व्यापारीको घरमा एमाले मुख्यालय, भाडा स्वेच्छिक

A+ A A-

थापाथली हाइट उमंग मार्गको घुम्तीमै छ, आलिशान महल । सेतो पर्खालभित्रको याे महल हालसालै अदालतबाट पुनर्जीवित बनेकाे सत्तासीन दल नेकपा एमालेले ५ वर्ष भाेगचलान गर्नेछ ।

प्रधानमन्त्री केपी ओ‌लीकाे दलले भाडामा लिएकाे याे घर व्यवसायी सञ्जय अग्रवालको हो । चार रोपनी क्षेत्रफलमा कम्पाउण्डसहित बनेको याे भवनकाे भाडा एमालेले कति तिर्छ भन्नेचाहिँ दुवै पक्षले सार्वजनिक गरेका छैनन् । कृषि तथा पशुपक्षी विकासमन्त्री पद्मा अर्यालका अनुसार घरधनी अग्रवालसँग पार्टी कार्यालय राख्न पाँचवर्षे सम्झौता भएकाे छ । भाडा भने आपसी सम्झौता र अनुकूलतामा मिलाइने अर्यालले दाबी गरिन् ।

भवन जाेहाेकाे जिम्मा पाएका प्रधानमन्त्रीका आर्थिक सल्लाहकार माेतीलाल दुगडले पनि भाडाकाे विषयमा कुराकानी टुंगिइनसकेकाे शिलापत्रलाई बताए ।

'पार्टी कार्यालयका लागि घर त अन्य ठाउँमा पनि हेरेका थियौँ । तर, याे घर सेन्टर भयाे । अझ मेरा आफन्तको घर भएकाले यहाँ सजिलाे भयाे,’ दुगडले भने, ‘घर भाडाका विषयमा अग्रवालजीले पार्टीले जति दिन्छ उति लिन्छु भन्ने कुरा गर्नुभएको छ। यो परिवारभित्रको कुरा हो ।’

अग्रवालको याे घर ३० वर्ष पुरानाे भएकाे दुगडले शिलापत्रलाई बताए । उक्त घर अग्रवाल आफैँले बनाएका हुन् । साढे तीन तले घरको पहिलो तलामा दुईवटा बैठक हलबाहेक ११ कोठा छन् । सबै तलामा फराकिलाे बार्दली छ ।

व्यापारिक घरानाका अग्रवाल आफू भने कालिमाटी बस्दै आएका छन् । वैशाखबाट अग्रवालको उक्त घरमा एमालेको पार्टी कार्यालय बस्नेछ । यसअघि संयुक्त राष्ट्रसंघकाे युएन वुमनको कार्यालय रहेकाे उक्त घर दुई महिनाअघि मात्रै खाली भएको हो ।

बुधबार प्रधानमन्त्री तथा एमालेका अध्यक्ष ओलीले पार्टी कार्यालय राख्न उपयुक्त छ-छैन भनेर निरीक्षणसमेत गरिसकेका छन् । आजै उक्त घरमा नेपाली वैज्ञानिकले बनाएको रोबर्टको प्रदर्शन पनि गरिएको थियो ।

घरको निरीक्षणार्थ प्रधानमन्त्री ओलीसहित अर्थमन्त्री विष्णु पाैडेल र कृषि तथा पुशपंक्षी विकासमन्त्री पद्मा अर्याल पुगेका थिए ।०७२ सालको भूकम्पले बल्खुको एमाले पार्टी कार्यालय क्षतिग्रस्त बनाएपछि यति समूहको प्रभाव रहेकाे धुम्बाराहीस्थित पासाङ ल्हामु पर्वताराेहण प्रतिष्ठानकाे भवनमा सरेको थियो । प्रथम नेपाली महिला सगरगमाथा आराेही पासाङ ल्हामु शेर्पाकाे नाममा प्रतिष्ठान बनेकाे थियाे । त्यहाँ यति समूहका आङछिरिङ शेर्पा र साेनाम शेर्पाकाे संलग्नता छ । आङछिरिङ हेलिकप्टर दुर्घटनामा मृत्यु भयाे ।

व्यापारिक घरानाकाे संलग्नता भएकाे भवनमा दलकाे कार्यालय बसेकाे भन्दै त्यसकाे विराेध भएकाे थियाे । त्यही आसपास ओ‌ली नेतृत्वकाे सरकारले यति समूहलाई फाइदा पुग्ने गरी दरबारमार्ग, गाेकर्णलगायतका नेपाल ट्रस्टकाे सरकारी जग्गा सस्ताेमा लिजमा दिलाइदिएकाे थियाे ।

पार्टी कार्यालय बस्न दिएकाे गुन प्रधानमन्त्रीले तिरेकाे भनेर यसकाे चर्काे आलाेचना भएकाे थियाे । एमाले पार्टी कार्यालय राखिएको पासाङ ल्हामु प्रतिष्ठानको भवनअगाडि चक्रपथ विस्तारले असर गर्ने भएपछि कार्यालय सार्नुपरेको मन्त्री अर्यालले बताइन् ।

भावी पार्टी कार्यालयकाे मूल ढोकाको बायाँपट्टि प्रधानमन्त्री ओलीको ठूलो फोटो टाँसिएको छ ।

प्रकाशित मिति: बुधबार, चैत ११, २०७७ १६:२३