शिवकुमार हत्या प्रकरण : काकाकै छोरा र जेठानबाट पारिवारिक रिसइबी साँध्न हत्या

शिवकुमार हत्या प्रकरण : काकाकै छोरा र जेठानबाट पारिवारिक रिसइबी साँध्न हत्या

A+ A A-

सिरहाको मिर्चैया नगरपालिका- ७, लिकटोलका २४ वर्षीय शिवकुमार यादवको हत्या अभियोगमा प्रहरीले दुई जनालाई सार्वजनिक गरेको छ । शिवकुमारको हत्या भएको पाँच दिनपछि प्रहरीले बिहीबार अभियुक्त सार्वजनिक गरेको हो ।

शिवकुमारको शव बीभत्स हत्या भएको अवस्थामा ८ चैत बिहान मिर्चैया नगरपालिका- १ स्थित पूर्वपश्चिम राजमार्गछेउको आँपको बगैँचामा फेला परेको थियो । यादवको हत्याको आरोपमा उनका आफ्नै काकाको छोरा मिर्चैया-७ कै २७ वर्षीय विष्णु यादव र उनका जेठान मिर्चैया-९ का २४ वर्षीय इन्द्रदेव यादव पक्राउ परेका छन् ।

शिवकुमारको हत्या आफूहरूले नै गरेको उनीहरूले स्वीकार गरेका छन् । पारिवारिक रिसइबी साँध्ने मनसायले विष्णुले जेठान इन्द्रदेवको सहयोगमा शिवकुमारको हत्या गरेको बयानबाट खुलेको इलाका प्रहरी कार्यालय मिर्चैयाका डीएसपी राजेन्द्र श्रेष्ठले बताए । 'विष्णुले आफ्ना जेठान इन्द्रदेव यादवसँग मिलेर शिवकुमारको हत्या गरेको उनीहरूको बयानबाट खुलेको छ,' उनले भने, 'रिसइबी साँध्न हत्या घटना भएको देखिन्छ ।'

उनीहरूले शनिबार साँझ ७ बजे नै घरबाट निस्केका शिवकुमारको सोही राति हत्या गरी ८ चैत आइतबार बिहान उनको घरमा फोन गरी शिवकुमार आफूसँग रहेको र ५० लाख रुपैयाँ लिएर आए मात्रै दिन्छु भनेर फोन पनि गरेका थिए । आफ्नो परिवारका मानिसहरू र शिवकुमारबीच घरायसी विवाद रहेकाले रिसइबी साँध्ने मनसायले शिवकुमारलाई मारेर सिध्याइदिनुपर्छ र उनको परिवारसँग पैसा पनि धेरै भएकाले पैसा पनि माग्नुपर्छ भन्ने योजनाका साथ हत्या गरेर भोलिपल्ट फोन गरी पैसा मागेको बयान विष्णुले प्रहरीसमक्ष दिएका छन् ।

यसरी भयो हत्या

हत्याका अभियुक्त विष्णु करिब दुई वर्षअघि लागुऔषधसहित पक्राउ परे । जिल्ला अदालत सिरहाले उनलाई दुई वर्षको कैद सजाय सुनायो । उनी कारागार चलान भए । विष्णु कारागारमा रहेका बेला उनका परिवार र शिवकुमारबीच वादविवाद भएको थियो । जेल भुक्तान गरी घर आएपछि विष्णु शिवकुमारसँग रिसइबी साध्ने सोचमा थिए ।

७ चैतमा चोहर्वामा विष्णु र इन्द्रदेवले भेटघाट गरे उनीहरूले त्यहाँ एकछिन बसेर हत्याको योजना बनाए । त्यस दिन शिवकुमार भारतको जयनगर गएका थिए । फर्केपछि विष्णुले शिवकुमारलाई फोन गरेर भेट्न समय मागे । यहाँ अवस्थित सौर्य सिमेन्ट उद्योगमा कार्यरत शिवकुमार घर आएर आज फ्याक्ट्रीमा काम छ भन्दै अबेरसम्ममा भए पनि घरै आउने भनेर साँझ ७ बजेतिर घरबाट निस्के । मिर्चैयास्थित एक होटलमा ८ बजेतिर शिवकुमार, विष्णु र इन्द्रदेवको भेट भयो । होटलमा उनीहरूले खाजा पनि खाए । त्यसपछि उनीहरू त्यहाँबाट गए ।

मिर्चैयास्थित जीवा खोलानजिक गएपछि विष्णुले शिवकुमारलाई काम छ भन्दै आफू सवार मोटरसाइकलमा बस्न लगाए । शिवकुमार पनि आफ्नो मोटरसाइकल त्यहीँ छोडेर तीनै जना त्यसमै बसे । त्यसपछि उनीहरू नजिकैको आँप बगैंचामा गए । त्यहाँ गएपछि विष्णुले धारिलो हतियारले प्रहार गरी शिवकुमारको हत्या गरेर शवलाई बगैँचामा निर्माणाधीन घरको भत्केको वालले छोपिदिए, त्यसपछि उनको मोबाइल पनि त्यहीँ बालुवामा गाडेर उनीहरू भागे ।

आइतबार बिहान भएपछि चोहर्वाबाट ६ बजेतिर विष्णु र इन्द्रदेवले शिवकुमारको घरको मोबाइलमा ती/चार पटक फोन गरे । तर, फोन उठेन । घरका सदस्यहरू बिहान उठेपछि शिवकुमार बिहानसम्म घर नआएपछि उनलाई निरन्तर फोन गरिरहे ।

फोन सम्पर्क नभएपछि वैदेशिक रोजगारीबाट गत ६ चैतमा घर फर्केका शिवकुमारका दाइ रामकुमारले घरको मोबाइलमा फोन आएको नम्बरमा आफ्नो मोबाइलबाट फोन गरे । त्यस नम्बरमा फोन गर्दा विष्णु र इन्द्रदेवले हिन्दी भाषामा बोल्दै फिरौती पनि पाउने लोभमा शिवकुमार आफूहरूसँग भारतमा रहेको र ५० लाख लिएर आए मात्रै दिने र नदिए मारिदिने धम्की दिए । रामकुमार भयभीत भए, उनले फेरि फोन गरे । तर, त्यसपछि फोन लागेन ।

यसरी पत्ता लागे अभियुक्त

मिर्चैया प्रहरीको गस्ती टोलीले शनिबार राति ११ बजेको समयमा जीवा पुलनजिक बेवारिसे मोटरसाइकल भेटेपछि मोटरसाइकल कार्यालयमा ल्यायो । प्रहरीलाई त्यतिबेला नै शंका लाग्यो । बिहानसम्म मोटरसाइकल खोजी गर्न कोही नआएपछि ६ बजेतिर मोटरसाइकल भेटिएको ठाउँवरपर चेकजाँच गर्दा त्यहाँदेखि ४ सय ५० मिटर पश्चिम राजमार्गको दक्षिण किनारामा रगतको छिटा देखियो । त्यो छिटा पछ्याउँदै जाँदा आँपको बगैँचामा छोपिएको अवस्थामा शिवकुमारको शव भेटियो ।

तत्कालै प्रहरीले शवको पहिचान भने गर्न सकेनन् । प्रहरीले मुचुल्का उठाई शव पोष्टमार्टमका लागि लहानस्थित रामकुमार उमाप्रसाद स्मारक अस्पताल पठायो । केही बेरपछि शिवकुमारका बुबा जुगुत यादवले आफ्नो छोरा राति नै घरबाट निस्केकोमा हालसम्म घर नफर्केको र एक जनाले ५० लाख देऊ नत्र छोरालाई मारिदिन्छु भन्दै फोन गरेर धम्की दिएको जानकारी गराए ।

प्रहरीले उठाएर ल्याएको लासको तस्वीर मृतकका बुबालाई देखायो । उनी हेर्नेबित्तिकै विक्षिप्त भए । त्यसपछि प्रहरीले मृतकका बुवा जुगुतसँग जाहेरी गरायो । प्रहरीले अनुसन्धान थाले । इप्रका मिर्चैया र प्रदेश प्रहरी कार्यालयबाट प्रहरी नायब उपरीक्षक ज्ञानकुमार महतोको कमाण्डको प्रहरीको अनुसन्धान टोलीले अनुसन्धानका क्रममा झण्डै ८० जना जतिलाई ल्याएर सोधपुछ गर्‍यो ।

कल डिटेल्सहरू पनि मगाए । त्यस क्रममा ११ गते बिहान विष्णु र इन्द्रदेवलाई प्रहरीले पक्राउ गर्‍यो । उनीहरूको पनि कल रेकर्ड मगायो । अनुसन्धान र सोधपुछ गर्दै जाँदा विष्णु र इन्द्रदेवबाट प्रहरीले क्लु पायो । त्यसपछि उनीहरूमाथि सूक्ष्म अनुसन्धान सुरु गर्‍यो ।

उनीहरूले अन्ततः हत्या गरेको कुरा स्वीकार गरे । विष्णुले जेठान इन्द्रदेवको सहयोगमा शिवकुमारलाई झुक्यानमा पारी बोलाएर बगैँचामा लगेर धारिलो हतियारले टाउको र अनुहारको भागमा प्रहार गरी हत्या गरेको र भोलिपल्ट फोन गरी ५० लाख मागेको प्रहरीसमक्ष दिएको बयानमा उल्लेख छ । उनीहरूले ५० लाख माग्न प्रयोग गरेको मोबाइल पनि इन्द्रदेवको घरबाट प्रहरीले बरामद गरेको छ ।

उनीहरूबाट आएको साविती बयान र प्रमाणपछि म्याद थप गराई थप अनुसन्धान गरिरहेकोे जिल्ला प्रहरी कार्यालय सिरहाका प्रवक्ता तथा डीएसपी शालिग्राम शर्माले बताए । उनीहरूमाथि अपहरण तथा कर्तव्य ज्यान कसुरमा मुद्दा चलाउने तयारी प्रहरीको छ ।

प्रकाशित मिति: बिहीबार, चैत १२, २०७७ २०:१०