्दा बढी कामदार मारमा, व्यवसायी भन्छन्- व्यवसाय नै धरापमा पर्‍यो

रात्रिकालीन व्यवसाय बन्द गरिँदा ८० हजारभन्दा बढी कामदार मारमा, व्यवसायी भन्छन्- व्यवसाय नै धरापमा पर्‍यो

A+ A A-

कोरोना भाइरसको दोस्रो लहरको संक्रमण नियन्त्रणका लागि भन्दै सरकारले रात्रिकालीन व्यवसाय बन्द गर्ने निर्णय गरेसँगै यस क्षेत्रमा कार्यरत ८० हजारभन्दा बढी कामदार मारमा परेको रात्रिकालीन व्यवसायी संघले जनाएको छ ।

स्वास्थ्य तथा जनसंख्या मन्त्रालयले राति ९ बजेपछि रेस्टुरेन्ट, डान्सबारलगायतका रात्रिकालीन व्यवसाय कडाइका साथ बन्द गर्न बुधबार निर्देशन दिएको थियो ।

सरकारले पटक–पटक कोरोनाका कारण भन्दै रात्रिकालीन व्यवसाय बन्द गर्दा प्रत्यक्ष र अप्रत्यक्ष रूपमा यस क्षेत्रमा रोजगारी गरिरहेका ८० हजारभन्दा धेरै कामदारको रोजगारी गुम्नुका साथसाथै व्यवसाय नै धरापमा परेको संघका महासचिव आयुष ठकुरीले बताए ।

ठकुरीले भने, 'सरकारले तोकेको मापदण्ड र सामाजिक दूरी कायम गरेर व्यवसाय चलाउने भनिरहेका छौँ । रात्रिकालीन व्यवसाय मात्र कोरोना सर्ने क्षेत्र होइन । सरकारले रात्रिकालीन व्यवसाय बन्द गर्दा धेरै कामदारको रोजीरोटी खोसिन्छ । धेरै परिवार यस क्षेत्रमा निर्भर रहका छन् । सरकारको यो निर्णयले व्यवसायी त मारमा परेपरे, कामदारको रोजीरोटी पनि खाेसिन्छ ।’

उपत्यकामा मात्र १४ हजार ८ सय रात्रिकालीन व्यवसाय रहेको उनको भनाइ छ ।कोरोनाअघि रात्रिकालीन मनोरञ्जन क्षेत्रबाट दैनिक २० करोडभन्दा बढीको कारोबार हुने गरेको संघको भनाइ छ । कोरोना महामारीपछि यो क्षेत्रको व्यापार धेरै कम भएको संघले जनाएको छ ।

राजधानीका पर्यटकीयस्थल ठमेल, दरबार मार्ग मात्र नभई नयाँ गन्तव्य बनेको झम्सीखेल, सुन्धारा, लाजिम्पाट, नक्साल, बानेश्वर, गौशाला, नयाँबसपार्कजस्ता क्षेत्रमा पनि यो व्यवसाय र व्यापार बढिरहेको छ । उपत्यकाबाहिर, पोखरा, धरान, विराटनगर, झापालगायतका क्षेत्रमा रात्रिकालीन व्यवसाय सञ्चालनमा छन् ।

सरकारले पछिल्लो समय पर्यटकीय दृष्टिले आकर्षण बढाउन यो क्षेत्रलाई व्यवस्थित गरेर सञ्चालन गर्न अनुमति दिइरहेको छ । रात्रिकालीन मनोरञ्जन क्षेत्रमा युवा जमातको आकर्षण पनि बढिरहेको छ । हाल देशभर १ लाखभन्दा धेरै साना–ठूला रात्रिकालीन व्यवसाय सञ्चालनमा छन् ।

देशभर कोभिड १९ संक्रमणको जोखिम बढेको भन्दै मन्त्रालयका सह–प्रवक्ता डा. समीरकुमार अधिकारीले बुधबार विभिन्न १० बुँदे निर्देशन समेटिएको विज्ञप्ति जारी गरेका थिए ।

मन्त्रालयले संक्रामक रोग ऐनबमोजिम कारबाही गर्ने गरी घरबाहिर र सार्वजनिक स्थानमा मास्कको प्रयोगलाई अनिवार्य गराउन पनि सबै जिल्ला प्रशासन कार्यालयलाई आग्रह गरेको छ ।

प्रकाशित मिति: बिहीबार, चैत २६, २०७७ १३:५७