माओवादी केन्द्रले स्पष्टीकरण सोधेका लुम्बिनीका सांसदले भने- जवाफ फर्काउनुको औचित्य छैन

माओवादी केन्द्रले स्पष्टीकरण सोधेका लुम्बिनीका सांसदले भने- जवाफ फर्काउनुको औचित्य छैन

A+ A A-

नेकपा माओवादी केन्द्र लुम्बिनी प्रदेशले सोधेको २४ घण्टे स्पष्टीकरणको जवाफ नदिने एमालेतिर लागेका सांसदहरूले बताएका छन् । उनीहरूले स्पष्टीकरण दिनुको कुनै औचित्य नभएको पनि बताएका छन् ।

सर्वोच्च अदाललको फैसलापछि एमाले र माओवादी केन्द्र ब्युँतिएपछि पनि माओवादी केन्द्रका सांसदद्वय दधिराम न्यौपाने र दिनेश पन्थीले एमालेमै रहने निर्णय गरेका छन् ।

एमालेमै रहने निर्णय गरेपछि माओवादी केन्द्रले २४ घण्टे स्पष्टीकरण सोधेको छ । स्पष्टीकरणको पत्र प्राप्त भएको र दुवै सांसदले प्रमुख सचेतकलाई टेलिफोन गरी जवाफ दिनु नपर्ने बताएका छन् ।

रुपन्देहीका सांसद न्यौपाने र गुल्मीका सांसद पन्थीलाई एमाले अध्यक्ष तथा प्रधानमन्त्री केपी शर्मा ओलीले केन्द्रीय सदस्यमा मनोनीत गरेका छन् ।

एमालेको केन्द्रीय सदस्यमा मनोनीत भएपछि उनीहरूमाथि कारबाही प्रक्रिया अगाडि बढाइएको माओवादीका प्रमुख सचेतक तुलबहादुर घर्तीले जानकारी दिए ।

उनले पन्थी र न्यौपानेलाई सांसद पदबाट निलम्बन गरेको पत्र केही दिनमै प्रदेशसभा सचिवालयमा बुझाइने बताए । ‘हामीले संसद सचिवालयलाई पत्र नबुझाउँदासम्म उहाँहरू माओवादी हुनुहुन्छ । पत्र सचिवालयमा दर्ता भएसँगै उहाँहरूको सांसद पद खोसिन्छ,’ उनले भने ।

उनले संसदीय दलको बैठकमा बोलाउँदा दुवै सांसद नआएपछि स्पष्टीकरण सोधिएको बताए । एमालेमा लागेका गुल्मीका सांसद पन्थीले स्पष्टीकरण दिनुको कुनै औचित्य नभएको बताए । उनले आफूहरू पार्टीमा नरहेको यसअघि नै भनिसकेकाले त्यसको जवाफ दिइरहन जरुरी नभएको बताए ।

अर्का सांसद दधिराम न्यौपानेले पार्टीमा नलाग्ने भनिसकेपछि स्पष्टीकरणको जवाफ दिनु नपर्ने बताए ।

१८ चैतमा बस्दै छ प्रदेशसभा बैठक

लुम्बिनी प्रदेशको हिउँदे अधिवेशन १८ चैत दिउँसो १ बजेका लागि बोलाइएको छ । २० असोजमा प्रदेशको स्थायी राजधानी र नामकरण टुंगो लगाएपछि बैठक बस्न सकेको थिएन ।

दुई बैठकबीचको अन्तर छ महिनाभन्दा बढी गर्न नपाइने संवैधानिक व्यवस्था भएकाले बैठक बोलाइएको प्रदेशसभा सचिवालयका सचिव दुर्लभ कुमार पुनले जानकारी दिए ।

प्रकाशित मिति: सोमबार, चैत १६, २०७७ १६:०३