संकटमा सुदूरपश्चिम सरकार, फेरबदलका लागि सत्तारुढ दलभित्र माथापच्ची

A+ A A-

सुदूरपश्चिम प्रदेशसभामा ५३ जना सदस्य छन्, जसमध्ये माओवादीबाट गएका एक जनासहित नेकपा एमालेका २५ (सभामुखबाहेक) सदस्य छन् । माओवादी केन्द्रका १३ (१४ जना रहेकोमा झपट बोहरा एमालेमा प्रवेश), नेपाली कांग्रेसका १२ र राजपाका दुई जना सदस्य छन् ।

नेकपा एमालेका अध्यक्ष केपी ओली पक्षमा सात जना मात्र सांसद छन् । तीमध्ये झपट बोहरा माओवादी केन्द्रबाट एमालेमा आएका हुन् । बहुमत सदस्य भीम रावल पक्षमा हुनुले ओली पक्षलाई सुदूरपश्चिममा तत्काल सरकार फेरबदल गर्न त्यति सजिलो छैन ।

यद्यपि, केन्द्रमा माधव नेपाल र भीम रावललाई ६ महिनाका लागि निलम्बन गरिएसँगै प्रदेशमा ओली पक्ष आफूअनुकूल सांसदलाई संसदीय दलको नेता बनाउन र सरकारमा पठाउन सक्रिय भएको छ ।

यसले प्रदेश सरकार र सभामा थप अन्यौलकाे स्थिति सृजना गरेको छ । माओवादी केन्द्रको संसदीय दलको नेता त्रिलोचन भट्ट र प्रमुख सचेतक अक्कलबहादुर रावल छन् । नेकपा अध्यक्ष ओलीको पक्षमा सुदूरपश्चिम प्रदेशसभामा पठानसिंह बोहरा, रतन थापा, नेपालु चौधरी, लिलाधर भट्ट, ग्याल्बु बोहरा, माया तामाङ खुलेका छन् ।

२५ जनामध्ये आठ जना समानुपातिकबाट निर्वाचित सांसद छन् । माओवादीबाट प्रवेश गरेका झपट बोहरालाई जोड्ने हो भने यो संख्या २६ हुन्छ । यद्यपि, सरकार पुर्नगठनको प्रक्रियामा जानुअघि नै माओवादी केन्द्रले संसद् सचिवालयमा बोहरा आफ्नो पार्टीमा नरहेको जानकारी दिएमा उनको सांसद पद जोगिने छैन ।

नेतृत्व दुई पार्टीमध्ये जसको पनि हुन सक्छ । यस्ताे अवस्थामा अहिलेकै मुख्यमन्त्रीले निरन्तरता पाउन सक्ने अनुमान पनि छ । तर, विश्लेषकहरूकाे बुझाइमा अहिलेकै मुख्यमन्त्रीले निरन्तरता पाउने सम्भावना छँदै छैन ।किनकि, नेकपा एमालेका सुदूरपश्चिम इञ्चार्ज लेखराज भट्ट र अर्का नेता कर्ण थापाले अहिलेका मुख्यमन्त्री भट्टलाई स्वीकारेका छैनन् । त्यसैले यो सरकारले निरन्तरता पाउने अवस्था नरहेकाे बताइन्छ ।

नेकपा एमालेका नेता कर्ण थापा त संसदीय दलको नेताबाट प्रकाश शाहलाई हटाएर पठानसिंह बोहरालाई बनाउने पक्षमा जोडबल गरिरहेका छन् । जसका लागि उनले १६ चैतमा संसदीय दल बैठकसमेत बोलाएका थिए । तर, बैठक बस्न सकेन ।

प्रकाशित मिति: बिहीबार, चैत १९, २०७७ ०९:४६