कर्णालीमा नयाँ वर्षमा नयाँ सरकार

A+ A A-

प्रदेशसभाको सबैभन्दा ठूलो दल एमालेले समर्थन फिर्ता लिएको र मन्त्रीहरूले पनि राजीनामा दिने भएपछि कर्णालीमा मुख्यमन्त्री महेन्द्रबहादुर शाहीको सरकार ढल्ने लगभग निश्चित भएको छ ।

दुई साताभित्र कर्णालीमा नयाँ सरकार बन्ने एमालेको दाबी छ । एमालेको संस्थापन पक्षले ४ चैतमै सरकारलाई दिएको समर्थन फिर्ता लिएको थियो । माधव नेपाल समूहको राष्ट्रिय भेला चलिरहेका बेला संसदीय दलका नेता यामलाल कँडेलले बैठक बोलाएर समर्थन फिर्ता लिने निर्णय गरेका थिए । त्यतिबेला समर्थन जारी रहेको बताइरहेको नेपाल समूह पनि आइतबारको संसदीय बैठकमा सहभागी भई मन्त्री फिर्ता गर्न तयार भएपछि मुख्यमन्त्री शाहीको सरकार संकटमा परेको हो ।

संसदीय दलको बैठकले २४ घण्टाभित्र राजीनामा दिन मन्त्रीहरूलाई निर्देशन दिएको छ । कर्णाली सरकारमा नेपाल पक्षीय नेताहरू प्रकाश ज्वाला, दल रावल र नन्दसिंह बुढा मन्त्री छन् । एमालेले समर्थन फिर्ता लिएकोबारे प्रदेश प्रमुख गोविन्दप्रसाद कलौनीले मुख्यमन्त्री शाहीलाई जानकारी गराइसकेका छन् । अब उनले ३० दिनभित्र विश्वासको मत लिनुपर्ने हुन्छ ।

४० सदस्यीय प्रदेशसभामा २० सिट रहेको एमालेले समर्थन फिर्ता लिएको र माओवादीका सांसद धर्मराज रेग्मी एमाले प्रवेश गरेकाले शाहीले विश्वासको मत लिन सक्ने स्थिति छैन । उनलाई एमालेको नेपाल पक्षसँग झिनो आशा थियो । तर, आइतबारको संसदीय दलको बैठकमा एमाले एक ठाउँमा उभिएपछि त्यो अवस्था अब रहेन ।

४ वैशाख २०७८ सम्म मुख्यमन्त्री शाहीले विश्वासको मत लिन नसक्दा कर्णालीले नयाँ सरकार पाउनेछ । एमालेले चैत ५ गतेदेखि लागू हुनेगरी सरकारलाई दिएको समर्थन फिर्ता लिने निर्णय गरेकाले अविलम्ब मार्गप्रशस्त गर्न आग्रह गरिएको संसदीय दलका नेता कँडेलले बताए । माओवादी केन्द्रको शनिबार बसेको संसदीय दलको बैठकले भने विश्वासको मत लिनु नपर्ने बरु प्रदेश प्रमुख कलौनीले हस्तक्षेप गरेको आरोप लगाएको थियो । एमाले नेता कँडेलले भने, ‘सबैभन्दा ठूलो दलले समर्थन फिर्ता लिइसकेपछि मार्गप्रशस्त गर्नु राम्रो हुन्छ ।’

शाहीलाई नेकपाका तर्फबाट मुख्यमन्त्री बनाइएकोमा एमाले र माओवादी केन्द्र ब्यूँतिसकेको र ४ चैतमा एमालेले समर्थन फिर्ता लिइसकेकाले राजीनामाको विकल्प नभएको एमालेको दाबी छ ।

संसदीय दलको बैठकमा मुख्यमन्त्री शाहीले नयाँ सरकार गठनका लागि मार्ग प्रशस्त गर्नुपर्ने निर्णय गरिएको सांसदहरूले बताएका छन् । ‘तीन जना मन्त्रीहरूलाई २४ घण्टामा राजीनामा दिन र नयाँ सरकार गठनको वातावरण बनाउन दलले निर्देशन दिएको छ,’ प्रमुख सचेतक गुलाबजंग शाहले भने ।

मुख्यमन्त्री शाहीले राजीनामा गरेर मार्ग प्रशस्त गरेमा अझै पनि एमाले र माओवादीबीच सत्ता समीकरणको सम्भावना रहेको उनले बताए । एमाले संसदीय दलको बैठकको अर्को बैठक २४ चैतमा बसेर सत्ता समीकरणबारे निर्णय लिने भएको छ ।

४० सदस्यीय प्रदेशसभामा माओवादी केन्द्रले सांसद धर्मराज रेग्मीलाई हटाएपछि ३९ जना सांसद छन् । त्यसमध्ये सभामुखसहित एमालेका २०, माओवादी केन्द्रका १२, कांग्रेसका ६ र राप्रपाका १ सांसद छन् । बहुमत पुर्‍याउन एमालेलाई एक सिट अपुग हुन्छ । त्यसका लागि राप्रपासँग समीकरण गर्ने प्रयत्न भइरहेको एमालेस्रोतले बतायो ।

प्रकाशित मिति: आइतबार, चैत २२, २०७७ १७:५२