वैदेशिक रोजगार : तालिम प्रदायक संस्थाले अभिमुखीकरण तालिम नदिई बेच्छन् प्रमाणपत्र

वैदेशिक रोजगार : तालिम प्रदायक संस्थाले अभिमुखीकरण तालिम नदिई बेच्छन् प्रमाणपत्र

A+ A A-

वैदेशिक रोजगारीमा जाने श्रमिकलाई तालिम प्रदायक संस्थाले अभिमुखीकरण तालिम नै नदिई प्रमाणपत्र बिक्री गरिरहेको पाइएको छ । वैदेशिक रोजगार विभागले गरेको अनुगमनका क्रममा तालिम सञ्चालन नगरी प्रमाणपत्र बिक्री गरिरहेको तथ्य भेटिएको हो ।

सोमबार बिहान अभिमुखीकरण तालिम सञ्चालन गर्ने कस्मिक, मुनडेक्स, साइन, त्रिपाल एस, साइनिङ र एमएक ट्रेनिङ सेन्टरमा विभागले अनुगमन गरेको थियो । त्यस क्रममा ओरियन्टेसन कक्षा नै सञ्चालन नगरी वैदेशिक रोजगारीमा जाने कामदारलाई प्रमाणपत्र बिक्री गर्दै आएको भेटिएको विभागका अधिकृत मातृकाप्रसाद सापकोटाले जानकारी दिए ।

अनुगमनका क्रममा ‌ओरियन्टेसन कक्षाका लागि नाम दर्ता र हाजिर गराएको तर अभिमुखीकरण तालिम सञ्चालन नगरी प्रमाणपत्र बिक्री गर्ने गरेको भेटिएको उनले बताए ।

हाल देशभरबाट १ सय ३९ संस्थाले वैदेशिक रोजगारीमा जाने कामदारलाई अभिमुखीकरण तालिम दिँदै आएका छन् । त्यस्ता संस्थाले राम्रोसँग तालिम नदिँदा वैदेशिक रोजगारीमा जाने कामदारहरूले रोजगारदाता देशमा पुगेपछि समस्या व्यहोर्नुपर्ने विभागले जनाएको छ ।

विभागका महानिर्देशक कुमारप्रसाद दहालले पनि अनुगमनका क्रममा तालिम प्रदायक संस्थाले विदेशिन चाहने नेपालीलाई तालिम नै नदिइ प्रमाणपत्र दिइरहेको भेटिएको बताए ।

तालिम नै नदिई प्रमाणपत्र बिक्री गर्ने संस्थामाथि कानुनी कारबाही गर्ने र त्यस्ता संस्था खारेजसमेत गर्न सकिने जानकारी दिँदै विभागका महानिर्देशक दहालले प्रमाणपत्र बेच्ने संस्थालाई खोजी-खोजी कारबाही गरिने बताए ।

वैदेशिक रोजगारीमा जाने कामदारले सात सय तिरेर अभिमुखीकरण तालिम लिँदै आएका छन् । वैदेशिक रोजगारीमा जानुअघि दुई दिनको अभिमुखीकरण तालिम अनिवार्य लिनुपर्ने व्यवस्था छ । अभिमुखीकरण तालिममा रोजगारदाता देशका बारेमा जानकारी गराइन्छ ।

प्रकाशित मिति: सोमबार, चैत २, २०७७ १२:४०