पार्टीभित्र मेरो लिगेसी छ, मलाई कसैले हटाउन सक्दैन : माधव नेपाल (अन्तर्वार्ता)

पार्टीभित्र मेरो लिगेसी छ, मलाई कसैले हटाउन सक्दैन : माधव नेपाल (अन्तर्वार्ता)

A+ A A-

नेकपा एमालेले वरिष्ठ नेता माधव नेपाल र उपाध्यक्ष भीम रावललाई कारबाही गरेको छ । पार्टीले सोधेको स्पष्टीकरण चित्तबुझ्दो नभएको भन्दै छ महिनाका लागि दुवैलाई पार्टी सदस्यबाट निलम्बन गरिएकाे हो ।

पार्टी साधारण सदस्यबाट नै निलम्बन गरेको पार्टी अध्यक्ष तथा प्रधानमन्त्री केपी शर्मा ओलीले पत्रमार्फत दुवै नेतालाई जानकारी गराएका छन् । नेपाल र रावललाई स्पष्टीकरण सोध्दा त्रुटि स्वीकार नगरेको, आत्मसमीक्षा नगरेको र आत्मआलोचना गर्ने प्रवृत्ति नदेखिएको भन्दै निलम्बन गरिएको पत्रमा उल्लेख छ । निलम्बनबारे शिलापत्रका प्रधानसम्पादक बसन्त बस्नेतले नेपालसँग गरेको संक्षिप्त कुराकानी :‌

- तपाईंलाई पार्टीबाट छ महिनाका लागि निलम्बन गर्ने अध्यक्ष केपी ओलीले गरेको निर्णयलाई कसरी हेर्नुभएको छ ?

यो निर्णय स्वेच्छाचारी हो । निरकुंश कदम हो । यो कदमको मैले पूर्वानुमान गरेको थिएँ, मेरो अनुमानअनुसारकै निर्णय आयो ।

- तपाईं अब के गर्नुहुन्छ ?

ओलीले पार्टीलाई विभाजन गर्नेतर्फ लगे । देशभरका कार्यकर्तामाझ गएर यसको घोर प्रतिवादका लागि आग्रह गर्छु । एमालेलाई एकजुट राख्ने दायित्वबाट दायाँबायाँ नहुन कार्यकर्तालाई आग्रह गर्छु ।

- निलम्बित हैसियतमा तपाईंले कार्यकर्तालाई आह्वानसमेत गर्न नसक्ने अवस्था आयो होइन ?

एमाले पार्टी बनाउन र त्यसको ढुंगो शिलान्यास गर्नेमध्ये म पनि हुँ । पार्टीभित्र मेरो लिगेसी कायमै छ । कुनै एउटा-दुइटा मान्छेले चाहेर मलाई हटाउन सक्दैन । पार्टी हामी सबैको हो । न्यायका निम्ति पार्टी र कार्यकर्तासमक्ष जान्छु । यो विधि र पद्धतिविपरीतको निर्णय हो । पार्टीएकता बचाउन म कार्यकर्ताहरूलाई आग्रह गर्छु ।

- यसबारे बैठक बस्दै हुनुहुन्छ ?

हामी यसबारेमा सोचिरहेका छौँ । केपी ओलीको निरंकुश प्रवृत्तिको भर्त्सना गर्न र त्यसबारे रणनीति बनाउन हामी छिट्टै जुट्छौँ । यसको जानकारी छिट्टै पाउनुहुनेछ ।

प्रकाशित मिति: सोमबार, चैत १६, २०७७ १८:०२