निर्माणको काम नसकिँदै गौतम बुद्ध विमानस्थलको उद्घाटन गर्ने तयारी

A+ A A-

रूपन्देहीको भैरहवामा निर्माणाधीन गौतम बुद्ध अन्तर्राष्ट्रिय विमानस्थल उद्घाटन निर्माण सकिनुअघि नै गर्ने तयारी गरिएको छ ।

विमानस्थल निर्माणको काम सकिन अझै चार महिना लाग्ने अनुमान गरिएको छ । तर, निर्माणको काम सम्पन्न नहुँदै जेठमा बुद्ध जयन्तीका दिन विमानस्थलको उद्घाटन गर्ने तयारी थालिएको हो । गौतम बुद्ध विमानस्थलको उद्घाटन बुद्ध जयन्तीमा गर्न प्रधानमन्त्री कार्यालयले आग्रह गरिरहेको विमानस्थल स्रोतले जनाएको छ ।

त्यही तयारीस्वरुप मुख्यमन्त्री शंकर पोखरेलले आइतबार विमानस्थलको अनुगमनसमेत गरिसकेका छन् । सोही क्रममा मुख्यमन्त्री पोखरेलले आउने वर्ष उडान भर्ने गरी निर्माणको गतिलाई अगाडि बढाउन विमानस्थल आयोजना प्रमुख प्रवेश अधिकारीलाई निर्देशन दिएका छन् ।

हाल विमानस्थलको ९६ प्रतिशत भौतिक र ७१ प्रतिशत वित्तीय प्रगति भएको छ । जेठसम्म जति काम भए पनि उद्घाटन गर्ने गरी तयारी थालिएको हो । यद्यपि अहिले पनि रुट इजाजत प्राप्त भने भइसकेको छैन । भारतले आफ्नो आकाशमा पर्ने रुट अझै नेपाललाई दिइसकेको छैन । भारतीय पक्षले झन्डै दुई वर्षअघि तत्कालीन पर्यटनमन्त्री रवीन्द्र अधिकारीका पालामा नै भैरहवाबाट नयाँ प्रवेश विन्दु दिने विषयमा सहमति गरेको थियो ।

तर, अधिकारीको मृत्यपछि भने भारतले भैरहवा प्रवेश विन्दु दिँदा २१ हजार फिटभन्दा माथिबाट मात्रै जहाजले प्रवेश गर्ने गरी दिने बताएको छ । यद्यपि नेपालले प्रयोग गर्न खाजेको आकाशीय क्षेत्रमा भारतीय सेनाको बेस क्याम्प रहेकाले हवाई मुभमेन्ट गर्न नमिल्ने तर्क भारतले गर्दै आएको छ ।

विमानस्थल आयोजना प्रमुख प्रवेश अधिकारीले अझै विदेशी प्राविधिकहरू काममा नफर्केका कारण निर्माण सम्पन्न हुन केही समय लाग्ने बताए । अहिले विमानस्थलमा लाइट जडान र उपकरणको काम भइरहेको छ । अहिले आईसीबी १ तर्फ ५ प्रतिशत मात्र लाइट जडानको काम बाँकी छ ।

धावनमार्गमा जडान गरिने लाइट, सेन्ट्रल एसी, सञ्चार उपकरण, फर्ड लाइट, एक्सरे मेसिन, मौसम पूर्वानुमान उपकरण, सीसी टीभी, उडान जानकारी डिस्प्ले, कन्भेयर बेल्टलगायतका उपकरण जडानको काम अन्तिम चरणमा पुगेको आयोजना प्रमुख अधिकारीले बताए ।

‘उद्घाटनको खास मिति यकिन छैन । पत्र पनि आएको छैन, ’ उनले भने, ‘मन्त्रालयले तयारी गरेको भए हामीलाई थाहा हुँदैन ।’

६ अर्ब ८२ करोडको लगानीमा सम्पन्न हुन लागेको आईसीबी- १ स्तरको विमानस्थल आयोजनामा एडीबीको ४० दशमलव पाँच प्रतिशत ऋण तथा १८ प्रतिशत अनुदान, ओपेक फन्ड फर इन्टरनेसनल डेभलपमेन्ट्सको ३० दशमलव ५ प्रतिशत ऋण र नेपाल नागरिक उड्डयन प्राधिकरणको ११ प्रतिशत लगानी छ ।

यस्तै, आईसीबी-२ अन्तर्गत विमानस्थलमा जडान हुने उपकरणका लागि पनि करिब ५० करोड लगानी छ ।

प्रकाशित मिति: मंगलबार, चैत १७, २०७७ १३:१६