भारतबाट स्वदेश फर्किने बढेसँगै सुदूरपश्चिममा कोरोनाको जोखिम बढ्यो

A+ A A-

भारतमा कोरोना भाइरसको संक्रमणको दोस्रो लहर फैलिन थालेपछि नेपाल फर्किने नेपालीको संख्या दिनहुँ बढ्न थालेको छ ।

स्वदेश फर्कनेको संख्या बढेसँगै सुदूरपश्चिममा कोरोना संक्रमण पुनः फैलन सक्ने जोखिम बढेको छ । रोजगारीका लागि भारत गएका नेपालीहरू स्वदेश फर्किन थालेका छन् ।

सुदूरपश्चिमको मौलिक पर्व बिसु तथा चैते अष्टमी मनाउन भारत गएका धमाधम घर फर्किरहेका छन् । तर, नाकामा स्वास्थ्य परीक्षणको व्यवस्था भने गरिएको छैन ।

स्वास्थ्य सतर्कता नअपनाए सुदूरपश्चिममा कोरोना संक्रमण फेरि तीव्र रुपमा फैलिन सक्ने चिकित्सकहरूले बताएका छन् । चिकित्सकहरूले भारतबाट नेपाल फर्किने नेपालीको नाकामै कोरोना परीक्षण गर्नु पर्ने सुझाव दिएका छन् ।

प्रहरीका अनुसार कञ्चनपुरमा पर्ने त्रिनगर र गड्डाचौकी नाकाबाट अहिले दैनिक करिब एक हजार जना नेपाली भित्रिरहेका छन् । नाकामा स्वास्थ्य सहायता कक्ष राखिएको भएपनि भारतबाट फर्कने सबैको सामान्य ज्वरो नाप्ने र कोरोनाको लक्षणबारे बुझ्ने काम भएको छैन ।

बिहान १० देखि बेलुकी पाँच बजेसम्ममात्र हेल्थ डेस्क सञ्चालन गर्ने गरिएको त्रिनगर नाकामा दुई दिनयता स्वास्थ्य सावधानी तुलनात्मक रुपमा केही बढाइएको छ । अहिले बिहानैबाट हेल्ड डेस्क सञ्चालन गर्नुका साथै शंकास्पदको एन्टिजेन परीक्षण थालिएको छ । नाकामा स्वास्थ्य जाँचका लागि कञ्चनपुरको पुनर्वास नगरपालिकाबाट खटिएका अहेब गणेशबहादुर साउदले जनशक्ति कम भएकाले भारत आउने सबैको स्वास्थ्य जाँच गर्न नसकिएको बताए ।

भारतबाट फर्कनेको भीड बढेकाले सीमित जनशक्ति रहेको हेल्थ डेस्कमा सबैको स्वास्थ्य जाँच गर्न सम्भव नदेखिएको उनले बताए । प्रशासनले कडाइ नगरेसम्म सबैको स्वास्थ्य जाँच सम्भव नहुने नाकामा खटिएका स्वास्थ्यकर्मीले बताएका छन् । स्वास्थ्यकर्मीले शंकास्पद र भारतमा कोरोना प्रभावित क्षेत्रबाट आएकाको एन्टिजेन परीक्षण गरिरहेका छन् ।

भारतबाट फर्केकाको ज्वरो नाप्ने र लक्षणबारे सोधपुछ गर्न बुधबार बिहान हेल्थ हेस्कमा एक जनामात्रै स्वास्थ्यकर्मी थिए । गौरीफन्टा नाकावारी हेल्थ डेस्क राखिएको छ, जहाँ सामान्य ज्वरो नाप्ने गरिएको छ । केही वर त्रिपाल टाँगेर बनाइएको हेल्थ डेस्कमा शंकास्पदको एन्टिजेन परीक्षण गर्ने गरिएको छ ।

सुदूरपश्चिम प्रदेश स्वास्थ्य निर्देशनालयले भारतमा संक्रमणको दोस्रो लहर देखिएकाले सुदूरपश्चिममा पनि कोरोना संक्रमण फैलिने जोखिम बढेको भन्दै सतर्कता अपनाउन आह्वान गरेको छ । निर्देशनालयले प्रदेशका चार वटा नाकाबाट फर्कनेको एन्टिजेन परीक्षणको व्यवस्था गर्न सम्बन्धित स्वास्थ्य कार्यालयलाई आग्रह गर्दै परिपत्र गरेको छ ।

कञ्चनपुरको त्रिनगर र गड्डाचौकी, बैतडीको झुलाघाट र दार्चुलामा स्थापना भएको हेल्थ डेस्कबाट भारतमा काम गरेर फर्केका नागरिकको एन्टिजेनबाट परीक्षणको व्यवस्था मिलाउन भनेको निर्देशनालयले जनाएको छ । प्रदेश स्वास्थ्य निर्देशक डा. गुणराज अवस्थीले नाकामा एन्टिजेन परीक्षणको व्यवस्था गरिएको बताए ।

उनले अहिले नै सावधानी नपनाउने हो भने सुदूरपश्चिममा विगतको भन्दा पनि संक्रमणले ठूलो रुप लिनसक्ने बताए । ‘अहिले नयाँ प्रजातिको कोरोना भाइरस देखा परिरहेको छ । त्यसको संक्रमण र मृत्युदर बढी छ,’ उनले भने, ‘सुदूरपश्चिममा भित्रिए स्थिति जटिल बन्न सक्छ । समयमै सावधानी अपनाउन आवश्यक छ ।’

सुदूरपश्चिमको मौलिक चाड बिसु मनाउन भारतबाट धमाधम घर फर्किरहेकाले जोखिम बढेको डा. अवस्थीले बताए । नाकामा परीक्षण र परीक्षणबाट संक्रमित देखिएकालाई कहाँ, कसरी राख्ने भन्ने निर्णय सरकारले गर्नुपर्ने उनको भनाइ छ ।

सुदूरपश्चिममा वैशाख १ गते बिसु पर्व धुमधामसँग मनाउने गरिन्छ । काम विशेषले घर बाहिर रहेकाले सुदूरपश्चिमको मौलिक पर्व बिसुमा सकभर घर फर्कने गर्छन् । बिसु पर्व नजिकिएसँगै भारतबाट फर्कनेको घुँइचो लाग्न थालेको हो ।

यता प्रदेशको सामाजिक विकास मन्त्रालयको स्वास्थ्य महाशाखा प्रमुख नरेन्द्रसिंह कार्कीले भारतमा संक्रमण फैलिएपछि सुदूरपश्चिममा पनि संक्रमण पुनः फैलने जोखिम बढेको बताए ।

सुदूरपश्चिममा पुसयता कोरोना संक्रमणदर न्यून विन्दुमा झरेको थियो । तर, भारतबाट नेपाल फर्केकामा फेरि कोरोना संक्रमण देखिन थालेको छ ।

प्रकाशित मिति: बिहीबार, चैत १२, २०७७ १५:४३