लुम्बिनी प्रदेशसभा ओलीप्रति आक्रोश - प्रधानमन्त्री शासक बने

A+ A A-

लुम्बिनी प्रदेशसभाको सातौँ अविधेशनको तेस्रो बैठकमा सांसदहरूले समसामयिक विषयदेखि राष्ट्रिय राजनीतिका घटना क्रमप्रति ध्यानार्कषण भएको बताएका छन् । संसद्को विशेष समयमा बोल्ने सांसदहरूले उद्योगी व्यवसायीका समस्या, डढेलो नियन्त्रणका लागि आग्रहदेखि प्रधानमन्त्री केपी ओलीमाथि कडा टिप्पणी गरे ।

विशेष समयमा बोल्दै सांसद ईन्द्रप्रसाद खरेलले प्रधानमन्त्री ओलीले जनताप्रति विश्वास घात गरेको आरोप लगाए । प्रधानमन्त्री ओलीले काम गर्न नदिएकाले संसद् विघटन गरेको बताए पनि आफैँले अहिलेको सरकारले गरेको विकासले संसार दंग छ भनी प्रचार गरेकाले जनतालाई अन्योलमा राखेको बताए ।

उनले प्रधानमन्त्री ओलीले दुईतिहाइ सरकार थाम्न नसक्ने अनि निर्वाचनमा जान्छु भन्नु जनताको मतलाई सम्मान नगर्नु भएको बताए । उनले दुईतिहाइनजिकको संसद्लाई विघटन गरेर जनताको साथमा छु भन्नु कति सत्य भएको भनी प्रश्न गर्दै उनले प्रधानमन्त्री ओलीले दिनलाई रात बनाउने काम गरेको समेत बताए ।

त्यस्तै, उनले प्रदेश र संघीय सरकारमा भ्रष्टाचार पञ्चायतकालमा भन्दा पनि बढी भएको भन्दै सरकारले भ्रष्टाचार र कमिसन खानेलाई आयोग बनाएर पुरस्कृत गरेको समेत बताए ।

‘अहिले हरेक ठाउँमा भ्रष्टाचार र कमिसनतन्त्र छ । भ्रष्टाचार र कमिसन खानेलाई आयोग बनाएर पुरस्कृत गरिएको छ । अख्तियार प्रमुखको मुद्दा थियो कि थिएन ? जसले भ्रष्टाचार गर्छ, कमिसन खान्छ, जसले बेइमानी गर्छ त्यस्तालाई नियुक्त गरेर देशलाई कस्तो बनाउन खोजिँदै छ ? उनले प्रश्न गरे ।

उनले देशलाई दुःख पर्दा जनताका सेवक रुने गरे पनि प्रधानमन्त्री ओलीले राता गाला लगाएर जनताका विरुद्ध लागेको बताए । उनले भने, ‘त्यसैले शासक र सेवकमा फरक रहेछ । प्रधानमन्त्री सेवक नभएर शासक हुन् ।’

त्यस्तै, सांसद रमा अर्यालले म्यानमारमा भएको हिंसा र आङ सान सू चीको रिहाइको माग गरिन् । उनले विद्यालय समयमा बुटवलदेखि भैरहवासम्म मालवाहक ट्रक, टिपर चल्दा दुर्घटना बढेको भन्दै विद्यालय समयमा मालवाहक सवारीसाधन रोक्नुपर्ने बताइन् ।

त्यस्तै, सांसद सन्तोषकुमार पाण्डेयले पडषरी कोरिडोरका उद्योगमा उद्योगीलाई नसोधी ट्रंक लाइन जडान गरिएको र ६२ प्रतिशतसम्म शुल्क बढी लिइएको बताउँदै यसको समाधानका लागि प्रदेश सरकारले यथाशीघ्र संघीय सरकारलाई पहल गर्नुपर्ने बताए । उनले बेलहियामा बन्ने भनिएको आईसीपीको काम ‍छिटो गर्न माग गरे ।

त्यस्तै, सांसद कमलादेवी विकले वायु प्रदूषणका कारण विद्यालय बन्द भएको भन्दै उद्योगबाट निस्कने प्रदूषणलाई निर्मलीकरणमा ध्यान दिनुपर्ने बताइन् ।

त्यस्तै, सांसद दीपेश थारूले ६० प्रतिशत निकुञ्ज र मध्यवर्ती क्षेत्र रहेको बर्दियामा पछिल्लो समय बाघले मानिसको ज्यान लिएको भन्दै त्यसको नियन्त्रणका लागि सरकारको ध्यानार्कषण गराए । उनले वन्यजन्तुलाई आहारा, सुरक्षा र वासस्थान नहुँदा पनि मानिसमाथि आक्रमण गरेको हुन सक्ने बताउँदै यसको नियन्त्रणमा ध्यान दिन आग्रह गरे ।

त्यस्तै, सांसदहरू विजयीबहादुर यादव, फकरुद्दिन खान, रामजीप्रसाद घिमिरेले आफ्ना धारणा राखेका थिए । बैठकमा आज प्रदेश विश्वविद्यालयको स्थापना, सञ्चालन, नियमन व्यवस्थापन गर्न बनेको विधेयक पास भएको छ ।

बैठकमा कृषि वन तथा वातावरण समितिका सभापति विजयबहादुर यादव, भौतिक पूर्वाधार विकास समितिका सभापति आशा स्वर्णकार, अर्थ उद्योग र पर्यटन समितिका सभापति दधिराम न्यौपाने, सार्वजनिक लेखा समितिका सभापति डिल्लीबहादुर चौधरीले वार्षिक प्रतिवेदन प्रस्तुत गरेका थिए । सभाको अर्को २३ बैठक दिउँसो १ बजे बस्नेछ ।

प्रकाशित मिति: शुक्रबार, चैत २०, २०७७ १६:४३