परीक्षाअगावै जनकपुरमा सीटीईभीटीको प्रश्नपत्र आउट

सांकेतिक तस्वीर

A+ A A-

जनकपुरमा परीक्षा सुरु हुनुअघि नै सीटीईभीटीको प्रश्नपत्र बाहिरिएको छ ।

तीन वर्षे डिप्लोमा अन्तर्गत सब-ओभरसियरको परीक्षा सुरु हुनुभन्दा करिब एक घण्टाअगावै प्रश्नपत्र बाहिरिएको जिल्ला प्रहरी कार्यालय धनुषाले जनाएको छ ।

प्रश्नपत्र आउट गरी सानो आकारमा छापिएको प्रश्नपत्र तथा उत्तर छापाखानाबाट बरामद भएको प्रहरीले जनाएको छ । जनकपुरधाम उपमहानगरपालिका–४ स्थित भैरवचोकबाट प्रश्नपत्र र चिर्ट चोर्न संस्थागत रुपमा छापिँदै गरेको उत्तरसहित प्रहरीले छापाखानाबाट पााच जनालाई पक्राउ गरेको धनुषाका डीएसपी मकेन्द्र मिश्रले जानकारी दिए ।

तर, अनुसन्धान जारी रहेको भन्दै प्रहरीले पक्राउ परेकाहरूको नाम खुलाइएको छैन । जनकपुरको चार वटा परीक्षा केन्द्रमा सीटीईभीटीको विभिन्न शंकायका परीक्षा चलिरहेका छन् ।

अनुगमनका क्रममा ती सबै परीक्षा केन्द्रमा व्यापक रुपमा चिट चोरी भइरहेको पाइएको डीएसपी मिश्रले बताए । ‘सबै परीक्षा केन्द्रको हालत त्यस्तै छ । आधा–एक घण्टा पहिले प्रश्नपत्र आउट भएको हुनसक्छ,’ डीएसपी मिश्रले भने ।

धनुषाका एसपी प्रकाश रानाभाटले भने प्रश्नपत्र आउट नभएको बताए । उनले प्रश्नपत्र आउट भएको कुराको खण्डण गर्दै फोटोकपी गरिएको र गरिरहेको अवस्थामा चिट मात्र बरामद भएको बताए ।

‘अनुगमनका क्रममा छापाखानामा छापिएर संस्थागत रुपमा तयार गरिएका चिट भेटिए । विभिन्न परीक्षा केन्द्रमा एउटै किसिमको चिट भेटिसकेपछि विद्यार्थीसँग सोधपुछ गरिएको छ ,’ धनुषाका एसपी रानाभाटले भने, ‘फोटोकपी गरेर तयारी अवस्थामा राखिएका चिट बरामद गरेर अनुन्धानका लागि ती व्यक्तिलाई हामीले नियन्त्रणमा लिएका छौँ ।’

जनकपुरमा परीक्षा सञ्चालन भइरहेका चार वटै परीक्षा केन्द्रमा त्यस्ता चिट फेला परेको उनले बताए ।