राजबन्दी राखिएको गोलघरमा सुन तस्करदेखि ‘विकिनी किलर’सम्म

A+ A A-

राणाकालमा राणाविरोधी गतिविधि गर्नेलाई मृत्युदण्ड दिने उद्देश्यले निर्माण भएको सुन्धारा कारागारको गोलघरभित्र विभिन्न अपराधमा संलग्न ६ जना कैदी राखिएका छन् ।

जेलभित्रबाटै अापराधिक सञ्जाल बढाउन सक्ने लागेमा कारागारको गोलभित्र राखिने गरेको प्रहरी अधिकारीहरु बताउँछन् । आपराधिक मानसिकता बढी हुने र कारागारभित्र रहेका अन्य कैदीको सुरक्षामा समेत असर नहोस् भनेर त्यस्ता प्रवृत्ति भएका अभियुक्तलाई गोलघरभित्र राखिने कारागार प्रशासन प्रमुख जेलर सह–सचिव देधनिधि अधिकारी बताउँछन् ।

१९७१ सालमा चन्द्र शमशेरले निर्माण गरेको गोलघरभित्र राणा शासनविराधी गतिविधि गरेको भन्दै शहीद गंगालाल श्रेष्ठ, दशरथ चन्द, शुक्रराज शास्त्री र धर्मभक्त माथेमालाई राखिएको थियो । वामपन्थी नेता राधाकृष्ण मैनालीका अनुसार मृत्युदण्डको सजाय सुनाउँदा चारैजना घोलघरभित्रै थुनिएका थिए ।

पञ्चायतविरोधी गतिविधि गरेको भन्दै प्रधानमन्त्री केपी शर्मा ओली, पूर्वप्रधानमन्त्री टंकप्रसाद आचार्य र गणेशमान सिंहलाई गोलघरमै राखिएको थियो । त्यस्तै, कम्युनिस्ट नेता मोहनचन्द्र अधिकारीदेखि राधाकृष्ण मैनालीसम्मलाई पनि गोलघरभित्रै राखिएको थियो ।

मैनालीका अनुसार त्यो राणा शासनमा ‘डेथ पेनाल्टी’ दिन बनाइएको घर थियो । बाहिरबाट गोलो देखिए पनि भित्र त्यस्तो नभएको उनी बताउँछन् । ८ फिट उचाइ र ६ फिट चौडाइ रहेको उक्त गोल घरभित्रै सानो ठाउँमा चर्पीको समेत व्यवस्था मिलाएको मैनालीको भनाइ छ ।

मैनाली र प्रधानमन्त्री ओली २०३२ सालदेखि २०३६ सालसम्म पञ्चायत नआउँदासम्म गोलघरमा राखिएका थिए । केन्द्रीय कारागारभित्र रहेको गोलघरमा सातवटा कोठा छन् ।

इतिहास बोकेको गोलघरमा अहिले पनि कैदी राखिँदै आइएको छ।

ठूला अपराधका मुद्दाका कैदीलाई गोलघरभित्र राखिने कारागार प्रमुख अधिकारीको भनाइ छ । कुख्यात अपराधी, संगठित अपराधको जालो फैलाउने प्रवृत्तिका कैदीले कारागारभित्रबाटै अापराधिक क्रियाकलाप सञ्चालन गर्ने सक्ने भन्दै गोलघरभित्र राखिने र आचरणमा सुधार आएको देखिए उनीरुहलाई गोलघर बाहिर निकालिने उनको भनाइ छ ।

केन्द्रीय कारागार सुन्धारामा हाल २ हजार ६ सय जनाभन्दा बढी कैदी छन् । यो संख्या दिनैपिच्छे बढ्ने र घट्ने गरेको जेलर वेधनिधि अधिकारीको भनाइ छ ।

तिनैमध्येका ६ जना गोलघरभित्र छन् । गोलघरभित्र रहनेमा तेस्रो लिंगीदेखि विदेशी नागरिकसमेत छन् । उपत्यकाभित्रका डिल्लीबजार र नख्खु कारागारमा भने गोल घर छैन ।

को–को छन् गोलघरमा

केन्द्रीय कारागार सुन्धाराको गोलघरभित्र ६ जना केदी छन् । उनीहरूमध्ये १ जना तेस्रो लिंगी र २ जना विदेशी नागरिक हुन् ।

गोलघरभित्र रहनेमा चुणामणि उप्रेती ‘गोरे’ अभिषेक सिंह, एक जना तेस्रो लिंगी, फ्रान्सेली नागरिक चार्ल्स सोभराज गुरुमुख र बेलायती नागरिक मुकदुर हुसेन छन् ।

यस्तो छ अपराध

मोरङ उर्लाबारी–४ का चूणामणि उप्रेती गोरे ३३ किलो सुन काण्ड र सनम शाक्य हत्याका मुख्य अभियुक्त हुन् । उनको मुद्दा हाल जिल्ला अदालत मोरङमा विचाराधीन छ । उनी पुर्पक्षका लागि जेल चलान भएका हुन् ।

नेपालगन्ज–३ बाँके घर भएका अभिषेकराज सिंह ‘सिरियल किलर’ का रुपमा चिनिएका अपराधी हुन् । सिंह २०७० सालमा पक्राउ परेका थिए । उनलाई महानगरीय प्रहरी अपराध महाशाखाले पक्राउ गरेको थियो ।

प्रहरीका अनुसार तन्त्रमन्त्र सिकेका उनले धार्मिक आवरणमा विभिन्न अपराध गर्दै आएका थिए । उनीमाथि १८ जनाभन्दा बढी व्यक्तिको शृंखलाबद्ध हत्या गरेको अभियोग थियो ।

उनी ललितपुरको नख्खु कारागारमा जन्मकैदको सजाय भोगिरहेका थिए । तर, गत २० वैशाखमा नख्खु कारागारभित्रै भक्तबहादुर सुनारलाई खानामा केमिकल मिसाएर हत्या गरेपछि उनलाई केन्द्रीय कारागार सुन्धाराको गोल घरमा राखिएको छ ।

फ्रान्सका नागरिक चार्ल्स सोभराज ‘विकिनी किलर’का नामले संसारभर चिनिएका कुख्यात अपराधी हुन् । शोभराज १४ वर्ष अघिदेखि सुन्धारा कारागारमा जेल जीवन भुक्तान गरिरहेका छन् ।

उनीमाथि विभिन्न देशमा नागरिक हत्या गरेको अभियोग छ । नेपाल घुम्न आएका एक महिलाको हत्या अभियोगमा उनी हाल जन्मकैदको सजाय भोगिरहेका छन् । उनलाई सुन्धारा कारागारको गोलघरभित्र राखिएको छ ।

बेलायती नागरिक मुकदुर हुसेन २०७४ जेठदेखि नख्खु कारागारमा थिए । ओभर स्टे अभियोगमा पक्राउपछि जेल परेका उनी २०७५ मंसिरमा नख्खु कारागारबाट भागे ।

सशस्त्र प्रहरी र नेपाल प्रहरीको सुरक्षा घेरा रहेको र चारवटा गेट रहेको नख्खु कारागारबाट उनी कसरी भागे भन्ने अझै सार्वजनिक भएको छैन । भागेको केही दिनमै पक्राउ परेका उनी हाल सुन्धारा कारागारको गोलघरभित्र छन् ।

त्यस्तै, एकजना तेस्रो लिंगीलाई विभिन्न प्राचीन मुर्ति चोरीको अभियोगमा सुन्धारा कारागारमा राखिएको जेलर अधिकारी बताउँछन् । उनलाई पनि कारागार प्रशासनले गोलघरभित्र राखेको छ । त्यस्तै, १ जना राई थरका कैदीलाई समेत गोलघरभित्र राखिएको जेलर वेदनिधि अधिकारीले बताए ।

प्रकाशित मिति: मंगलबार, वैशाख ३१, २०७६ ०४:०३