जब गौतमबुद्ध विमानस्थलमा आगो लाग्यो

A+ A A-

शुक्रबार बिहान भैरहवास्थित गौतमबुद्ध क्षेत्रीय अन्तर्राष्ट्रिय विमानस्थलमा आगोको मुस्लो देखियो । कालो मुस्लोसहित आगो लागेको देखेका स्थानीयले बिहानै विमानस्थलमा आगो लागेको अनुमान गरे ।

विमानस्थलमा आगो बलेको देखेपछि धेरैले आगालागी वा विमान दुर्घटनाको अनुमान गरे । आगो लाग्नासाथ दमकल र एम्बुलेन्सको साइरनले विमानस्थल दौडधुप देखियो । स्थानीयले विमानस्थलमा दुर्घटना वा आगालागी भएको अड्कल काट्न थाले ।

तर, त्यो वास्तविक आगलागी वा विमान दुर्घटना भने थिएन ।

विमानस्थलमा हुन सक्ने विमान दुर्घटनापछिको उद्धार, आगलागी नियन्त्रण कसरी गर्ने भन्नेबारे भैरहवास्थित गौतमबुद्ध क्षेत्रीय अन्तर्राष्ट्रिय विमानस्थलमा गरिएको अभ्यास थियो त्यो ।

अन्तर्राष्ट्रिय नागरिक उड्डयन संगठनको मापदण्डअनुसार विमानस्थलमा फायर फाइटर, नेपाली सेना, जनपद प्रहरी, एयरलाइसन्स कम्पनीहरू, चिकित्सकको भूमिकालाई समेटेर आपत्कालीन अभ्यास गरिएको हो ।

यो अभ्यासले भविष्यमा हुन सक्ने दुर्घटना र त्यसपछिको क्षतिलाई कम गर्न सहयोग पुग्ने नागरिक उड्डयन प्रशिक्षण प्रतिष्ठानका उपमहानिर्देशक छविलाल खनालले बताए ।

उद्धार अभ्यासका लागि खनालपुर विमानस्थलबाट १५ जना यात्रु बोकेर गौतमबुद्ध विमानस्थल भैरहवा आउँदै गरेको अल्फा एयरलाइन्सको ९ एनएएको विमान अवतरण गर्ने क्रममा दुर्घटना भएको डमी प्रस्तुत गरिएको थियो । दुर्घटनामा विमानमा लागेको आगो नियन्त्रण गर्ने तरिका, घाइते यात्रुहरुको उद्धार र उपचार विधिबारे प्रस्तुति देखाइएको थियो ।

अन्तर्राष्ट्रिय विमानस्थलमा यस्ता अभ्यास हुने गरे पनि आन्तरिक विमानस्थलमा बृहत् अभ्याससहित पहिलो पटक उद्धार अभ्यास गरिएको हो । व्यावहारिक अभ्यास र आपत्कालीन अवस्थामा अपनाउनुपर्ने कामबारे प्राविधिकलाई जानकारी दिइएको छ ।

गौतमबुद्ध विमानस्थल नेपालको आन्तरिकतर्फ व्यस्त विमानस्थल मानिन्छ । जहाज दुर्घटना भएको अवस्थामा विमानस्थल सञ्चालन र आपत्कालीन उद्धारमा सरोकारवालाहरुको सक्रियतालाई व्यावहारिक रूपमै अभ्यास गर्न डमी अभ्यास गरिएको गौतमबुद्ध विमानस्थलका महानिर्देशक टेकराज पोखरेलले बताए ।

यो अभ्यासले आगामी दिनमा विमान वास्तविक रुपमा दुर्घटना हुँदा नआत्तिईकन मनोबल बढाउँदै उद्धारमा सहज हुने प्रतिष्ठानको विश्वास छ । पाँच दिनसम्म आठ जना प्राविधिकलाई प्रतिष्ठानले तालिम दिएपछि दुर्घटनापछि उद्धार गर्ने तरिकाबारे अभ्यास गरिएको हो ।

अभ्यासका क्रममा फायर फाइटर, नेपाली सेना, जनपद प्रहरी, एम्बुलेन्स चालक, एयरलाइन्स कम्पनी, विमानस्थलका कर्मचारीहरूले दुर्घटनाकै झल्को दिने गरी उद्धारमा खटिएर अभ्यास गरेका थिए ।

प्रकाशित मिति: शुक्रबार, चैत ६, २०७७ १२:३९