संगठन अभावमा चिनजानका कार्यकर्ता खोज्दै केन्द्रीय प्रतिनिधि

A+ A A-

नेपाली कांग्रेस ७७ वटै जिल्लामा केन्द्रीय प्रतिनिधिसहित राष्ट्रिय जागरण अभियानमा छ । केन्द्रीय प्रतिनिधि जिल्लामा खटिए पनि प्रदेश, प्रदेश सभा निर्वाचन क्षेत्र र स्थानीय तहको वडामा भने अभियान प्रभावहीन बनेको छ ।

यी निकायमा पार्टीको सांगठनिक संरचना नभएको र कार्यकर्ता भेलाको संयोजन गर्ने व्यक्ति नहुँदा जागरण अभियान गाउँसम्म पुग्नै सकेको छैन ।

तीन चरणमा सञ्चालन गर्ने भनिएको जागरण अभियानको पहिलो चरणअन्तर्गत २५ वैशाखदेखि एक महिनासम्म चल्दै छ । राष्ट्रिय जागरण अभियानको पहिलो चरणमै केन्द्रीय प्रतिनिधिलाई जिल्ला, संघीय निर्वाचन क्षेत्र, प्रदेश निर्वाचन क्षेत्र, स्थानीय तह र वडा तहमा समेत सञ्चालन गर्न निर्देशन दिइएको छ ।

कार्य समिति नै गठन नभएको प्रदेश, प्रदेश निर्वाचन क्षेत्र र वडा तहको अभियानको आयोजना वा सहभागिता क–कसको हुने भन्ने निश्चित छैन ।

कांग्रेसको संघीय निर्वाचन क्षेत्रस्तरको समिति भए पनि प्रदेशसभा निर्वाचन क्षेत्र समिति गठन भएको छैन । त्यस्तै, वडा तह पनि गठन भएको छैन । यस्तो अवस्थामा केन्द्रीय कार्य समिति बैठकले केन्द्रीय प्रतिनिधिलाई दिएको निर्देशन कसरी कार्यान्वयन गर्ने भन्ने अलमल भएको फिल्डमा खटिएका प्रतिनिधिले बताएका छन् ।

केन्द्रीय प्रतिनिधि बनेर धादिङमा खटिएका नेता प्रदीप पौडेल संगठन नै नभएका कारण चिनजान र व्यक्तिगत सम्पर्कका आधारमा अभियान चलाइरहेको बताउँछन् । उनका अनुसार वडा र निर्वाचन क्षेत्रमा कांग्रेसको संगठन नहुँदा कार्यकर्ता परिचालनदेखि व्यवस्थापनसम्ममा कसलाई कसरी परिचालन भन्ने समस्या छ ।

पार्टीले रिक्त रहेका यी निकायमा संगठन निर्माणमा ध्यान नदिँदा अभियान नै प्रभावकारी बन्न नसकेको प्रतिनिधिको गुनासो छ ।
केन्द्रीय प्रतिनिधिले सम्बन्धित जिल्ला, क्षेत्र, स्थानीय तह र वडामा बस्नेसँगको व्यक्तिगत चिनजान र निकटताका आधारमा भेला डाकेर छलफल गरी सुझाव संकलन गरिरहेका छन् ।

यता, उपसभापति विमलेन्द्र निधि संयोजक रहेको केन्द्रीय नीति अनुसन्धान तथा प्रशिक्षण प्रतिष्ठानको २१ वैशाखको निर्णयले सातवटै प्रदेशमा र वडास्तरमा प्रशिक्षण दिने भनिएको छ ।

तर, प्रदेश तहमा गरिने प्रशिक्षणका सहभागी र वडा तहमा आयोजना हुने प्रशिक्षणमा कोको सहभागी हुन्छन् भन्ने प्रस्ट छैन् ।

‘लोकतन्त्रका लागि कांग्रेस’ भेला भन्ने नारासाथ प्रशिक्षणको तयारी गरिरहेको प्रतिष्ठानले संघीय संसदका सदस्य र प्रदेश सभासद्लाई पनि प्रशिक्षण दिने भनेको छ ।

तर, केन्द्रीय प्रतिनिधिका रुपमा पार्टीले खटाएका करिब तीन दर्जन सांसद यतिबेला काठमाडौंमै सीमित छन् । केन्द्रीय प्रतिनिधिका रुपमा खटाइएका सांसदलाई फेरि अर्को निर्णयबाट काठमाडौंमै बसेर संसद् बैठकमा क्रियाशील हुन निर्देशन दिइएको छ ।

बजेट अधिवेशन सुरु भएपछि बजेट छलफलमै व्यस्त हुनुपर्ने भएपछि सांसदहरु काठमाडौंमै सीमित भएका छन् । प्रदेश र संघीय संसदका सदस्यलाई प्रशिक्षण कहिले दिने भन्ने स्पष्ट नहुँदा जागरण अभियान फिक्का हुने देखिएको केन्द्रीयस्तरकै नेताको गुनासो छ ।

अभियान सञ्चालन गरिरहँदा स्थानीय कार्यकर्ताले नेविसंघ गठन गर्न नसकेको, तरुण दलले पूर्णता नपाएको, महिला संघ क्रियाशील नभएको, अन्य भ्रातृ संस्थाको १० वर्षसम्म महाधिवेशन नभएको र विभाग गठन नहुँदा तथा जिम्मेवारी नपाउँदा अभियान प्रभावकारी नभएको गुनासो गरेका छन् ।

कांग्रेसले २४ भदौदेखि १० असोजसम्म दोस्रोे र ७ पुसदेखि १६ पुससम्म तेस्रो चरणको राष्ट्रिय जागरण अभियान घोषणा गरिसकेको छ ।

प्रकाशित मिति: बिहीबार, जेठ २, २०७६ ०३:१३