सिमेन्ट उद्योगले टिपर आतंक मचाएको भन्दै स्थानीय आन्दोलित

A+ A A-

सिरहाको मिर्चैयास्थित कटारी चोकमा स्थानीयले सडक अवरुद्ध पारेका छन् ।

सिमेन्ट उद्योगले पहाडबाट चुनढुंगा ढुवानीको नाम आतंक मचाएको भन्दै स्थानीय आन्दोलित बनेका हुन् । उनीहरूले बिहान ९ बजेदेखि १ बजेसम्म ४ घण्टा मिर्चैया-कटारी सडक अवरुद्ध पारेका हुन् ।

मारुती, सौर्य र कसमस सिमेन्ट उद्योगका लागि चुनढंगा बोक्ने दैनिक २ हजारजति टिपर यस राजमार्गमा चल्ने गर्छन् । ओभर लोड गरेर चल्ने टिपरले बाटोमा धुलो उडाएर वातावरण प्रदूषण गरेको स्थानीयको गुनासो छ ।

यति धेरै टिपर चले पनि सडकमा पानीसमेत हाल्ने गरिएको छैन । टिपरको धुँवाधुलोले राजमार्ग आसपासमा बस्न नसक्ने अवस्था आएको भन्दै बाध्य भएर सडक अवरुद्ध गर्नुपरेको स्थानीय सञ्जीव यादवले बताए ।

उनका अनुसार टिपरको धुँवाधुलोले यहाँका सर्वसाधारणको स्वास्थ्यमा विभिन्न किसिमका समस्या निम्त्याउनुका साथै टिपरका कारण दिनहुँ दुर्घटना पनि हुने गरेको छ । अत्यधिक संख्यामा चल्ने टिपरकै कारण सडक पनि जीर्ण बनेको छ ।

सिमेन्ट उद्योगले टिपर आतंक रोक्नुपर्ने स्थानीयको माग छ । उद्योगहरूले टिपर सञ्चालनका लागि वैकल्पिक बाटो बनाउनुपर्ने माग पनि स्थानीयले गरेका छन् । बेवास्ता गरी निरन्तरता दिने काम भए कडा आन्दोलन गर्ने चेतावनी पनि उनीहरूको छ ।

सहमतिपछि सडक खुलाइयो

स्थानीयले सडक अवरुद्ध गरेपछि आवागमन ठप्प हुँदा नगरपालिकाका जनप्रतिनिधि, प्रहरी, सम्बन्धित उद्योगका प्रतिनिधि र स्थानीयबीच सहमति भएको छ । सहमतिपछि सिद्धीचरण राजमार्ग खुलाइएको छ ।

स्थानीयहरुको माग सम्बोधनका लागि भोलि बिहान १० बजेलाई नगरपालिकामा बैठक बोलाइएको छ । बैठकमा स्थानीय, जनप्रतिनिधि, उद्योगका प्रतिनिधि, प्रहरीलगायतको उपस्थिति रहने जनाइएको छ ।

प्रकाशित मिति: शुक्रबार, चैत १३, २०७७ १८:४३