व्यवसायीले सिन्डिकेट लाद्न खोजेपछि कतार रोजगारीमा लफडा, मन्त्री भन्छन्, 'कुरा हुँदै छ'

व्यवसायीले सिन्डिकेट लाद्न खोजेपछि कतार रोजगारीमा लफडा, मन्त्री भन्छन्, 'कुरा हुँदै छ'

A+ A A-

कतारले सन् २०२२ मा हुने विश्वकपका लागि नेपालबाट ठूलो संख्यामा प्रहरी र सुरक्षा गार्डमा कामदार लिने बताएको थियो । विश्वकपका लागि भनेर करिब ४ हजार सुरक्षा गार्ड र २ हजार ५ सय कतार प्रहरीमा नेपालीलाई लिने बताइएको थियो ।

वैदेशिक रोजगारीमा कामदार आपूर्ति गर्दै आएका म्यानपावरले सिण्डिकेटमार्फत कतार कामदार पठाउन खोज्दा कतार प्रहरी र सुरक्षा गार्डको रोजगारी गुम्न लागेको रोजगार व्यवसायीले बताएका छन् ।

कतार प्रहरीको रोजगारीका लागि नेपाल सरकारसँग हालसम्म सम्झौता भएको छैन । तीन वर्षअघि नेपालमा खोलिएको कतारी भिसा सेन्टरमार्फत केही म्यानपावर कम्पनीले सिण्डिकेट खडा गरी कामदार पठाउन चलखेल गरेका थिए ।

कतारी भिसा सेन्टरका अध्यक्ष तथा एसओएस म्यानपावर प्रालिका सञ्चालक हेम गुरुङ र अन्य १७ वटा म्यानपावरले सिण्डिकेट खडा गरी कतार प्रहरी र सुरक्षा गार्डमा कामदार पठाउन लागेका थिए ।

प्रहरी र सुरक्षा गार्डको रोजगारीमा कामदार पठाउन विवाद उत्पन्न भएपछि कतार सरकारले विकल्पमा अन्य देशका श्रमिक लैजान सक्ने म्यानपावर व्यवसायीले श्रम, रोजगार तथा सामाजिक सुरक्षामन्त्री गौरीशंकर चौधरीसँग गुनासो गर्न थालेका छन् ।

मन्त्री चौधरीले कतारको सुरक्षा गार्ड र कतार प्रहरीमा सरकारीस्तरमा कामदार पठाउने बताउँदै आएका छन् । दुई सरकारबीच सम्झौता गरेर कतार प्रहरीमा नेपाली कामदार लैजाने विषयमा छलफल भइरहेको र नेपालस्थित कतार दूतावास सकारात्मक भए पनि निर्णय भइनसकेको मन्त्री चौधरीले जानकारी दिए ।

मन्त्री चौधरीले भनेजस्तो कतार प्रहरी र सुरक्षा गार्डमा कामदार पठाउन सक्ने अवस्था नभएको वैदेशिक रोजगार व्यवसायी संघले जनाएको छ । पैसा र सिण्डिकेटका कारण नेपालबाट लिने कतार प्रहरी र सुरक्षा गार्डको कोटा कटौती हुने व्यवसायीहरूले बताएका छन् ।

निजी कम्पनीको रोजगारी र कतार प्रहरीको रोजगारीमा धेरै फरक छ ।

सुरक्षाक्षेत्रसँग जोडिएको विषयलाई नेपाली म्यानपावर कम्पनीले सामान्य रूपमा लिएर अनेक विवाद निकालेपछि कोटा कटौती हुने व्यवसायीहरू बताउँछन् । नेपालमा यस्तै विवाद हुँदै जाने हो भने कतार सरकारले अन्य देशबाट कामदारहरू आपूर्ति गर्न उनीहरूको भनाइ छ ।

कारबाही फुकुवापछि भिसा सेन्टरमार्फत चलखेल

कतार प्रहरीमा कामदार पठाउन अन्तर्वार्ता लिइरहेका डीडी ह्युमन रिसोर्स, एसओएस म्यानपावर र होप इन्टरनेसनल म्यानपावरमा गत मंसिरमा वैदेशिक रोजगार विभागले छापा मारेको थियो ।

ती तीन म्यानपावरले कतार प्रहरीको रोजगारीमा पठाउने भन्दै पूर्वश्रम स्वीकृति नै नलिई अवैध रूपमा कामदारसँग अन्तर्वार्ता लिएको अवस्थामा विभागले छापा मारेको थियो । तीनवटै म्यानपावर कम्पनीले भिसा प्रमाणीकरण नगरी अवैध रूपमा अन्तर्वार्ता लिएको भन्दै विभागले वैदेशिक रोजगार ऐनअनुसार कारबाही गरेको थियो । तर, एसओएस म्यानपावरको कारबाही भने चौधरीले मन्त्री भएर आएको दुई सातामै फुकुवा गरे ।

कारबाही फुकुवापछि भिसा सेन्टरका सञ्चालक गुरुङले कतार प्रहरी र सुरक्षा गार्डमा कामदार पठाउन लबिङ गरिरहेको एक म्यानपावर व्यवसायीले जानकारी दिए । कतार प्रहरीमा कामदार पठाएर केही म्यानपावरले पैसा कमाउन नपाउँदा रोजगारी नै गुम्न लागे पनि सरकारले चासो नदिएको उनको भनाइ छ ।

गोर्खा ब्राण्डमाथि प्रश्न

कतारले २ सय वर्ष पुरानो गोरखा ब्राण्डलाई विश्वास गरेर प्रहरीमा नेपाली कामदार लिन खोजेको रोजगारविज्ञ डा. गणेश गुरुङ बताउँछन् । सरकार र केही म्यानपावर व्यवसायीको स्वार्थका कारण कतार प्रहरी र सुरक्षा गार्डको रोजगारी गुम्ने अवस्थामा पुगेको र गोर्खा ब्राण्डमाथि प्रश्न उठेको गुरुङले बताए ।

‘कतारले नेपालको विकल्पमा अन्य देशबाट कामदार लिन सक्छ । यो नेपाली श्रमबजारका लागि दुर्भाग्य हो,’ उनले भने, ‘सरकारले नै सिण्डिकेटमा संलग्न म्यानपावर कम्पनीलाई उन्मुक्ति दिएको छ । सरकार र म्यानपावर व्यवसायीको चलखेलका कारण नेपालीको रोजगारी गुम्यो भने यसको जिम्मा कसले लिने ?’

म्यानपावरको सिण्डिेकटका कारण नेपालले रोजगारदाता देशसँग समस्या व्यहोर्दै आएकाले सिण्डिकेटका लागि चलखेल गर्ने म्यानपावरमाथि कारबाही हुनुपर्ने उनको भनाइ छ । खाडीका देश, मलेसिया र युरोपका देशले सुरक्षा गार्डमा नेपाली श्रमिक लिन चासो देखाए पनि सरकार तथा म्यानपावर व्यवसायीको अस्वस्थ प्रतिस्पर्धाका कारण रोजगारदाता नै अन्योलमा पर्न थालेको गुरुङको बुझाइ छ ।

अवैध रूपमा कतार कामदार पठाइँदै

सरकारको प्रक्रियाभन्दा फरक बाटो (चोर बाटो) मार्फत म्यानपावरले नेपाली कामदार कतार पठाउन थालेका छन् । कतार प्रहरीको रोजगारीका लागि प्रमाणीकरण नहुँदै चर्को शुल्कमा तेस्रो मुलुकहुँदै भिजिट भिसामा नेपाली कामदार जान थालेका छन् । चर्को शुल्क तिरेर कामदार गइरहे पनि सम्बन्धित निकायले चासो दिएको छैन ।

कतार प्रहरीको रोजगारीका लागि हालसम्म कतार सरकारले माग नपठाएको र कतारस्थित नेपाली दूतावासले पनि कतार प्रहरीका हकमा माग प्रमाणीकरणका लागि कागजात पनि नआएको जनाएको छ । यता विभागले कतार प्रहरीका लागि रोजगारीमा जान कामदारलाई अन्तर्वार्ता नदिन भनिसकेको छ ।

प्रकाशित मिति: बुधबार, चैत २५, २०७७ १४:५८