उपभोक्ता ठग्‍ने राजेश हार्डवेयरको बालाजु डिपो सिल, २४ घण्टाभित्र उपस्थित हुन निर्देशन

उपभोक्ता ठग्‍ने राजेश हार्डवेयरको बालाजु डिपो सिल, २४ घण्टाभित्र उपस्थित हुन निर्देशन

A+ A A-

कम तौलको फलामे डण्डी दिएर उपभोक्ता ठगेको आरोपमा राजेश हार्डवेयरको बालाजु डिपो सिल गरिएको छ । बालाजु डिपोले बढी परिमाणको बिल बनाएर कम परिमाणको सामान पठाएको पाइएपछि शनिबार डिपोलाई सिल गरिएको हो ।

डण्डी पठाउँदा तौलमा फरक पारेको भेटिएपछि शुक्रबार ग्रील व्यवसायीको सक्रियतामा राजेश हार्डवेयरका बालाजु डिपो प्रमुख कमलकुमार शर्मालाई नियन्त्रणमा लिई प्रहरीको जिम्मा लगाइएको थियो । शर्मालाई व्यवसायीले नियन्त्रणमा लिएर डण्डी लोड गरिएका तीनवटा गाडीसहित बालाजु प्रहरीलाई जिम्मा लगाएका थिए ।

शुक्रबार व्यवासयीले खरीबोट, बोहोराटार र रानीवनमा पठाइएको सामानसहित तीनवटा गाडी प्रहरीलाई जिम्मा लगाएका हुन् । ती गाडीलाई शुक्रबार सिल गरी शनिबार राजेश हार्डवेरमा गुणस्तर तथा नापतौल विभाग, वाणिज्य आपूर्ति तथा उपभोक्ता संरक्षण विभाग, उपभोक्ता अधिकारकर्मी र सुरक्षा निकायका प्रतिनिधिहरू बसेर बिल र सामान परीक्षण गरिएको थियो । तौल लिने क्रममा व्यवसायीको आरोपअनुसार नै बिलमा उल्लेख गरिएको परिणामभन्दा कम तौलका डण्डीका मुठा भेटिएको आपूर्ति विभागले जनाएको छ ।

'परिमाण परीक्षण गर्दा व्यवसायीले लगाएको आरोप पुष्टि हुने देखिएको छ,’ वाणिज्य तथा उपभोक्ता संरक्षण विभागका निर्देशक शिवराज सेढाइले शिलापत्रसँग भने । फलामे डण्डीको एउटै मुठोमा सात केजीसम्म कम तौल रहेको व्यवसायीको आरोप छ ।

शनिबार डिपो सिल गरेको विभागले २४ घण्टाभित्र सम्पूर्ण कागजपत्र लिएर उपस्थित हुन निर्देशन दिएको छ । ‘यी गाडीमा लोड गरिएका डण्डीमा हामीले परिमाण कम भएको पाएका छौँ, अन्यको अवस्था पनि बुझ्नका लागि २४ घण्टाभित्र उपस्थित हुन सञ्चालकलाई निर्देशन दिएका छौँ,’ सेढाइले भने ।

राजेश हार्डवेयर देशकै सबैभन्दा ठूलो हार्डवेयर कम्पनी हो । यसको सञ्चालक प्रतिष्ठित व्यवसायी सुवास अग्रवाल हुन् । व्यवयासीहरूले यो हार्डवेयरमाथि बजारमा अभाव सिर्जना गरेर कृतिम मूल्य वृद्धि गर्ने, सिन्डिकेट गर्ने गरेको लगायतका आरोप लगाउँदै आएका छन् । केही समयअघि फलाम र डण्डीको मूल्य अस्वभाविक रूपमा राजेश हार्डवेयरकै कारण बढेको उनीहरूको गुनासो छ ।

केही व्यवसायीको भनाइअनुसार राजेश हार्डवेयरले शुक्रबार नै व्यवसायीलाई कानुनी बाटो नखोज्न र प्रशासन नबोलाउन दबाब दिएको थियो । यद्यपि, व्यवसायीले राजेश हार्डवेयरले कहिलेदेखि ठगी गरिरहेको भन्ने विषयमा गम्भीर अनुसन्धान गरी कारबाहीको दायरामा ल्याउन माग गरेका छन् ।

'हामीलाई कम तौल हुन्छ भन्ने आशंका पहिलेदेखि नै लागेको थियो, शुक्रबार तौल लिँदा हामीले त्यस्तै पाएपछि प्रहरीको जिम्मा लगाएका हौँ,’ व्यवसायी शैलेश ठकुरीले भने, ‘हाम्रै अघि नापतौल विभागले तौल लिँदा कम तौल भएको पुष्टि भएको छ । राजेश हार्डवेयरले कहिलेदेखि यसरी ठगी गरेको छ गम्भीर अनुसन्धान गरी कारबाहीको दायरामा ल्याउनु पर्छ ।’

उपभोक्ता संरक्षण विभाग र नापतौल विभागले छुट्टाछुट्टै कोणबाट यो विषयमा अध्ययन गरेर टुंगोमा पुर्‍याउने प्रतिबद्धता गरेका छन् । ‘अहिले उजुरी परेको बालाजु हार्डवेयरकै विषयमा अनुसन्धान हुनेछ, थप अनुगमन गर्नुपर्ने अवस्था पनि देखेका छौँ,’ विभागका निर्देशक सेढाइले भने ।

उपभोक्ता अधिकार अनुसन्धान मञ्चका अध्यक्ष माधव तिमिल्सिनाले यस विषयमा गम्भीर अनुसन्धान हुनुपर्ने बताए । ‘भनिने गरिन्छ, 'सानोलाई ऐन र ठूलोलाई चयन', यसलाई पुष्टि हुर्ने गरी देशकै अग्रणी हार्डवेयर कम्पनीका रूपमा रहेको हार्डवेयरले यस्तो किसिमको बदमासी गरेको देखिएको छ, थप अनुसन्धान गरेर कारबाही गरिनुपर्छ,’ उनले भने ।

प्रकाशित मिति: शनिबार, चैत २१, २०७७ १५:१२