लुम्बिनी प्रदेश : वर्षे अधिवेशनसँगै प्रदेशसभा बैठक देउखुरीमै बोलाउने तयारी

लुम्बिनी प्रदेश : वर्षे अधिवेशनसँगै प्रदेशसभा बैठक देउखुरीमै बोलाउने तयारी

फाइल तस्वीर ।

A+ A A-

लुम्बिनी प्रदेशसभाको वर्षे अधिवेशन देउखुरीमा बोलाउने गरी तयारी थालिएको छ ।

प्रदेश राजधानी दाङको देउखुरीस्थित राप्ती प्राविधिक शिक्षालयका नाममा रहेको जग्गा र सम्पत्ति लुम्बिनी प्रदेश सरकारलाई दिने निर्णय भएसँगै वर्षे अधिवेशन देउखुरीमा बोलाउने तयारी थालिएको हो ।

दुई महिनाअघि सभामुख पूर्णबहादुर घर्ती, आन्तारिक मामिला तथा कानुनमन्त्री कुलप्रसाद केसी, प्रदेशसभा सचिवालयका कर्मचारीसहितको टोलीले शिक्षालयको जग्गा स्थलगत निरीक्षण गरी प्रदेशसभा बैठक शिक्षालयबाट सञ्चालन गर्न सकिने निष्कर्ष निकालेको थियो ।

प्रदेश पूर्वाधार प्राधिकरणले हालै ८ करोडको लगानीमा अस्थायी प्रदेशसभा निर्माणका लागि टेन्टरसमेत प्रकाशन गरिसकेको छ । अस्थायी प्रदेशसभाको भवन बन्नुअघि वर्षे अविधेशन शिक्षालयमा गर्ने तयारी थालिएको छ ।

हिउँदे अधिवेशन १८ चैतका लागि बोलाइएको छ । हिउँदे अधिवेशन बढीमा पाँचवटा बैठक बसेर सकिनेछ । त्यसपछि सुरु हुने वर्षे अधिवेशन शिक्षालयको भवनमा बस्ने गरी तयारी गरिएको छ । प्रदेशसभा सचिवालयले समेत प्रदेश सरकारले शिक्षालयको भवनमा सभाको तयारी गर्न आग्रह गरेमा तयार रहेको बताएको छ ।

लुम्बिनी प्रदेशसभा सचिवालयका अधिकृत हरिहर पोख्रेलले सरकारले आग्रह गरे बैठक बसाल्ने गरी तयारी गर्न सकिने बताए । तर, अहिलेसम्म कुनै प्रस्ताव नआएको उनले बताए ।

राप्ती प्राविधिक शिक्षालयका विद्यार्थीलाई सरस्वती माध्यमिक विद्यालयमा व्यवस्थापन गर्ने गरी भवन र जग्गा प्रदेश सरकारलाई दिने निर्णय भइसकेको छ ।

लुम्बिनी प्रदेश सरकारका प्रवक्ता बैजनाथ चौधरीले भने तत्काल प्रदेशसभा देउखुरी जान नसक्ने बताएका छन् । मन्त्रालयहरु बुटवलमा, मन्त्रीको सरकारी निवास भैरहवा रहेकाले प्रदेशसभाको बैठक तत्काल देउखुरीमा बस्न नसक्ने उनले बताएका छन् ।

उनले स्थायी संरचना निर्माणपछि मात्र प्रदेश सरकारले स्थायी राजधानीबाट काम गर्ने बताए । राजधानीको अपनत्वका लागि एक–दुई बैठक शिक्षालयको भवनमा गर्न सकिने भए पनि पूर्वाधारबिना बैठक बस्न नसक्ने उनले बताए ।

प्रकाशित मिति: आइतबार, चैत १५, २०७७ १५:५६